Բաժիններ

Լրացուցիչ

Ընտրել լեզուն

Նովակ Ջոկովիչ՝ մեկ հաղթանակ, բազմաթիվ նվաճումներ

Թենիսի տղամարդկանց մենախաղի Մայամիի մրցաշարի եզրափակիչում սերբ թենիսիստ Նովակ Ջոկովիչը վստահ հաղթանակ տարավ ճապոնացի Կեյ Նիսիկորիի նկատմամբ՝ դառնալով Մայամիի մրցաշարի հաղթող: Ջոկովիչն առավելության հասավ 2 սեթի արդյունքում 6:3, 6:3 հաշվով:

Այս հաղթանակով ATP վարկանիշային աղյուսակի 1-ին համար Նովակ Ջոկովիչը հաղթանակների թիվը հասցրեց 714-ի՝ շրջանցելով իր մարզիչ Բորիս Բեկերին, միաժամանակ դառնալով 11-րդն ընդհանուր հաշվարկում:

Մայամիի մրցաշարում հաղթելով՝ Ջոկովիչն իր 63-րդ տիտղոսը նվաճեց մարզական կարիերայում, որով շրջանցեց Գիլյերմո Վիլասին՝ միանձնյա տեղ զբաղեցնելով 8-րդ հորիզոնականում:

Նշենք, որ Մայամիի մրցաշարի հաղթող դառնալով՝ Ջոկովիչը ռեկորդակիր դարձավ «Մասթերս» մրցաշարերում հաղթանակների թվով, ինչպես նաև մրցանակային հիմնադրամներից ստացած եկամուտով: Նվաճելով իր 28-րդ տիտղոսը «Մասթերս» մրցաշարերում՝ Նովակը շրջանցեց Ռաֆայել Նադալին՝ դառնալով առաջատար: Բացի այդ, մրցաշարի արդյունքներով՝ Նովակը կշրջանցի նաև Ռոջեր Ֆեդերերին մրցանակային հիմնադրամներից ստացած եկամուտով՝ 98.2 միլիոն դոլար:

Նիսիկորիի նկատմամբ տարած հաղթանակը նաև 12-րդն էր անընդմեջ Ջոկովիչի համար առաջատար տասնյակի հետ մենախաղերում, 14-րդ անընդմեջ հաղթնակը՝ ընդհանուր պայքարում, 16-րդ անընդմեջ հաղթանակը Մայամիի մրցաշարում ու 22-րդ անընդմեջ հաղթանակը «Մասթերս» մրցաշարերում: Բացի այդ, Ջոկովիչը հաղթել է 24 սեթ անընդմեջ:

Եվս մեկ նվաճում. Նովակ Ջոկովիչը դարձավ միակ թենիսիստն Անդրե Աղասիից հետո, որին հաջողվում է 3 անգամ անընդմեջ դառնալ Մայամիի մրցաշարի հաղթող: Նովակը դարձավ նաև պատմության միակ թենիսիստը, որին հաջողվել է 3 տարի անընդմեջ հաղթել 7 տարբեր մրցաշարերում: Մինչև Մայամիի մրցաշարի եռակի չեմպիոն դառնալը Ջոկովիչն Ինդիան Ուելսի, Դուբայի, Պեկինի, Փարիզի մրցաշարերի, Ավստրալիայի Բաց առաջնության ու ATP ամփոփիչ մրցաշարի եռակի հաղթող է, ընդ որում՝ անընդմեջ: Ընդհանուր հաշվով՝ սերբ թենիսիստը Մայամիի մրցաշարի հաղթող է դարձել 6 անգամ: