Բաժիններ

Լրացուցիչ

Ընտրել լեզուն

10 փաստ Ռոման Բերեզովսկու ֆուտբոլային կարիերայից

10 փաստ Ռոման Բերեզովսկու ֆուտբոլային կարիերայից

Մարտի 25-ին կայանալիք Հայաստան-Բելառուս հանդիպման ժամանակ տեղի կունենա մեծ ֆուտբոլին հրաժեշտ տված ազգային հավաքականի փորձառու դարպասապահ, 41-ամյա Ռոման Բերեզովսկու մեծարման արարողությունը: Այդ առիթով «Վիվառո Նյուզը» ներկայացնում է անվանի դարպասապահի ֆուտբոլային կարիերայի առավել ուշագրավ և հետաքրքրական փաստերը:

Berz2

1.Ռոման Բերեզովսկին ֆուտբոլային կարիերան սկսել է 16 տարեկանում՝ 1991թ. Երևանի «Կոշկագործի» կազմում մասնակցելով ԽՍՀՄ 2-րդ խմբի առաջնությանը: Հաջորդ մրցաշրջանում նա թիմի կազմում մասնակցեց Հայաստանի անդրանիկ առաջնությանը՝ նորամուտը նշելով ապրիլի 20-ին Երևանում Էջմիածնի «Զվարթնոցի» հետ կայացած 3-րդ տուրի խաղում:  Այդ հանդիպման 66-րդ րոպեին Արթուր Հովհաննիսյանի հարվածից հետո Բերեզովսկին ՀՀ առաջնություններում առաջին գոլը բաց թողեց:

«Կոշկագործի» կազմում անցկացրած 9 խաղում բաց թողնելով 12 գոլ, Բերեզովսկին առաջնության 2-րդ շրջանում պաշտպանեց Կապանի «Սյունիքի» դարպասը՝ 13 խաղում բաց թողնելով 30 գոլ: Ընդհանուր առմամբ նա ՀՀ առաջնություններում անցկացրած իր միակ մրցաշրջանում մասնակցեց 22 խաղի ու բաց թողեց 42 գոլ:

2.Ֆուտբոլային կարիերան շարունակելով Ռուսաստանում, Ռոման Բերեզովսկին հանդես է եկել Սանկտ Պետերբուրգի «Կոսմոս-Կիրովեցում» (1993թ.) և «Զենիթում» (1994-2000թթ.), «Սատուռնում» (1995թ.), Մոսկվայի «Տորպեդոյում» (2001թ.) ու «Դինամոյում» (2002-2005, 2012-2015թթ.) և «Խիմկիում» (2006-2011թթ.): ՌԴ պրեմիեր լիգայում նա ընդհանուր առմամբ անցկացրել է 313 խաղ, բաց է թողել 368 գնդակ: Հոբելյանական՝ 300-րդ հանդիպումը Բերեզովսկին անցկացրել է 2012թ. սեպտեմբերի 22-ին Մոսկվայի «Դինամոյի» կազմում «Ամկարի» հետ մրցավեճում:

1997թ. «Սպորտ Էքսպրեսի» վարկածով Բերեզովսկին ճանաչվել է ՌԴ պրեմիեր լիգայի լավագույն դարպասապահ, 1999թ. «Զենիթի» կազմում դարձել է Ռուսաստանի գավաթակիր, իսկ 33 լավագույն ֆուտբոլիստների ցանկում եզրափակել է դարպասապահների եռյակը:

3.Ռոման Բերեզովսկին Լև Յաշինի անվան դարպասապահների խորհրդանշական ակումբի անդամ է: Ռուսաստանում հանդես գալու տարիներին նա պաշտոնական մրցումներում ընդհանուր առմամբ 107 անգամ (103՝ ՌԴ առաջնությունում, 3՝ ՌԴ գավաթի մրցաշարում, 1՝ եվրոգավաթներում) դարպասն անառիկ է պահել: Ակումբի հաշվարկով հոբելյանական՝ 100-րդ «չոր» խաղը Բերեզովսկին անցկացրել է 2009թ. հուլիսի 24-ին «Խիմկիի» կազմում «Ամկարի» հետ մրցավեճում:

4.Ռուսաստանի պրեմիեր լիգայի առաջնության հանդիպումներում հետ մղած 11մ հարվածների քանակով (14) Ռոման Բերեզովսկին յուրօրինակ ռեկորդակիր է: ՀՀ առաջնություններում Բերեզովսկին հետ է մղել իր դարպասին նշանակված 3 հարվածներից մեկը՝ հաղթող դուրս գալով Նոյեմբերյանի «Ազնավուրի» հարձակվող Շիրակ Սառիկյանի հետ մենամարտում:

Հայաստանի ազգային հավաքականում նրա դարպասին նշանակված 11մ 18 հարվածներից իրացվել է 15-ը: 2012թ. մայիսի 31-ին ավստրիական Կուֆշտայն քաղաքում Հունաստանի հավաքականի հետ կայացած ընկերական խաղում Ռոման Բերեզովսկին 11մ 2 հարված հետ մղեց: 71-րդ րոպեին նա հաղթող դուրս եկավ Գիորգոս Սամարասի հետ մենամարտում, իսկ 86-րդ րոպեին հետ մղեց Յանիս Ֆետֆացիդիսի հարվածը: Իսկ նորամուտի խաղում՝ 1996թ. օգոստոսի 31-ին «Հրազդան» մարզադաշտում պորտուգալացիների հետ կայացած աշխարհի առաջնության ընտրական մրցախաղի 86-րդ րոպեին Օսեանուի հարվածից հետո գնդակը դիպել է դարպասաձողին:

Berz1

5.Մինչև Հայաստանի ազգային հավաքական հրավիրվելը Ռոման Բերեզովսկին պաշտպանել է երիտասարդական հավաքականի դարպասը: Նրա նորամուտը ՀՀ երիտասարդական հավաքականի կազմում կայացել է մեր ընտրանու պաշտոնական առաջին խաղում՝ 1994թ. սեպտեմբերի 6-ին Գենկ քաղաքում Բելգիայի հավաքականի հետ տեղի ունեցած Եվրոպայի երիտասարդական առաջնության ընտրական մրցախաղում:

25-րդ րոպեին տուգանային հրապարակում կանոնները խախտելու համար Բերեզովսկին հեռացվեց խաղադաշտից, իսկ նրան փոխարինած Արմեն Հովհաննիսյանն այդ խաղում 7 անպատասխան գնդակ ընդունեց իր պաշտպանած դարպասը:

1994-1995թթ. երիտասարդական հավաքականի կազմում անցկացրած ընտրական 8 հանդիպումներում Բերեզովսկին սեփական դարպասը 19 գոլ է ընդունել:

6.Ռոման Բերեզովսկին 20 մրցաշրջան (1996-2015թթ.) պաշտպանել է Հայաստանի ազգային հավաքականի դարպասը, որի կազմում անցկացրել է 93 խաղ, բաց թողել 155 գոլ: Այս ցուցանիշներով Բերեզովսկին զիջում է միայն հավաքականի բազմամյա ավագ Սարգիս Հովսեփյանին, ով 21 մրցաշրջան է (1992-2012թթ.) կրել ազգային ընտրանու մարզաշապիկը՝ մասնակցելով 132 խաղի:

7.Բերեզովսկու նորամուտը հավաքականում տեղի է ունեցել 1996թ. օգոստոսի 31-ին «Հրազդանում» պորտուգալացիների հետ կայացած աշխարհի առաջնության ընտրական մրցախաղում, որում դարպասն անառիկ է պահել: Հետաքրքիր զուգադիպությամբ հավաքականում իր վերջին խաղն էլ Բերեզովսկին անցկացրել է Պորտուգալիայի ընտրանու հետ 2015թ. հունիսի 13-ին Երևանում կայացած Եվրոպայի առաջնության ընտրական մրցախաղում: Այդ խաղում Բերեզովսկին Ռոնալդուի հարվածներից հետո ստիպված էր 3 անգամ գնդակը հանել ցանցից:

8.Ռոման Բերեզովսկին Հայաստանի ազգային հավաքականում անցկացրած 93 հանդիպումներից 20-ում խաղադաշտ է դուրս եկել ավագի թևկապով: Առաջին անգամ նա ավագի պարտականությունները կատարել է 2005թ. մարտի 26-ին Երևանում Անդորրայի հավաքականի հետ կայացած աշխարհի առաջնության ընտրական մրցախաղում, քանի որ հիմնական ավագը՝ Սարգիս Հովսեփյանը որակազրկման պատճառով բացակայում էր:

Ռոման Բերեզովսկին ՀՀ հավաքականի հիմնական ավագ դարձավ, երբ 2012թ. նոյեմբերի 14-ին Լիտվայի ընտրանու հետ ընկերական խաղում հավաքականին հրաժեշտ տված Սարգիս Հովսեփյանը ավագի թևկապը հանձնեց նրան:

9.Ռոման Բերեզովսկուն է պատկանում ընտրական մրցախաղերում դարպասն անընդմեջ անառիկ պահած րոպեների քանակով անխոցելիության ռեկորդը: 2014թ. աշխարհի առաջնության ընտրական մրցաշարում Բերեզովսկին 300 րոպե շարունակ գոլ բաց չի թողել:

2013թ. հունիսի 7-ին Երևանում Մալթայի հավաքականի հետ հանդիպման 8-րդ րոպեին Մայքլ Միֆսուդից բաց թողած գոլից հետո փորձառու դարպասապահը Դանիայի և Չեխիայի հավաքականների հետ ընտրական հանդիպումներում դարպասը պահեց անառիկ, ընդ որում չեխերի հետ խաղում վնասվածքի պատճառով փոխարինվեց  69-րդ րոպեին: Եվ միայն բուլղարացի Իվելին Պոպովին հաջողվեց ընդհատել Բերեզովսկու՝ դարպասն անառիկ պահած խաղերի շարքը՝ 61-րդ րոպեին գրավելով նրա դարպասը: Ընդհանուր առմամբ Բերեզովսկին 20 անգամ հավաքականում դարպասն անառիկ է պահել, ինչը ևս լավագույն արդյունքն է:

10.Ռոման Բերեզովսկին Հայաստանի ազգային հավաքականում հանդես եկած ամենատարեց ֆուտբոլիստն է: Ազգային ընտրանու կազմում 2015թ. հունիսի 13-ին պորտուգալացիների հետ անցկացրած իր վերջին խաղում Բերեզովսկին 40 տարեկան 312 օրական էր: Նա նաև Եվրո-2016-ի ընտրական մրցաշարի ամենատարեց ֆուտբոլիստն էր:

 


Արմեն Համբարձումյան. «Իմ առջև նպատակ եմ դրել ամրապնդվելու Հայաստանի հավաքականում»

Դավիթ Յուրչենկոն ու ևս 15 ֆուտբոլիստ հրավիրվել են Հայաստանի ազգային հավաքական

FAF-ը հրավիրում է միանալու ուղևորությանը և աջակցելու Հայաստանի հավաքականին Չեռնոգորիայում

ՀՖՖ-ն նվազեցրել է տոմսերի գները Հայաստանի հավաքականի առաջիկա ընկերական խաղի համար

Իրանի փոխչեմպիոն Հրայր Մկոյանը և ՀՖՖ-Դավիթ Յուրչենկո երկխոսությունը. Օրվա գլխավոր լուրերի քրոնիկոնը

Դեյան Ստանկովիչ. «Շատ տպավորված եմ Հայաստանի հավաքականի ցուցադրած խաղից»

7 տարի անց Բրազիլիայի հավաքականը գլխավորեց ՖԻՖԱ-ի դասակարգման աղյուսակը

Հովհաննես Համբարձումյանի վնասվածքը լուրջ չէ

Գևորգ Ղազարյանը բժշկական հետազոտություն է անցնում

Վլադիմիր Ֆոմիչև. «Եթե Մխիթարյանը չլիներ, ապա Ղազախստանի հավաքականը պարտավոր էր հաղթել ներկայիս Հայաստանի թիմին»

8 տարի առաջ այս օրը, Հենրիխ Մխիթարյանը խփեց իր առաջին գոլը Հայաստանի հավաքականի կազմում (տեսանյութ)

Ինչպես է ողջ Հանրապետականը բացականչում «ՀԵՆՈ» (տեսանյութ)

Սերգեյ Մալիյ. «Միայն ես եմ մեղավոր Հայաստանի հավաքականից կրած պարտության համար»

Տարոն Ոսկանյան. «Ղազախները կարմիր քարտ ստացան մեր հավաքականի ջանքերի շնորհիվ»

Արաս Օզբիլիս. «Խաղում ենք երկրպագուների համար և սիրում ենք նրանց» (տեսանյութ)

Գաել Անդոնյան. «Անցյալի սխալների փոխարեն մտածում եմ հաջողակ ապագայի մասին» (տեսանյութ)