Արթուր Սարկիսով

17.04.2017

Հայաստանի հավաքականի արդյունավետ հարձակվողները և Մկոյանի վերադարձը. Օրվա գլխավոր լուրերի քրոնիկոնը (տեսանյութ)

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք ապրիլի 17-ի իրադարձությունների քրոնիկոնը: Ռուսաստանի ֆուտբոլային լիգայի 32-րդ տուրում «Ենիսեյը» հյուրընկալվելիս 2-1 հաշվով առավելության է հասել «Մորդովիայի» նկատմամբ: Արթուր Սարկիսովը հիմնական ժամանակի վերջին րոպեին հաղթանակ է պարգևել իր թիմին: Նա փոխարինման էր մտել 54-րդ րոպեին: «Ենիսեյը» եզրափակում է լավագույն քառյակը: Ռուսաստանի ֆուտբոլային լիգայի 32-րդ տուրում «ԲՄԱ-Խաբարովսկը» սեփական հարկի տակ նվազագույն հաշվով պարտության է մատնել «Զենիթ-2»-ին: Ռուսլան Կորյանը հաղթական գոլը հեղինակել է 89-րդ րոպեին՝ հստակորեն իրացնելով 11-մետրանոցը: Կորյանը փոխարինվել է ավելացված առաջին րոպեին: «ԲՄԱ-Խաբարովսկը» 3-րդ հորիզոնականում է: Իրանի Բարձրագույն խմբի առաջնության 27-րդ տուրում «Էսթեղլալը» հյուրընկալել է «Սաբ Աիհանին» և առավելության հասել 2-1 հաշվով: Հրայր Մկոյանը երկարատև ընդմիջումից հետո խաղադաշտ է մտել մեկնարկային կազմում և փոխարինվել 80-րդ րոպեին: «Էսթեղլալը» զբաղեցնում է 2-րդ հորիզոնականը: Իրանի Բարձրագույն խմբի առաջնության 27-րդ տուրում «Փեյքանը» սեփանական հարկի տակ 1-2 հաշվով զիջել է «Զոբ Ահանին»: Լևոն Հայրապետյանը եղել է հիմնական կազմում և փոխարինվել 67-րդ րոպեին: «Փեյքանը» բաժանում է 6-7-րդ հորիզոնականները: Ռուսաստանի 2-րդ դիվիզիոնի Հարավային գոտու մրցաշարի 23-րդ տուրում «ՍԿԱ»-ն սեփական հարկի տակ նվազագույն հաշվով հաղթել է «Բիոլոգին»: Հաղթական գոլը 79-րդ րոպեին հեղինակել է Արտյոմ Գևորգյանը, ով փոխարինվել է 90-րդ րոպեին: «ՍԿԱ»-ն 9-րդ հորիզոնականում է: Մոլդովայի առաջնության 26-րդ տուրում «Զիմբրուն» հյուրընկալվելիս մրցել է «Դաչիայի» հետ և պարտություն կրել 1-3 հաշվով: Արտյոմ Խաչատուրովը փոխարինման է մտել 60-րդ րոպեին: «Զիմբրուն» եզրափակում է լավագույն հնգյակը: Լեհաստանի 2-րդ դիվիզիոնի 26-րդ տուրում «Բելհատուվը» հյուրընկալվելիս գոլազուրկ ոչ-ոքի է խաղացել Ստալև-Վոլի «Ստալի» հետ: Աղվան Պապիկյանը մասնակցել է ամբողջ հանդիպմանը: «Բելհատուվը» կիսում է 9-10-րդ տեղերը: Լյուքսեմբուրգի գավաթի խաղարկության քառորդ եզրափակչում «Վիկտորիա Ռոսպորտը» մրցակցի հարկի տակ 0-2 հաշվով պարտվել է «Ֆոլոյ Էշին»: Ալեքսանդր Կարապետյանն ամբողջական խաղ է անցկացրել: «Վիկտորիա Ռոսպորտը» դուրս է մնացել հետագա պայքարից: Ֆրանսիայի 5-րդ դիվիզիոնի 22-րդ տուրում «Լիմոժը» մրցակցի հարկի տակ 3-0 հաշվով հաղթել է «Բրեսյուիրին»: Արթուր Թորոյանը մասնակցել է ամբողջ խաղին: «Լիմոժը» գլխավորում է մրցաշարային աղյուսակը:
12.04.2017

Մոսկվայի «Արարատի» առաջին հաղթանակը և Դավիթ Մանոյանի վերադարձը խաղադաշտ. Օրվա գլխավոր լուրերի քրոնիկոնը (տեսանյութ)

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք ապրիլի 12-ի իրադարձությունների քրոնիկոնը: Հայաստանի գավաթի խաղարկության կիսաեզրափակիչ փուլում կայացալ է երկրորդ զույգի առաջին հանդիպումը: «Գանձասար-Կապանը» «Հանրապետական» մարզադաշտում մրցել է «Շիրակի» հետ: 44-րդ րոպեին գյումրեցիներին հաղթանակ է պարգևել «Արարատի» նախկին կիսապաշտպան Ումարու Կաինան: Ապրիլի 12-ին պաշտոնական այցով Հայաստանում է եղել ՈՒԵՖԱ-ի նախագահ Ալեքսանդր Չեֆերինը: Նա ՀՖՖ նախագահ Ռուբեն Հայրապետյանի հետ ուղևորվել է Վաղարշապատ, որտեղ իրականացրել են Վաղարշապատի ֆուտբոլի ակադեմիայի հիմնարկեքի խորհրդանշական արարողությունը: Նրանք նաև շրջայց են կատարել Երևանի ֆուտբոլի ակադեմիայում: Հենրիխ Մխիթարյանը «Մանչեսթեր Յունայթեդի» պատվիրակության կազմում մեկնել է Բելգիա, որտեղ Եվրոպայի Լիգայի գավաթի խաղարկության քառորդ եզրափակչի շրջանակներում Ժոզե Մոուրինյոյի թիմն ապրիլի 13-ին հյուրընկալվելու է «Անդերլեխտին»: Ռուսաստանի 3-րդ դիվիզիոնի «Մոսկվա» շրջանի մրցաշարի 1-ին տուրում «Արարատը» սեփական հարկի տակ 1-0 հաշվով հաղթել է «Զելենոգրադին»: Միակ գնդակը հեղինակել է Աբդուլին Սուլեյմանը: http://www.vivaronews.am/ararat-akumbi-haytacucakeh-orov-thimeh-kxagha-rusastani-3-rd-divizionum Կիպրոսի Բարձրագույն խմբի առաջնության 31-րդ տուրում «Կարմիոտիսան» հյուրընկալվելիս 2-3 հաշվով պարտություն է կրել «Արիսից»: Տարոն Ոսկանյանը մասնակցել է ամբողջ խաղին և ստացել դեղին քարտ, իսկ Դավիթ Մանոյանը վնասվածքից ապաքինվելուց հետո վերադարձել է խաղադաշտ՝ փոխարինման մտնելով 72-րդ րոպեին: Էդգար Մանուչարյան. «Գիտեի, որ Հայաստանի հավաքականի մարզչական շտաբը վստահում է ինձ: Մինչ վերջին խաղը չէի հրավիրվում, որովհետև խաղային պրակտիկա չունեի: Դուրս գալ «Մունդիալի» եզրափակիչ փո՞ւլ. ամեն բան մեզնից է կախված: Մենք սեփական հարկի տակ կարող ենք հաղթել բոլորին»: http://www.vivaronews.am/edgar-manucharyan-hayastani-havakhakaneh-sephakan-dashtum-karogh-e-haghthel-bolorin Ռուսաստանի ֆուտբոլային լիգայի 31-րդ տուրում «ԲՄԱ-Խաբարովսկը» հյուրընկալվելիս գոլազուրկ ոչ-ոքիով է ավարտել «Բալթիկայի» հետ հանդիպումը: Ռուսլան Կորյանը մասնակցել է ամբողջ մրցավեճին՝ ստանալով դեղին քարտ: «ԲՄԱ-Խաբարովսկը» եզրափակում է լավագույն եռյակը: Հենրիխ Մխիթարյանը՝ «Բորուսիայի» ավտոբուսի շրջակայքում տեղի ունեցած պայթյունի մասին. «Ցնցված եմ տեղի ունեցած միջադեպից: Աջակցում եմ նախկին ակումբիս, երկրպագուներին, իսկ Մարկ Բարտրային մաղթում եմ շուտափույթ ապաքինում»: Ռուսաստանի ֆուտբոլային լիգայի 31-րդ տուրում «Ենիսեյը» սեփական հարկի տակ 3-2 հաշվով պարտության է մատնել «Սիբիրին»: Արթուր Մալոյանը մնացել է պահեստայինների նստարանին, իսկ Արթուր Սարկիսովը խաղ է բաց թողել մրսածության պատճառով: «Ենիսեյը» 6-րդ տեղում է: Ռուսաստանի ֆուտբոլային լիգայի 31-րդ տուրում «Ֆակելը» հյուրընկալվելիս 1-2 հաշվով պարտություն է կրել «Սոկոլից»: Արթուր Առուստամյանը խաղադաշտ է մտել 69-րդ րոպեին: «Ֆակելը» եզրափակում է լավագույն հնգյակը:
08.04.2017

Կապանյան թիմի 5-րդ անընդմեջ հաղթանակը և Ռուսլան Կորյանի գոլը. Հայկական ֆուտբոլի գլխավոր լուրերի քրոնիկոնը (տեսանյութ)

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք ապրիլի 8-ի իրադարձությունների քրոնիկոնը: Հայաստանի Բարձրագույն խմբի առաջնության 22-րդ տուրի վերջին խաղում «Գանձասար-Կապանը» 2-1 հաշվով առավելության է հասել «Արարատի» նկատմամբ: Կապանյան թիմից գոլի հեղինակ են դարձել Գեղամ Հարությունյանը և Կլաուդիր Մարինին, իսկ «Արարատից» միակ պատասխան գնդակը խփել է Անդրանիկ Քոչարյանը: Կապանցիներն այժմ կրկին առաջնության առաջատարն են՝ 42-ական միավոր ունենալով «Ալաշկերտի» հետ: Կիպրոսի Բարձրագույն խմբի առաջնության 30-րդ տուրում «Կարմիոտիսան» սեփական հարկի տակ 2-0 հաշվով հաղթել է «ՆԵԱ Սալամիսին»: Դավիթ Մանոյանը, ով վերջերս է ապաքինվել վնասվածքից, մնացել է պահեստայինների նստարանին, իսկ Տարոն Ոսկանյանը մասնակցել է ամբողջ հանդիպմանը: Ռուսաստանի Ֆուտբոլային լիգայի 30-րդ տուրում «Ենիսեյը» հյուրընկալվելիս 2-ական գնդակ է փոխանակել «Խիմկիի» հետ: Արթուր Սարկիսովը եղել է հիմնական կազմում և փոխարինվել 85-րդ րոպեին, իսկ Արթուր Մալոյանը փոխարինման է մտել 87-րդ րոպեին: «Ենիսեյը» 7-րդ հորիզոնականում է: Ուկրաինայի Պրեմիեր լիգայի 24-րդ տուրում «Ստալը» 2-0 հաշվով առավելության է հասել «Վոլինի» նկատմամբ: Էդգար Մալաքյանը խաղադաշտը լքել է 66-րդ րոպեին, իսկ Գոռ Մալաքյանը չի հայտնվել հայտացուցակում: «Ստալը» 8-րդ հորիզոնականում է: Ռուսաստանի Ֆուտբոլային լիգայի 30-րդ տուրում «ԲՄԱ-Խաբարովսկը» սեփական հարկի տակ 2-3 հաշվով պարտվել է «Դինամո Մ»-ին: Ռուսլան Կորյանը մասնակցել է երկրորդ խաղակեսին և 88-րդ րոպեին 11-մետրանոցից կրճատել հաշվի տաբերությունը: «ԲՄԱ-Խաբարովսկը» եզրափակում է լավագույն եռյակը: Գերմանիայի Մ-19 Բունդեսլիգայի Արևմտյան գոտու 23-րդ տուրում «Բոխում Մ-19»-ը սեփական հարկի տակ 1-1 հաշվով է ավարտել «Վիկտորիայի» հետ մրցավեճը: Հայկ Գալստյանը մասնակցել է ամբողջ խաղին: «Բոխում Մ-19»-ը 4-րդ հորիզոնականում է:
02.04.2017

«Փյունիկի» հաղթանակը Գյումրիում, Հովհաննիսյանի գոլը, Պապիկյանի դուբլը. Հայկական ֆուտբոլի գլխավոր լուրերի քրոնիկոնը (տեսանյութ)

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք ապրիլի 1-ի իրադարձությունների քրոնիկոնը: Ավարտվել է Հայաստանի Բարձրագույն խմբի առաջնության 21-րդ տուրը: «Փյունիկը» Գյումրիում 2 անպատասխան գնդակ է ուղարկել «Շիրակի» դարպասը: Արտակ Օսեյանի թիմին առաջին խաղակեսում խփած գոլերի շնորհիվ հաղթանակ են պարգևել Արթուր Քարտաշյանը և Պետրոս Ավետիսյանը (11մ): Հունաստանի Սուպերլիգայի 26-րդ տուրում «Վերիյան» հյուրընկալվելիս 1-3 հաշվով պարտություն է կրել «Լևադիակոսից»: Գաել Անդոնյանը մնացել է պահեստայինների նստարանին: Բելառուսի առաջնության մեկնարկային տուրում «Տորպեդո-Բելազը» սեփական հարկի տակ 2-1 հաշվով առավելության է հասել «Իսլոչի» նկատմամբ: Կամո Հովհաննիսյանը և Անդրեյ Խաչատուրյանը մասնակցել են ամբողջ խաղին: Հովհաննիսյանը 51-րդ րոպեին դարձել է գոլի հեղինակ՝ հավասարեցնելով հաշիվը: Անգլիայի Պրեմիեր լիգայի 30-րդ տուրում «Մանչեսթեր Յունայթեդը» գոլազուրկ ոչ-ոքի է գրանցել «Վեստ Բրոմվիչի» հետ մրցավեճում: Հենրիխ Մխիթարյանը փոխարինվել է 74-րդ րոպեին: Ֆրանսիայի 2-րդ դիվիզիոնի 31-րդ տուրում «Ռեյմսը» հյուրընկալվելիս մեկական գնդակ է փոխանակել «Հավրի» հետ: Միշել Տեր-Զաքարյանի գլխավորած թիմն ընթանում է 4-րդ հորիզոնականում: Կիպրոսի առաջնության 26-րդ տուրում «Կարմիոտիսան» մրցակցի հարկի տակ 0-3 հաշվով զիջել է «Դոկսային»: Տարոն Ոսկանյանը մնացել է պահեստայինների նստարանին, իսկ Դավիթ Մանոյանը վնասվածքի պատճառով հայտավորված չէր խաղին: Հունաստանի Սուպերլիգայի 26-րդ տուրում «Քսանտին» հյուրընկալվելիս մեկական գնդակ է փոխանակել «Յանինայի» հետ: Մարկոս Պիզելին խաղադաշտ է դուրս եկել 56-րդ րոպեին: «Քսանտին» 6-րդ հորիզոնականում է: Լեհաստանի 2-րդ դիվիզիոնի 24-րդ տուրում «Բելհատուվը» հյուրընկալվելիս 2-1 հաշվով պարտության է մատնել «Օլիմպիային»: Աղվան Պապիկյանը մասնակցել է ամբողջ հանդիպմանը՝ դառնալով դուբլի հեղինակ: «Բելհատուվը» 10-րդ հորիզոնականում է: Ռուսաստանի ֆուտբոլային լիգայի 25-րդ տուրում «Ենիսեյը» սեփական դաշտում 3-1 հաշվով հաղթել է «ԲՄԱ-Էներգիային»: «Ենիսեյից» Արթուր Սարկիսովը խաղադաշտ է մտել ընդմիջումից անմիջապես հետո, Արթուր Մալոյանը մնացել է պահեստայինների նստարանին, իսկ «ԲՄԱ»-ից Ռուսլան Կորյանը փոխարինման է մտել 89-րդ րոպեին: «ՍԿԱ»-ն 3-րդ տեղում է, «Ենիսեյը»՝ 6-րդ:
27.03.2017

Արթուր Սարկիսով. «Անգամ եթե կարմիր քարտ չլիներ, մեր ճնշումը կտար իր արդյունքը» (տեսանյութ)

Հայաստանի հավաքականի հարձակվող Արթուր Սարկիսովը Ղազախստանի հետ խաղից հետո (2-0) պատասխանել է լրագրողների հարցերին. - Արթուր, ինչպե՞ս կգնահատեք խաղը: - Բավականին ծանր խաղ ստացվեց, մրցակիցը պրեսինգ էր անում: Բայց մենք պատրաստվել էինք դրան ու կատարեցինք այն, ինչ հանձնարարել էին մարզիչները, դրա համար էլ արդյունք ստացանք: - Ինչպե՞ս փոխեց խաղի ընթացքը մրցակցի ստացած կարմիր քարտը: - Դե, իհարկե, միշտ ավելի հեշտ է խաղալ 9 խաղացողի դեմ: Բայց մենք առանց այդ էլ ճնշում էինք, ու կարծում եմ՝ մեր ճնշումը կտար իր արդյունքը, ուղղակի այսպես ավելի հեշտ ստացվեց: - Միշտ չէ, որ ստացվում էր եզրափակել պահերը, ի՞նչն էր պատճառը:  - Դե, որովհետև սա ֆուտբոլ է: Միշտ չէ, որ ստացվում է, բայց մենք աշխատում էինք, պահեր էինք ստեղծում: Կարևորն այն է, որ պահեր կային, իսկ գոլերը եկան երկրորդ կեսում:  
26.03.2017

Հայաստան – Ղազախստան. Հայաստանի հավաքականի ֆուտբոլիստների գնահատականները

Ինչպես հայտնի է 2018 թվականի աշխարհի առաջնության ընտրական փուլի՝ Հայաստան - Ղազախստան մրցավեճում հայ ֆուտբոլիստները հաղթանակ են տոնել 2-0 հաշվով: Արթուր Պետրոսյանի թիմին հաղթանակ են պարգևել Հենրիխ Մխիթարյանը և Արաս Օզբիլիսը: VivaroNews.am-ը 10 բալանոց համակարգով գնահատել է մեր ընտրանու ֆուտբոլիստների ելույթները: Արսեն Բեգլարյան - 8 Շատ աշխատանք չունեցավ կատարելու: Հյուրերն առաջին խաղակեսում 1-2 հեռահար հարված կատարեցին, որոնք մեծ վտանգ չէին պարունակում: Համենայն դեպս, այս դիրքի ֆուտբոլիստի համար առաջնայինը գոլ բաց չթողնելն է, որն էլ Արսենը կարողացավ անել: Լևոն Հայրապետյան - 7 Շատ հաճախ էր ձախ եզրից միանում գրոհներին և որոշ դեպքերում չէր հասցնում պաշտպանվել: Նրան նախ ապահովագրում էր Տիգրան Բարսեղյանը, ապա Էդգար Մանուչարյանը: Հատկապես երկրորդ կեսում հյուրերը հաճախ էին գրոհում նրա եզրից և վտանգավոր պահեր ստեղծում: Բարեբախտաբար, դրանք բաց թողած գոլերով չավարտվեցին: Գաել Անդոնյան - 7,5 Հավաքականում նախորդ ոչ տպավորիչ ելույթներից հետո Անդոնյանը երեկ շատ ավելի վստահ տեսք ուներ: Ճիշտ է, թերացումներ դեռ կան, հատկապես օդային պայքարում: Բայց պետք է նաև նշել, որ մրցակիցն էլ առանձնակի լուրջ խնդիրներ չառաջադրեց մեր պաշտպանությանը: Վարազդատ Հարոյան - 8 Համակարգում էր ամբողջ պաշտպանության գործողությունները: Գնալով ավելի վստահ խաղ է ցուցադրում: Հուսանք՝ ավելի ուժեղ հարձակման գիծ ունեցող թիմերի հետ հանդիպումներում էլ նույնկերպ հաջող կգործի: Տարոն Ոսկանյան - 8 Իրեն ոչ հոգեհարազատ՝ աջ պաշտպանի դիրքում էր և բավականին հաճախ էր միանում գրոհներին: Ճիշտ է, ոչ բոլոր դեպքերում էին այդ միացումներն արդյունավետ, բայց անընդհատ շարժման մեջ էր: Համենայն դեպս, մրցակիցը նրա եզրից ակտիվություն գրեթե չէր ցուցաբերում: Գոռ Մալաքյան - 8 Գոռը խաղ առ խաղ ավելացնում է և երեկ էլ իրեն վստահ էր զգում հենակետային գոտում: Պետք է հաշվի առնել, որ, բացի նրանից, մնացած բոլոր կիսապաշտպանները հարձակվողական ոճի էին, ուստի պաշտպաններին օգնելու գրեթե ամբողջ բեռը Գոռի ուսերին էր: Հուսալի կատարեց իր պարտականությունները: Կամո Հովհաննիսյան - 8 Ինչպես ակումբում, հավաքականում էլ այս անգամ խաղաց կիսապաշտպանության աջ եզրում: Ինչպես միշտ, անչափ ակտիվ էր, մասնակցում էր թե՛ հարձակմանը, թե՛ պաշտպանությանը: Գոլային փոխանցում կատարեց Արաս Օզբիլիսին: Կամոյի ֆուտբոլային զարգացումն ընթանում է սահուն քայլերով: Մարկոս Պիզելի -7,5 Բավական ակտիվ էր հատկապես առաջին խաղակեսում: 30-րդ րոպեին հիանալի հնարավորություն ուներ հաշիվը բացելու, բայց բարձր հարվածեց: Տպավորություն կար, որ թիմակիցների համեմատ ավելի դանդաղ է գործում: Փոխարինվեց երկրորդ կեսի սկզբնամասում: Գևորգ Ղազարյան - առանց գնահատականի Ընդամենը 32 վայրկյան անցկացրեց խաղադաշտում և, ցավալի վնասվածք ստանալով, լքեց խաղադաշտը: Նա կարող էր մեծ օգուտ տալ թիմին, բայց... Առողջություն Գևորգին: Հենրիխ Մխիթարյան - 9 Հավաքականի ավագը հաճախ էր խաղը վերցնում իր վրա ու փորձում էր թիմակիցներին իր հետևից տանել: Հատկապես երկրորդ կեսում իրեն բնորոշ ակտիվ, նախաձեռնողական ֆուտբոլ ցուցադրեց: Եվ որն ամենակարևորն է՝ 73-րդ րոպեին բացեց հաշիվը և դրեց թիմի հաղթանակի սկիզբը: Արթուր Սարկիսով - 6,5 Անընդհատ շարժվում էր, փորձում ազատվել պաշտպանների հսկողությունից և գնդակ ստանալ, բայց գրեթե ոչինչ չէր ստացվում: Արթուրի լավագույն խաղը չէր հավաքականի կազմում: Փոխարինվեց խաղավարտից 20 րոպե առաջ: Փոխարինման մտած ֆուտբոլիստներ՝ Տիգրան Բարսեղյան - 7,5 Փոխարինման մտավ խաղասկզբից արդեն վայրկյաններ անց և խաղում էր իր համար ոչ այդքան հոգեհարազատ ձախ կիսապաշտպանի դիրքում: Բավական ակտիվ էր, իր արագաշարժության հաշվին հաճախ էր գնդակ ստանում և ուներ 2-3 գոլային հնարավորություն: Տիգրանն ապագայում մեծ օգուտ կտա հավաքականին, երբ ավելի լավ համագործակցի թիմակիցների հետ: Էդգար Մանուչարյան - 8 Փոխարինման մտավ երկրորդ խաղակեսում և հանդես էր գալիս ենթահարձակվողի դիրքում: Մասնակցություն ունեցավ երկու գոլային գրոհներին: Հաջողված փոփոխություն էր Արթուր Պետրոսյանի կողմից: Էդգարն ավելի մեծ օգուտ կտա հավաքականին, երբ ավելի լավ մարզավիճակ հավաքի: Արաս Օզբիլիս - 9 Շատերը կասկածներ ունեին նրա մարզավիճակի վերաբերյալ և վստահ էին, որ արժանի չէ խաղադաշտ դուրս գալու: Բայց նա մտավ փոխարինման և գեղեցիկ հարվածով կրկնապատկեց հաշիվը: Փաստերը խոսուն են: Ֆուտբոլիստը խաղաց կարճ, բայց՝ արդյունավետ: Հ. Գ. Ինչ խոսք, մեր հավաքականն առաջին գոլը խփեց միայն այն բանից հետո, երբ մրցակիցը մնաց 10 հոգով: Բայց պետք է հասկանալ, որ այդ կարմիր քարտը հենց հայ ֆուտբոլիստների ճնշման արդյունքում էր, որը ղազախներին այլ ելք չէր թողնում, ուստի պարտվող թիմի կողմից հեռացումը չի կարող որպես պատճառաբանություն ընդունվել: Շարունակենք մնալ մեր հավաքականի կողքին...
20.03.2017

Հենրիխ Մխիթարյանը, Գևորգ Ղազարյանը, Մարկոս Պիզելին և այլ ֆուտբոլիստներ հավաքականին կմիանան վաղը

Ինչպես տեղեկացնում է Հայաստանի ֆուտբոլի ֆեդերացիայի պաշտոնական էջը, մարտի 20-ին Հայաստանի ազգային հավաքականն սկսել է  նախապատրաստությունը մարտի 26-ին կայանալիք Հայաստան-Ղազախստան հանդիպմանը: Այսօր կայացած վերականգնողական թեթև մարզմանը մասնակցել են 16 ֆուտբոլիստ: Մյուս ֆուտբոլիստները՝ Կամո Հովհաննիսյանը, Ռուսլան Կորյանն ու Արթուր Սարկիսովը, հավաքականին կմիանան այսօր երեկոյան, Տարոն Ոսկանյանը, Հենրիխ Մխիթարյանը, Գևորգ Ղազարյանը, Մարկոս Պիզելլին՝ մարտի 21-ին, իսկ Արտյոմ Սիմոնյանը՝ մարտի 22-ին: http://www.vivaronews.am/arthur-petrosyaneh-hraparakec-azgayin-havakhakani-verjnakan-haytacucakeh
20.03.2017

«Փյունիկի» վստահ հաղթանակը և Մխիթարյանի բացակայությունը. Հայկական ֆուտբոլի գլխավոր լուրերի քրոնիկոնը (տեսանյութ)

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք մարտի 19-ի իրադարձությունների քրոնիկոնը: Ավարտվել է Հայաստանի Բարձրագույն խմբի առաջնության 20-րդ տուրը: Վերջին խաղում «Բանանցը» հյուրընկալել է «Փյունիկին» և պարտվել 0-3 հաշվով: Հաջողության են հասել Կարեն Հայրապետյանը, Վարդան Պողոսյանը (11մ) և փոխարինման դուրս եկած Արմեն Նահապետյանը: Անգլիայի Պրեմիեր լիգայի 29-րդ տուրում «Մանչեսթեր Յունայթեդը» մրցակցի հարկի տակ 3-1 հաշվով առավելության է հասել «Միդլսբրոյի» նկատմամբ: Հենրիխ Մխիթարյանը մնացել է պահեստայինների նստարանին: Մանկունյական թիմն ընթանում է 5-րդ հորիզոնականում: Պորտուգալիայի առաջնության 26-րդ տուրում «Մարիտիմուն» սեփական հարկի տակ 3-1 հաշվով հաղթել է «Արոկային»: Գևորգ Ղազարյանը խաղադաշտ է դուրս եկել 86-րդ րոպեին: «Մարիտիմուն» 6-րդ հորիզոնականում է: Հունաստանի Սուպերլիգայի 25-րդ տուրում «Քսանտին» հյուրընկալել է «Լևադիակոսին» և փոխանակել 2-ական գնդակ: Մարկոս Պիզելին փոխարինման է դուրս եկել 60-րդ րոպեին: «Քսանտին» 6-րդ տեղում է: Բելառուսի գավաթի խաղարկության քառորդ եզրափակչի պատասխան խաղում «Տորպեդո-Բելազը» հյուրընկալվելիս 0-2 հաշվով պարտվել է «Սլուցկին» և, երկու խաղերի արդյունքում զիջելով 1-2 հաշվով, դուրս մնացել հետագա պայքարից: Կամո Հովհաննիսյանը խաղադաշտ է դուրս եկել 59-րդ րոպեին, իսկ Անդրեյ Խաչատուրյանը մասնակցել է ամբողջ խաղին: Ուկրաինայի Պրեմիեր լիգայի 22-րդ տուրի «Զարյան» հյուրընկալվելիս նվազագույն հաշվով հաղթել է «Վոլինին»: Գեղամ Կադիմյանը խաղադաշտ է մտել 76-րդ րոպեին: «Զարյան» եզրափակում է լավագույն եռյակը: Ռուսաստանի ֆուտբոլային լիգայի (2-րդ դիվիզիոն) 27-րդ տուրում «ԲՄԱ-Խաբարովսկը» հյուրընկալվելիս 0-1 հաշվով պարտություն է կրել «Շիննիկից»: Ռուսլան Կորյանն անցկացրել է ամբողջական հանդիպում: «ԲՄԱ-Խաբարովսկը» գտնվում է 3-րդ տեղում:
12.03.2017

Համբարձումյանի գոլային փոխանցումները և Անդոնյանի կարմիր քարտը. Հայկական ֆուտբոլի գլխավոր լուրերի քրոնիկոնը (տեսանյութ)

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք մարտի 12-ի իրադարձությունների քրոնիկոնը: Ավարտվել է Հայաստանի Բարձրագույն խմբի առաջնության 19-րդ տուրը: Կենտրոնական խաղում չեմպիոն «Ալաշկերտը» 3-0 հաշվով վստահ հաղթանակ է տոնել առաջատար «Շիրակի» նկատմամբ՝ նրանից միավորների տարբերությունը հասցնելով մեկի: Դեռ առաջին խաղակեսում աչքի են ընկել Արտակ Եդիգարյանը, Արտակ Դաշյանը և Ուրոշ Նենադովիչը: Ընթացքի մեջ է Ուկրաինայի Պրեմիեր լիգայի «Զարյա» - «Շախտյոր» հանդիպումը: Գեղամ Կադիմյանը հայտավորված է իր թիմի պահեստայինների նստարանին: Հունաստանի Սուպերլիգայի 24-րդ տուրում «Վերիյան» հյուրընկալվելիս 0-1 հաշվով պարտվել է «Պլատանիասին»: Գաել Անդոնյանը խաղադաշտից հեռացվել է 23-րդ րոպեին: «Վերիյան» 16-րդ հորիզոնականում է ընթանում: Ռուսաստանի Պրեմիեր լիգայի 19-րդ տուրում Մոսկվայի «Սպարտակը» սեփական հարկի տակ 1-0 հաղթել է «Անժիին»: Ալեքսանդր Գրիգորյանի գլխավորած թիմն ընթանում է 11-րդ հորիզոնականում: Հունաստանի Սուպերլիգայի 24-րդ տուրում «Քսանտին» հյուրընկալվելիս նվազագույն հաշվով պարտվել է «Կերկիրային»: Մարկոս Պիզելին խաղադաշտ է դուրս եկել 74-րդ րոպեին: «Քսանտին» 5-րդ տեղում է: Կիպրոսի առաջնության վտանգավոր գոտում գտնվող թիմերի պայքարի 1-ին տուրում «Կարմիոտիսան» սեփական հարկի տակ 5-3 հաշվով հաղթել է «Էտնիկոսին»: Տարոն Ոսկանյանը մասնակցել է ամբողջ խաղին՝ ստանալով դեղին քարտ, իսկ Դավիթ Մանոյանը վնասվածքի պատճառով չի ընդգրկվել հայտացուցակում: Մակեդոնիայի առաջնության 22-րդ տուրում «Վարդարը» սեփական հարկի տակ 2 անպատասխան գնդակ է ուղարկել «Բրեգալնիցայի» դարպասը: Հովհաննես Համբարձումյանը 88-րդ և 90-րդ րոպեներին դարձել է 2 գոլային փոխանցման հեղինակ: Նա մասնակցել է ամբողջ խաղին, իսկ Տիգրան Բարսեղյանը խաղացել է մեկ խաղակես՝ ստանալով դեղին քարտ: «Վարդարն» 1-ին հորիզոնականում է: Ռուսաստանի ազգային լիգայի 26-րդ տուրում «Ֆակելը» հյուրընկալվելիս գոլազուրկ ոչ-ոքիով է ավարտել «Խիմկիի» հետ հանդիպումը: Արթուր Առուստամյանը խաղադաշտ է դուրս եկել 82-րդ րոպեին: «Ֆակելը» 5-րդ հորիզոնականում է: Ղազախստանի Պրեմիեր լիգայի 2-րդ տուրում «Աստանան» հյուրընկալվելիս մեկական գնդակ է փոխանակել «Իրտիշի» հետ: Գևորգ Նաջարյանը մնացել է պահեստայինների նստարանին: «Աստանան» 11-րդ հորիզոնականում է:
10.03.2017

«Փյունիկի» «չոր» հաղթանակը և նոր ակումբներ ՀՀ առաջնությունում. Հայկական ֆուտբոլի գլխավոր լուրերի քրոնիկոնը

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք մարտի 10-ի իրադարձությունների քրոնիկոնը: Ռուսաստանի Պրեմիեր լիգայի 19-րդ տուրում «Ուրալը» հյուրընկալվելիս 0-2 հաշվով պարտվել է Տուլայի «Արսենալին»: Էդգար Մանուչարյանը փոխարինման է դուրս եկել 61-րդ րոպեին: «Ուրալը» 12-րդ հորիզոնականում է: Մեկնարկել է Հայաստանի Բարձրագույն խմբի առաջնության 19-րդ տուրը: «Փյունիկը» սեփական հարկի տակ 3-0 հաշվով պարտության է մատնել «Արարատին»: Աչքի են ընկել Գևորգ Հարությունյանը, Ռազմիկ Հակոբյանը և Արթուր Նադիրյանը: Բուլղարիայի Բարձրագույն խմբի առաջնության 24-րդ տուրում Պլովդիվի «Լոկոմոտիվը» մրցակցի հարկի տակ մեկական գնդակ է փոխանակել «Դունավի» հետ: Էդուարդ Երանոսյանը «Լոկոմոտիվի» գլխավոր մարզիչն է: Թիմն ընթանում է 4-րդ հորիզոնականում: Նորվեգական «Օսանեն» սեփական հարկի տակ ընկերական խաղում 1-1 հաշվով է ավարտել «Արենդալի» հետ հանդիպումը: Դավիթ Մկրտչյանը փոխարինվել է 74-րդ րոպեին: Եվրոպայի լիգայի գավաթի խաղարկության՝ շաբաթվա լավագույն ֆուտբոլիստի քվեարկությունում Հենրիխ Մխիթարյանը զբաղեցրել է երրորդ տեղը: ՈՒԵՖԱ-ի պաշտոնական կայքում անցկացված հարցմանը նա հավաքել է ձայների 23 տոկոսը: Փոխարենը, «Մանչեսթեր Յունայթեդի» ֆուտբոլիստն ընդգրկվել է տուրի խորհրդանշական հավաքականում: ՀՖՖ-ն արտոնագրել է հանձնել «Էրեբունի» և «Լոռի» ակումբներին՝ նրանց իրավունք ընձեռելով մասնակցելու ՀՀ Բարձրագույն խմբի 2017/2018 թթ. մրցաշրջանի առաջնությանը, որը մեկնարկելու է 2017 թվականի օգոստոսին: Արթուր Սարկիսով. ««Ենիսեյն» իմ ծառայություններով հետաքրքրված էր դեռ մրցաշրջանի մեկնարկին, բայց ես այն ժամանակ արդեն պայմանավորվել էի «Մորդովիայի» հետ, տվել էի բանավոր համաձայնություն ու չէի կարող մարդկանց հուսախաբ անել: «Ենիսեյի» ղեկավարները ձմռանը գործակալներիս հերթական առաջարկը կատարեցին, և այս անգամ ամեն ինչ բարեհաջող ավարտվեց»:
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: