Բաժիններ

Լրացուցիչ

Ընտրել լեզուն

Աշոտ Բարսեղյան. «Տիգրանը շատ մեծ պոտենցիալ ունի. նա իր հնարավորությունների դեռ շատ քիչ տոկոսն է օգտագործել»

Հայկական ֆուտբոլում շատ են ֆուտբոլային ընտանիքները: Այսինքն, երբ որդին գնացել է ֆուտբոլիստի հոր հետքերով: Դրա այս պահին լավագույն օրինակներից է Բարսեղյանների ընտանիքը, որտեղ հայրը՝ Աշոտ Բարսեղյանը, «Գանձասար-Կապանի» գլխավոր մարզիչն է, իսկ որդին՝ Տիգրանը, հանդես է գալիս Հայաստանի ազգային հավաքականում և մակեդոնական «Վարդարում»:

23-ամյա ֆուտբոլիստը 2016 թվականին Մակեդոնիա տեղափոխվելուց հետո տևական ժամանակ բացակայել էր խաղադաշտից առողջական խնդիրների պատճառով, սակայն վերադարձը տպավորիչ էր: «Վարդարի» կազմում 2017 թվականին անցկացրած 9 հանդիպումներում Բարսեղյանը դարձել է 3 գոլի հեղինակ, թիմի երկրպագուների վարկածով ճանաչվել մարտ ամսվա լավագույն ֆուտբոլիստ: Նա մարտին հրավիրվել էր նաև Հայաստանի հավաքական և Գևորգ Ղազարյանի՝ արդեն առաջին րոպեին ստացած վնասվածքից հետո փոխարինման մտել Ղազախստանի ընտրանու հետ մրցավեճում:

Աշոտ Բարսեղյանը նույնպես որպես ֆուտբոլիստ երկար ճանապարհ է անցել և VivaroNews.am-ին տված հարցազրույցում հնարավորինս մի կողմ է դրել հայրական զգացողությունները՝ որպես մասնագետ գնահատելով որդու ելույթները.

-Փառք Աստծո, նրա առողջական խնդիրներն անցյալում են, և Տիգրանն իրեն շատ լավ է զգում: Բայց նա բավական ժամանակ խաղադաշտից դուրս էր, ինչը չէր կարող ազդեցություն չունենալ: Ես նրանից շատ սպասելիքներ ունեմ: Տիգրանը շատ մեծ պոտենցիալ ունի. նա իր հնարավորությունների դեռ շատ քիչ տոկոսն է օգտագործել: Նա 9 խաղում 3 գոլ է խփել, բայց նկատենք, որ խաղում է կենտրոնական հարձակվողի դիրքում: Տիգրանն իր թիմին շատ ավելի մեծ օգուտ կտար ավելի հոգեհարազատ աջից կամ ենթահարձակվողի դիրքում խաղալիս: Բայց նա պրոֆեսիոնալ է. խաղում է այնտեղ, որտեղ ասում են մարզիչները:

Ճիշտ է, նա մի ֆանտաստիկ որակ ունի՝ կարողանում է հանպատրաստից շատ վտանգավոր հարված կատարել, բայց դեռ պետք է ձեռք բերի որակներ, որոնք տիպիկ են հարձակվողի համար: Ես խաղացել եմ հարձակման գծում, և դա շատ լավ գիտեմ: Նա պետք է կարողանա զգալ, թե ինչպես ճիշտ պահին ճիշտ տեղում հայտնվի, ձերբազատվի պաշտպաններից, լավ կարդա խաղը: Բայց նա էլ ունի որակներ, որոնք ես չեմ ունեցել: Տիգրանն այժմ հարձակվողի դիրքում ֆիզիկապես լավ է պայքարում, երկրորդ հարկում պայքարում գրեթե միշտ հաղթում է, գոլեր է խփում, բայց իրեն հոգեհարազատ դիրքում նա շատ ավելի մեծ օգուտ կտա իր թիմին:

Տիգրանն իրեն հոգեբանական առումով լավ է զգում թիմում: Նա խելացի տղա է, մեծամիտ չէ: Դեռ շատ պետք է աշխատի և՛ զուտ ֆուտբոլային, և՛ հոգեբանական տեսանկյունից: Ես այդ շարժը զգում եմ, երբ խոսում եմ իր հետ: Նրա ամենամեծ քննադատը հենց ինքն է: Երբ լավ չի խաղում, իրեն ընկճված է զգում: «Վարդարի» մարզչական շտաբն ու ղեկավարությունը շատ գոհ է նրանից:

Վերջին շրջանում կային տեղեկություններ, որ Տիգրանի ծառայություններով հետաքրքրված են ավելի բարձրակարգ ակումբներ: Ըստ Ձեզ՝ ժամանա՞կն է մտածելու ակումբային գրանցումը փոխելու մասին: 

-Որքան ուժեղ թիմում հայտնվի, նա այնքան ավելի լավ կխաղա: Տիգրանն ավելի մեծ օգուտ կտա տեխնիկապես լավ պատրաստված թիմերին, երբ նրան էլ ճիշտ օգտագործեն: Նա այս պահին պետք է կենտրոնանա «Վարդարում» լավ ելույթների վրա, իսկ տեղափոխությունները կլինեն ժամանակի ընթացքում: Որ թիմի մարզաշապիկը հագնում ես, նրա պատիվն էլ պետք է պահես: Չպետք է մոռանանք, որ ամենակարևորն ազգային հավաքականն է: Տիգրանը պետք է շատ աշխատի, որ հենց ընտրանու կազմում լավ հանդես գա:

World Cup 2018 Qualifiers Armenia 2-0 Kazhakhstan

Նա ղազախների հետ մրցավեճում արդեն խաղասկզբում մտավ փոխարինման, բայց խաղում էր ոչ այդքան հոգեհարազատ՝ ձախ կիսապաշտպանի դիրքում: Հաշվի առնելով աջ եզրում մեր հավաքականի խնդիրները՝ ավելի ճիշտ չի՞ լինի առաջիկա խաղերում հենց նրան փորձարկել այդ դիրքում:

-Ես հանդիպումը դիտել եմ մասնագետի աչքով և կարող եմ ասել, որ, իր դիրքում չխաղալով հանդերձ, մեծ օգուտ տվեց թիմին: Օդային պայքարում հաղթում էր, դիրքային ֆուտբոլում գրագետ էր, բայց մենք նրանից ավելին ենք սպասում:  Չպետք է մոռանալ, որ առաջին պաշտոնական խաղն էր հավաքականում, կար լարվածություն: Եթե մեծ օգուտ չտար թիմին, նրան կփոխարինեին: Ունենք խելացի մարզիչներ, ովքեր ամեն ինչ լավ են տեսնում: Աջ եզրում նա ավելի մեծ օգուտ կտա հավաքականին:

Սակայն, մարզիչը որտեղ դիրքավորեց ֆուտբոլիստին, նա պետք է ամեն ինչի, որ հենց այդտեղ իրեն լավ դրսևորի: Եթե մեր ամենալավ ֆուտբոլիստի դիրքն էլ փոխեն, ճիշտ է, կրկին մեծ օգուտ կտա թիմին, բայց նույն խաղը չի լինի, ինչ որ իր հաստիքային դիրքում: Տիգրանը երիտասարդ ֆուտոլիստ է, և ամեն ինչ առջևում է:

Տիգրանի առողջական խնդիրներն այլևս ամբողջովին անցյալո՞ւմ են:

-Այո: Սա այնպիսի խնդիր էր, որ այն երբ բուժվում է, այլևս երբեք չի անհանգստացնում: Երևի տեղյակ եք, Կրիշտիանու Ռոնալդուն 17 տարեկանում դրա բարդ տեսակն է ունեցել, բայց բուժվել է, և ամեն ինչ մոռացվել է: Խորին շնորհակալություն եմ ուզում հայտնել «Վարդարի» ամբողջ անձնակազմին: Նրանք կարճ ժամանակում հասկացան Տիգրանի պոտենցիալը և միջոցներ չխնայեցին նրա ապաքինման համար, աջակցեցին բարոյապես՝ մշտապես ասելով, որ նա ոչ մի խնդիր չունի, կվերականգնվի ու կխաղա: Հիմա էլ Տիգրանը միշտ ասում է՝ պետք է խաղա այնպես, որ մարզիչներին ու ղեկավարներին, ովքեր իրեն շատ են սիրում, վարձահատույց լինի իր խաղով:

QrtNkod


Աշոտ Բարսեղյան. «Շատ ենք տեսել, որ թիմերն ամենավերջին պահին բաց են թողել չեմպիոնությունը»

Աշոտ Բարսեղյան. «Սա չեմպիոնական խաղ էր, բայց բախտն այսօր «Ալաշկերտի» կողմն էր»

Աշոտ Բարսեղյան. «Այսօր մեր բախտը բերեց. ֆուտբոլում դա շատ բան է նշանակում»

Աշոտ Բարսեղյան. «Առաջնությունը շարունակվում է, որտեղ մենք լուրջ նպատակներ ունենք»

Աշոտ Բարսեղյան. «Այս ոչ-ոքիից ավելի շատ կորցրինք մենք, քան շահեց «Բանանցը»

Աշոտ Բարսեղյան. «Մեր յուրաքանչյուր ֆուտբոլիստ յուրահատուկ բնավորություն ունի, որը պետք է լավ իմանանք»

Աշոտ Բարսեղյան. «Շիրակը» մեզ թույլ չտվեց շատ պահեր ստեղծել իր դարպասի մոտ»

Աշոտ Բարսեղյան. «Արարատի» գոլից հետո տղաները կաշկանդված էին գործում»

Աշոտ Բարսեղյան. «Ինձ շատ ուրախացրեց, որ տղաները կամային որակներ դրսևորեցին»

Աշոտ Բարսեղյան. «Ձմռանը նախընտրեցինք չհրավիրել միջակ լեգեոներների, այլ աշխատել տեղացի ֆուտբոլիստների վրա»

Աշոտ Բարսեղյան. «Այսօր գրեթե կատարյալ հանդիպում անցկացրինք»

Աշոտ Բարսեղյան. «Հարկադրաբար ենք հույս դնում լեգեոներների վրա. եթե նրանց չբերենք, ապա ո՞վ պետք է խաղա»

Արկադի Անդրեասյանի և Աշոտ Բարսեղյանի հետխաղյա ասուլիսը