Հոկեյ

20.03.2017

Մարզական ակումբների ամենահարուստ սեփականատերերի տասնյակը

Forbes-ը ներկայացրել է մարզական ակումբների ամենահարուստ սեփականատերերի տասնյակը: 1) Սթիվ Բալմեր, մաքուր ակտիվները՝ 30 միլիարդ դոլար, թիմը՝ «Լոս Անջելես Կլիպերս» (բասկետբոլ). 2) Մուկեշ Ամբանի, մաքուր ակտիվները՝ 23,2 միլիարդ դոլար, թիմը՝ «Մումբաի Ինդիանս» (կրիկետ). 3) Պոլ Ալեն, մաքուր ակտիվները՝ 19,9 միլիարդ դոլար, թիմերը՝ «Սիեթլ Սիհոկս» (ամերիկյան ֆուտբոլ), «Պորտլենդ Տրեյլ Բլեյզերս» (բասկետբոլ). 4) Դիտրիխ Մատեշից, մաքուր ակտիվները՝ 13,4 միլիարդ դոլար, թիմերը՝ «Նյու Յորք Ռեդ Բուլ» (ֆուտբոլ), «Ռեդ Բուլ Ռեյսինգ» և «Ակուդերիա Տորո Ռոսո» (ավտոարշավներ). 5) Ֆիլիպ Անշուտց, մաքուր ակտիվները՝ 12,5 միլիարդ դոլար, թիմերը՝ «Լոս Անջելես Լեյքերս» (բասկետբոլ), «Լոս Անջելես Գելաքսի» (ֆուտբոլ). 6) Հասսո Պլատներ(ազգականների հետ միասին), մաքուր ակտիվները՝ 11,2 միլիարդ դոլար, թիմը՝ «Սան Խոսե Շարկս» (հոկեյ). 7) Ռոման Աբրամովիչ, մաքուր ակտիվները՝ 9,1 միլիարդ դոլար, թիմը՝ «Չելսի» (ֆուտբոլ). 8) Միխայիլ Պրոխորով, մաքուր ակտիվները՝ 8,9 միլիարդ դոլար, թիմը՝ «Բրուքլին Նեթս» (բասկետբոլ). 9) Շահիդ Խան, մաքուր ակտիվները՝ 8,2 միլիարդ դոլար, թիմը՝ «Ջեքսոնվիլ Ջեգուարս» (ամերիկյան ֆուտբոլ). 10) Միկի Արիսոն, մաքուր ակտիվները՝ 8,1 միլիարդ դոլար, թիմը՝ «Մայամի Հիթ» (բասկետբոլ).
02.03.2017

Սամվել Զախարյան. «Հաջորդ տարի տափօղակով հոկեյի Հայաստանի հավաքականն անպայման մասնակցելու է Աշխարհի առաջնությանը»

Հայաստանի տափօղակով հոկեյի հավաքականը վերջին անգամ պաշտոնական հանդիպում է անցկացրել 2012թ., երբ որակազրկեց ու դադարեցրեց ելույթները: Հայկական հոկեյի խնդիրների ու հեռանկարների շուրջ VivaroNews.am-ը զրուցել է Հայաստանի տափօղակով հոկեյի ֆեդերացիայի նախագահ Սամվել Զախարյանի և գլխավոր քարտուղար Վահրամ Սարգսյանի հետ: Սկսենք Հայաստանի տափօղակով ֆեդերացիայի աշխատանքներից: Ե՞րբ եք սկսել աշխատանքը ֆեդերացիայում: Սամվել Զախարյան. Մենք ընդամենը 3 տարի ենք Հայաստանի տափօղակով հոկեյի ֆեդերացիայում: Նախկին հոկեյիստներ ենք, թե՛ ես, թե՛ գլխավոր քարտուղար Վահրամ Սարգսյանը: Ես մինչև 2007թ. խաղացել եմ Հայաստանի հավաքականում, ավագն եմ եղել: Հետագայում մենք թողել էինք հոկեյը, բայց 2014թ. Համահայկական ձմեռային խաղերում, երբ ներկա էինք հոկեյի մրցաշարին, ՀԱՕԿ գլխավոր քարտուղար Հրաչյա Ռոստոմյանն առաջարկեց ստանձնել ֆեդերացիայի աշխատանքները: Մեր թիմում է նաև ֆեդերացիայի նախկին նախագահ, երջանկահիշատակ Կարեն Խաչատրյանի որդին՝ Սամվել Խաչատրյանը, ով ֆեդերացիայի փոխնախագահն է ու զբաղվում է միջազգային համագործակցության հարցերով: Ի՞նչ ունենք այս պահին հայկական հոկեյում: Ս.Զ. Այս պահին Իրինա Ռոդնինայի անվան գեղասահքի դպրոցում անցկացվում են նաև հոկեյի մարզումներ՝ հավաքականի նախկին դարպասապահ Մհեր Հովհաննիսյանի գլխավորությամբ: Դպրոցը գտնվում է Երևանի քաղաքապետարանի ենթակայության տակ: Բայց մենք գիտենք, որ Հայաստանում հետաքրքրվածությունն իրականում ավելի մեծ է: Ուղղակի անհրաժեշտ է, որ ազգային հավաքականը կրկին խաղա միջազգային ասպարեզում, որպեսզի ուշադրությունը մարզաձևի հանդեպ մեծանա և միջոցներ ուղղվեն դեպի այս ոլորտ: Ի՞նչ խնդիրներ կան, որ խոչընդոտում են հոկեյի զարգացմանը: Ս. Զ. Այս պահին մենք որևէ ֆինանսավորում չունենք, ամեն ինչ անում ենք մեր գրպանից: Իսկ աշխատանքները շատ են, պետք է մարզիչներ հրավիրել, մարզադպրոց բացել՝ հատուկ վարժությունների համար առանձին սենյակներով ու մարզասարքերով: Հոկեյի մարզումները բազմապրոֆիլ են, կան առանձին մարզումներ սահելու տեխնիկան, մականի հետ աշխատանքը և ֆիզիկական վիճակը բարելավելու համար: Ժամանակակից հոկեյում անհնար է առանց սահադաշտից դուրս անցկացվող «չոր» մարզման: Այդ ամենը բավականին թանկ արժե, բայց աշխատում ենք այդ ուղղությամբ, ունենք ընկերներ ու համագործակիցներ, ովքեր այդ հարցով պատրաստ են մեզ օգնել: Վ. Ս. Բացի այդ, հոկեյը զարգացնելու համար պետք են նաև մարզիչներ, մեկ մարզիչը քիչ է: Մարզման յուրաքանչյուր բաղադրիչ պահանջում է առանձին մարզիչ: Իսկ անելու դեպքում պետք է ամեն ինչ լավ անել: Հոկեյը ամենաթանկ մարզաձևերից մեկն է, հանդերձանքը ևս շատ թանկ արժե: Ամենաթանկ բաներից մեկն էլ սառույցի վարձակալությունն է: Ի՞նչ է եղել Հայաստանի հավաքականի հետ որակազրկումից հետո: Ս.Զ. Որակազրկումն արդեն 2 տարի է, ինչ հանվել է: Պետք էր ընդամենը զբաղվել դրանով, զբաղվեցինք և ստացվեց: Այս պահին բավականին ծանր աշխատանքների մեջ ենք՝ կապված հավաքականի հետ: Մեր նպատակն է, որպեսզի զարգացնենք նաև մանկապատանեկան հոկեյը Հայաստանում ու հույսը չդնենք միայն սփյուռքի տղաների վրա: Այո, նրանք կան ու կօգնեն հավաքականին, բոլոր ցանկացողները կարող են միանալ մեզ: Մենք կապի մեջ ենք արտերկրում հանդես եկող բազմաթիվ հայ հոկեյիստների հետ, բացի այդ, փորձում ենք հավաքել բոլոր այն խաղացողներին, ովքեր հավաքականում էին որակազրկումից առաջ: Հիմա այդ աշխատանքների մեջ ենք, ու ամեն ինչ անում ենք, որ 2018թ. Հայաստանի հավաքականը կարողանա հանդես գալ Աշխարհի առաջնությունում: Վ.Ս. Հոկեյում ամեն ինչ շատ ավելի բարդ է: Միջազգային ֆեդերացիայի կողմից մոտ 8 պահանջներ կան, ու մենք այդ բոլորի ուղղությամբ ստիպված ենք աշխատել, թե՛ քաղաքացիության հարց ենք լուծում, թե՛ ակումբի, ամեն ինչ: Բելառուսի առաջնությունում այժմ խաղում է հայկական «Արարատ» ակումբը: Ինչպե՞ս եք գնահատում ներկայումս այդ թիմում հանդես եկող հայ հոկեյիստների մակարդակը: Վ.Ս. Շատ բարձր: Եթե այդ թիմը մասնակցի Աշխարհի առաջնության երրորդ դիվիզիոնի մրցաշարին, ապա առանց խնդիրների դուրս կգա երկրորդ դիվիզիոն, նույնիսկ կարող է առաջին դիվիզիոն հասնել: Դեռ համահայկական խաղերի ժամանակ համատեղ հանդիպում ունեցանք ՀՀ Սպորտի և երիտասարդության այն ժամանակվա նախարար Գաբրիել Ղազարյանի ու ՀԱՕԿ գլխավոր քարտուղար Հրաչյա Ռոստոմյանի հետ, որին ներկա էր նաև ներկայիս «Արարատի» ղեկավար Ռուբեն Ստեփանյանը: Քանի որ հավաքականի ստեղծման համար անհրաժեշտ էր, որպեսզի հոկեյիստները 1,5 տարի խաղացած լինեին հայկական ակումբում, հենց դրա համար որոշվեց ստեղծել «Արարատը»: Ս.Զ. Իրոք, շատ լավ տղաներ կան այնտեղ, նրանց մեծ մասին ճանաչում ենք, երբ համեմատում ենք նրանց 3-4 տարի առաջվա խաղը և այժմյանը, մեծ աճ են գրանցել: Ուղղակի, նրանց հետ պետք է ճիշտ աշխատանք տանել ու ավելի լուրջ մակարդակ հանել: Մենք շատ ուրախ ենք, որ դրսում բնակվող հայ տղաները կարող են հավաքվել ու խաղալ միասին: Շատ լավ է, որ նրանք խաղան ու զարգանան, իսկ մենք նրանց համար ՀՀ քաղաքացիության հարց լուծենք ու ընդգրկենք ազգային հավաքականում: Հանրապետության նախագահի կողմից նրանց քաղաքացիության հարցը հավանության է արժանացել, ներառյալ նրանց զինվորական ծառայության հարցի լուծումը: Արդեն 2-3 տարի աշխատում էինք հայ հոկեյիստների ու ծնողների հետ, որպեսզի ձևավորեինք ազգային հավաքականը: Բացի «Արարատի» հոկեյիստներից ովքեր կարող են օգնել Հայաստանի հավաքականին: Վ.Ս. Հիմա շատ հայեր կան, որ խաղում են տարբեր երկրներում: Բայց ճիշտ չէ, որ հիմա բոլորին գտնենք ու կանչենք Հայաստանի հավաքական: Մենք ունենք կորիզ՝ մոտ 10 հոկեյիստներ, ու եթե նրանցով թիմը ձևավորենք ու մի քանի հաղթանակ տանենք, արդեն բոլորը գալու և միանալու են մեզ: Աշխատանքները տարվում են, ու հաջորդ տարի մենք հասնելու ենք նրան, որ խաղանք Աշխարհի առաջնությունում: Այս տարի մայիսին մասնակցելու ենք միջազգային կոնգրեսին, որի ժամանակ էլ ներկայացնելու ենք հայտը: Ս.Զ. Հայկական այլ ակումբներ ևս եղել են: «Ուրարտու» ակումբ ենք ունեցել, «Շիրակ», «Գյումրի», «Շենգավիթ», հատուկ ջոկատայինները ևս ունեին թիմ: Երբ սկսեն Հայաստանից հոկեյիստներ աճել ու կորիզն ունենանք, հետագայում ընդհանրապես խնդիրներ չենք ունենալու հավաքականի հետ կապված: Արդեն աշխուժություն կտիրի ու աշխարհի բոլոր անկյուններից կսկսեն հոկեյիստներ դիմել մեզ: Բազմաթիվ ծրագրեր կան Միջազգային ֆեդերացիայի կողմից, որոնց շնորհիվ հնարավոր է հոկեյիստներին ուղարկել տարբեր մրցաշարերի, մարզիչներին ուղարկել վերապատրաստման, և այլն: Պետք է ընդգրկվենք այդ ծրագրերի մեջ ու օգտվենք այդ ամենից, որպեսզի առաջ շարժվենք: Այլ ակումբներ ստեղծելու շուրջ ևս մտածում ենք, բայց ֆինանսներ են անհրաժեշտ: Հուսով եմ, որ 1-2 տարի անց Հայաստանում ևս 2 ակումբ կունենանք: Ի՞նչ պայմաններ են անհրաժեշտ ապահովել, որպեսզի հավաքականին թույլ տրվի մասնակցել Աշխարհի առաջնությանը: Վ.Ս. Պայմանները բազմաթիվ են: Նախ, մեր հավաքականի բոլոր խաղացողների համար անհրաժեշտ է կազմակերպել տրանսֆերներ դեպի հայկական ակումբներ: Նվազագույնը 17 խաղացող են, նրանց բոլորի տրանսֆերների գումարներ արժի, յուրաքանչյուրը՝ 1000 ԱՄՆ դոլար: Ու սա ընդամենը փոքր հարցերից մեկն է: Այս ամենը մեծ գործընթաց է, որով հիմա զբաղվում ենք: Ո՞ր փուլից է հանդես գալու Հայաստանի հավաքականը՝ Աշխարհի առաջնությանը մասնակցության դեպքում: Վ.Ս. Բոլոր հավաքականներն էլ սկսում են երրորդ դիվիզիոնից: Երրորդ դիվիզիոնում հանդես են գալիս ոչ կայուն թվով թիմեր: Այսինքն, ամեն տարի հավաքվում են հայտերը, ու եթե թիմերի քանակը 5-6 է, ապա երկրներից մեկը ընդունում է առաջնությունը, ու բոլորը թիմերը միասին մրցաշար են անցկացնում: Եթե թիմերի քանակը մեծ է, ապա որակավորում է անցկացվում: Շրջանային մրցաձևում մրցում են միմյանց հետ: Ներկայումս թիմերի քանակը կարծես մի քիչ մեծ է, հնարավոր է, որ երկու խմբի կիսեն: Երրորդ դիվիզիոնի հաղթողը տեղափոխվում է երկրորդ դիվիզիոնի Բ ենթախումբ, այնտեղ հաղթելու դեպքում՝ Ա խումբ, և այդպես շարունակ: Այսինքն, մինչև բարձր մակարդակի դիվիզիոններ ընթացքը մի քանի տարի է տևելու: Բայց կարևորն այն է, որ խաղում ես, այդ ընթացքում արդեն նոր հոկեյիստներ կգան ու կհամալրեն թիմը, ընթացքն ավելի հեշտ կլինի: Ու վստահ եմ, որ դրան հասնելու ենք: Ամեն ինչ պարզ կդառնա մայիսին, երբ տեղի ունենա միջազգային կոնգրեսը: Արդյո՞ք կա պետական աջակցություն հոկեյին: Ս.Զ. Մենք վստահ ենք, որ աջակցություն կլինի, երբ «Արարատը» խաղա Մայրցամաքային գավաթում, կամ Հայաստանի հավաքականը՝ Աշխարհի առաջնությանը: Մենք բոլոր կապերն ունենք, ու հնարավոր չէ, որ այդ պարագայում աջակցություն չստանանք: Բայց այս պահին մենք ոչինչ պահանջել չենք կարող: Մինչ այս մեր բոլոր հարցերին շատ լավ արձագանքել են, փոխադարձ վստահություն կա: Դեռ 2010թ. Աշխարհի գավաթի փուլը մենք Երևանի Մարզահամերգային համալիրում այնպիսի մակարդակի ենք կազմակերպել, որ մեր հանդեպ մեծ վստահություն կա թե՛ ՀԱՕԿ-ում, թե Սպորտի նախարարությունում: Հիմա էլ, եթե հստակ առաջարկներ ունենանք նրանց, վստահ ենք, որ կօգնեն մեզ: Իսկ ինչ վերաբերում է սփյուռքի աջակցությունը, հիմա կան գործարարներ կան, որ օգնում են «Արարատին»: Այս պահին, այդքանը մեզ բավարար է: Հետագայում ևս հուսով ենք, որ անհրաժեշտության դեպքում կօգնեն: Պետք է մենք մի բան անենք, որ բոլորը տեսնեն, որ աշխատանք է կատարվում, ու արդեն վստահություն ստեղծվի, սկսեն աջակցել: Մենք մեր նպատակին հասնելու ենք: Կարեն Ռաֆայելյան, Լիանա Մկրտչյան
27.02.2017

«Արարատը» լիգայի 2 ռեկորդ է սահմանել

Տափօղակով հոկեյի Բելառուսի առաջնության բարձրագույն խմբի մրցաշարի 2016/2017թթ մրցաշրջանի մասնակից Երևանի «Արարատն» 2 ռեկորդ է սահմանել: Երևանյան թիմը դարձել է մրցաշարին մասնակից միակ թիմը, որին հաջողվել է գոլ խփել առաջնության և փլեյ-օֆֆ փուլի բոլոր խաղերում առանց բացառության: Բացի այդ, «Արարատը» երկրպագուների հաճախելության ռեկորդ է սահմանել:  Ընդհանուր առմամբ, «Արարատի» վերջին 22 հանդիպմանը ներկա է եղել 5,485 երկրպագու, միջին հաշվով յուրաքանչյուր հանդիպմանը ներկա է եղել 249 երկրպագու: Նշենք՝  «Արարատը» Բելառուսի բաց բարձրագույն խմբի առաջնության քառորդ եզրափակչում չկարողացավ հաղթահարել «Գոմել 2»-ի արգելքը:
18.02.2017

Բելառուս լրագրողը պարտվել է գրազը և կերել իր հոդվածը (տեսանյութ)

Բելառուս սպորտային լրագրող Վյաչեսլավ Ֆեդորենկովը գրազ է եկել, որ Մինսկի «Դինամոն» չի կարողանա մուտք գործել Հոկեյի Մայրցամաքային լիգայի (КХЛ) փլեյ-օֆֆ։ Գրազը պարտվելուց հետո նա ստիպված է եղել կատարել պայմանը, այն է՝ ուտել սեփական հոդվածները։ «Մինսկ Արենայի» մամուլի ասուլիսների սրահում Ֆեդորենկովը թերթում իր հոդվածը «բրդել է» սուպի մեջ և կերել է այն։
18.02.2017

Հոկեյ. «Արարատը» հավասարեցրել է շարքի հաշիվը

Տափօղակով հոկեյի Բելառուսի Բարձրագույն լիգայի փլեյ-օֆֆում հայկական «Արարատ» ակումբն արդեն 2 հանդիպում է անցկացրել։ Երեկ «Արարատը» մրցակցի հարկի տակ 3-4 հաշվով պարտվել է «Գոմել-2»-ին։ Իսկ ահա այսօր հայկական թիմը 6-2 հաշվով պարտության է մատնել նույն մրցակցին և հավասարեցրել շարքի հաշիվը։ Նշենք, որ 1/4 եզրափակիչ փուլը կհաղթահարի այն թիմը, որն առաջինը 3 հաղթանակ կտանի շարքում։
16.02.2017

Հոկեյի «Արարատ» ակումբը դուրս է եկել Բելառուսի առաջնության փլեյ-օֆֆ

Ավարտվել է Բելառուսի հոկեյի Բարձրագույն դիվիզիոնի 2016/17 մրցաշրջանի կանոնավոր առաջնությունը: Երևանը ներկայացնող «Արարատ» ակումբը փլեյ-օֆֆի ուղեգիր է նվաճել: «Արարատը» 44 խաղում վաստակած 74 միավորով զբաղեցրել է 6-րդ տեղը՝ 12 թիմերի շարքում: Փլեյ-օֆֆում «Արարատը» կմրցի «Գոմել-2»-ի հետ: Հիշեցնենք, որ «Արարատ» ակումբը գրանցված է որպես հայկական թիմ, բայց ներկայումս տեղակայված է Բելառուսի Օրշա քաղաքում: Թիմի կազմի կորիզը կազմում են հայ հոկեյիստները:
16.01.2017

Հոկեյիստի ՝ Մեսիի ոճով անցումը և դարպասի գրավումը (ՏԵՍԱՆՅՈՒԹ)

«Դետրոիտ Ռեդ Ուինգզի» հոկեյիստ Անդրեաս Աթանասիուն դարձել է անչափ գեղեցիկ գոլի հեղինակ:
13.01.2017

Ռուսաստանի և Չեխիայի մինչև 18 տարեկան հոկեյիստուհիների դաժան ծեծկռտուքը ԱԱ եզրափակիչում (ՏԵՍԱՆՅՈՒԹ)

16.11.2016

Անվտանգության աշխատակցի ինքնամոռաց պարը հոկեյի հանդիպման ժամանակ (տեսանյութ)

Հոկեյի մայրցամաքային լիգայի «Ամուր» - «Սիբիր» հանդիպման ընդմիջմանը անվտանգության աշխատակիցը սկսել է պարել Մայքլ Ջեքսոնի երգի տակ:
30.09.2016

Կանադան նվաճեց Աշխարհի գավաթը (տեսանյութ)

Սեպտեմբերի 30-ին Տորոնտոյում Կանադայի հոկեյի հավաքականը կարողացավ նաև եզրափակչի 2-րդ խաղում հաղթել Եվրոպայի հավաքականին: Այս անգամ կանադացիները կամայյին հաղթանակ տոնեցին ՝ 2-1 հաշվով: Մրցաշարի ամենաարժեքավոր խաղացող ճանաչվեց կանադացի Սիդնի Կրոսբին:
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: