Հայաստանի ազգային հավաքական | Էջ - 9

09.02.2017

Սարկիսով. «Մխիթարյանը մեր աստղն է և հպարտությունը»

Հայաստանի հավաքականի հարձակվող Արթուր Սարկիսովը, որը վերջերս համալրեց Ռուսաստանի Ազգային լիգայում հանդես եկող «Ենիսեյի» կազմը, խոսել է նոր ակումբ տեղափոխության որոշման մասին: «Ակումբի ներկայացուցիչները հետաքրքրված էին իմ ծառայություններով, և ես մեծ ցանկություն ունեի օգնել «Ենիսեյին» լուծել իր առջև դրված առաջադրանքները: Այլ ակումբներ տեղափոխվելու առաջարկներ ևս ստացել էի, բայց որոշեցի տեղափոխվել Կրասնոյարսկ առանց վարանելու»,-նշել է հարձակվողը: Արթուր Սարկիսովը անդրադարձել է նաև Հայաստանի հավաքականի ավագ և «Մանչեսթեր Յունայթեդի» կիսապաշտպան Հենրիխ Մխիթարյանին նոր ակումբի կազմում: «Հենրիխը մեր հպարտությունն է և աստղը: Նա ոտքից մինչև գլուխ պրոֆեսիոնալ է ու շատ տաղանդավոր: Նա իսկապես շատ է աշխատել իր խաղի վրա: Կարող եմ ասել, որ Հենրիխը ամենաուժեղ ֆուտբոլիստն է, որի հետ երբևէ խաղացել եմ մի խաղադաշտում»,-Ռուսաստանի Ազգային լիգայի պաշտոնական կայքի հետ զրույցում ասել է Սարկիսովը:
09.02.2017

Հայաստանի հավաքականը կրկին առաջադիմել է ՖԻՖԱ-ի դասակարգման աղյուսակում

Փետրվարի 9-ին հրապարակված ՖԻՖԱ-ի նոր վարկանիշային աղյուսակում Հայաստանի հավաքականը բարելավել է իր դիրքը չորս հորիզոնականով ու հանգրվանել 82-րդ տեղում: Նշենք, որ այս շրջանում մեր ընտրանին հանդիպումներ չէր անցկացրել: Ներկայացնում ենք լավագույն տասնյակը և այլ հավաքականների դիրքեր, որ կարող է հետաքրքրել. 1. Արգենտինա - 1635 միավոր 2. Բրազիլիա - 1529 3. Գերմանիա - 1433 4. Չիլի – 1386 5. Բելգիա - 1371 6. Ֆրանսիա – 1313 7. Կոլումբիա - 1304 8. Պորտուգալիա - 1240 9. Ուրուգվայ - 1195 10. Իսպանիա - 1168 15. Լեհաստան – 1101 30. Ուկրաինա – 805 40. Ռումինիա - 688 49. Դանիա - 657 61. Ռուսաստան - 592 63. Ուզբեկստան – 554 64. Չեռնոգորիա - 549 72. Բելառուս – 470 82. ՀԱՅԱՍՏԱՆ - 422 89. Ադրբեջան - 388 96. Ղազախստան - 352 109. Լիտվա - 324 113. Լատվիա - 306 119. Էստոնիա - 291 124. Ղրղզստան - 265 125. Վրաստան - 263 133. Տաջիկստան - 231 144. Թուրքմենստան - 200 163. Մոլդովա – 145 http://www.vivaronews.am/articles/hayastani-tcuyl-havakhakaneh-ev-azgeri-ligan
09.02.2017

Յուրա Մովսիսյան. «Ես միշտ ցանկություն ունեմ խաղալու հավաքականում, բայց երկու երես չունեմ»

Հայաստանի հավաքականի նախկին հարձակվող Յուրա Մովսիսյանը «Ռեալ Սոլթ Լեյքի» ֆեյսբուքյան էջում հարցազրույցի ժամանակ խոսել է Հայաստանի հավաքականի, Հայաստանի ու Հայոց ցեղասպանության մասին. «Հայաստանի հավաքականը միշտ կմնա իմ հավաքականը: Ես միշտ ցանկություն ունեմ խաղալու հավաքականում: Բայց հիմա ես հանդես չեմ գալիս այնտեղ, քանի որ այն ինչ տեղի ունեցավ, այն մեղադրանքները ու խոսքերն ինձ մասին, դա ինձ համար չէ ու ես երբեք նման բաներ չեմ արել: Ամենակարևորն այն է, որ մարդիկ գիտեն՝ ես անկեղծ եմ, ես երբեք խաղեր չեմ տալիս որևէ տեղ հասնելու համար, ես երկու երես չունեմ, գուցե հենց դա է խնդիրը: Ես շիտակ մարդ եմ: Եթե դա է խնդիրն, ուրեմն ամեն ինչ այսպես էլ մնալու է, որովհետև ես երբեք չեմ փոխվի: Ես միշտ կերկրպագեմ իմ ազգային հավաքականին, իմ երկրին: Ես գիտեմ, թե ինչ է նշանակում խաղալ ազգային հավաքականում»,-ասել է Մովսիսյանը: Պատասխանելով այն հարցին, թե ինչ է իր համար նշանակում հայ երկրպագուների աջակցությունը, հարձակվողն ասել է. «Հայերի աջակցությունը զգացմունքային կողմ ունի ինձ համար, որովհետև մեր ազգը վերապրել է 1915թ. ցեղասպանությունը, իմ երկիրը 25 տարի պատերազմի մեջ է Ադրբեջանի հետ, բայց աշխարհն այնպես է արձագանքում, կարծես այդ պատերազմը չկա: Սահմանին ամեն օր մարդ է զոհվում, ամեն ինչ շատ տխուր է: Բայց երբ մարդիկ ուրախանում են ֆուտբոլով ու մարզիկներով, դա շատ լավ է, և ես երջանիկ եմ, որ կարող եմ նրանց գոնե ժպիտ պարգևել: Եթե ես կարող եմ նրանց կտրել պատերազմից ու օգնել ժպտալ, ուրեմն կարող եմ ինձ աշխարհի ամենահաջողակ մարդը զգալ»: Յուրա Մովսիսյանը խոսել է նաև «Ալաշկերտի» հետ ընկերական խաղի մասին. «Մենք խաղալու են Հայաստանի չեմպիոնի հետ, դա մի առանձնահատուկ բան է լինելու: Ինձ համար դա հատկանշական է, որովհետև խաղալու եմ այն տղաների հետ, ում հետ հանդես էի գալիս Հայաստանի հավաքականում: Ուրախ եմ, որ հայկական թիմը կարող է գալ ու խաղալ իմ թիմի հետ: Հուսով եմ, մարդիկ չեն ալարի և կգան այդ խաղին: Ես գիտեմ, որ Հայաստանի թիմը շատ ոգևորված է լինելու, դա նրանց համար մեծ խաղ է լինելու»: http://www.vivaronews.am/articles/inchu-e-yura-movsisyaneh-hayastani-havakhakani-amenaaranckhayin-futbolisteh
07.02.2017

Հայաստանի «ծույլ» հավաքականը և Ազգերի լիգան

ՈՒԵՖԱ-ն այս տարի վերջապես առաջին մանրամասները հայտնեց իր նոր մրցաշարի՝ Ազգերի լիգայի մասին: Նորամուծության լավ ու վատ կողմերի մասին եղան բազում վերլուծություններ, բայց բոլորի առանցքում ԵՎՐՈ-2020-ի ուղեգիր նվաճելն էր՝ ֆետիշացված գերխնդիր, որ ծծմբաթթվի նման կաթել է մեր մաշկին ու ծակում է տարիներ շարունակ: Բայց ինչ-որ տեղ հասնելու համար պետք է ոչ միայն ֆիքսել նպատակակետը, այլև գտնել այնտեղ տանող ճանապարհներ: Առանց ուժեղ հավաքական ունենալու մեզ չի փրկի ոչ մի ձևաչափի մրցաշար: Վարդագույն ժապավենով նրբորեն կապված 4 ուղեգրերի հետևում Պլատինին հմտորեն թաքցրել է նաև մի շատ կարևոր պայման, որը կարող է էապես փոխել հավաքականների ֆուտբոլը Եվրոպայում: Հետաքրքիր է, որ այդ փոփոխությունն ամենաշատն ազդելու է հենց Հայաստանի հավաքականի վրա: Հասկանանք, թե ինչու. Ազգերի լիգայի նպատակներից մեկը հավաքականներին ավելի շատ հանդիպումներ անցկացնելու հնարավորություն տալն է: Ընդ որում՝ ֆիկտիվ բնույթ ընկերական հանդիպումների փոխարեն թիմերը կունենան առավել մրցակցային ու թեժ դիմակայություններ, որոնց ընթացքում ֆուտբոլիստները կարող են իսկապես խաղակցվել ու որակներ զարգացնել: Իսկ Հայաստանի հավաքականն, ընդհանրապես, վերջապես ստիպված կլինի տեղից շարժվել ու ավելի շատ հանդիպումներ անցկացնել: Օրեր առաջ տեղեկացանք, որ Թուրքիայում նախատեսված Ուզբեկստան – Հայաստան ընկերական հանդիպումը չի կայանալու: Թեև այն լինելու էր հասարակ ստուգողական խաղ առանց առաջատար ֆուտբոլիստների, սակայն նույնիսկ այդ խաղը Հայաստանից դուրս տեսնելու բախտը մենք չունեցանք: Ու ընդհանրապես, եթե Դուք Հայաստանի հավաքականի նվիրյալ երկրպագու եք, ապա պետք է որ շատ կարոտեք մեր թիմի խաղը: Ինչո՞ւ: Որովհետև մեր հավաքականն ամենաքիչ հանդիպումներ անցկացնող ընտրանիներից է Եվրոպայում: Հիմնադրման օրվանից՝ 1994թ. հոկտեմբերի 14-ից ի վեր Հայաստանի հավաքականն անցկացրել է ընդամենը 66 ընկերական հանդիպում: Ավելի քիչ խաղեր անցկացրել են միայն Սան Մարինոն (12), Ֆարերները (33), Անդորրան (43), Լիխտեյնշտեյնը (51) և Ղազախստանը (64): Այլ կերպ ասած՝ այն հավաքականները, որի ֆուտբոլիստները կա՛մ աշխատանքի են ու լրացուցիչ վճարվող արձակուրդ չունեն, կա՛մ էլ մեր նման «ծույլ» են, օրինակ՝ Ղազախստանը: Նույն ժամանակահատվածում Վրաստանն անցկացրել է 93 խաղ, Ադրբեջանը՝ 108, Մալթան՝ 105, Մոլդովան՝ 88, Էստոնիան՝ 158: Որպես կանոն՝ Հայաստանի հավաքականը բաց է թողնում ՖԻՖԱ-ի կողմից սահմանված հավաքականների դադարների ժամանակահատվածները, մինչդեռ բոլոր առաջատար ընտրանիներն այդ ընթացքում միշտ 2-ական հանդիպում են անցկացնում: Եթե հաշվի առնենք, որ Աշխարհի կամ Եվրոպայի առաջնություններին սովորաբար չմասնակցող հավաքականները տարվա ընթացքում անցկացնում են միայն որակավորման հանդիպումներ, իսկ դրանց թիվը բոլոր թիմերի համար գրեթե նույնն է, կտեսնենք, որ մեր հավաքականն ամենաքիչն է խաղում: Էլ ինչպես խոսել խաղակցվածության, թիմ կառուցելու ու ազգային ընտրանու որակները բարձրացնելու մասին: Ցավալի է նաև, որ Հայաստանի հավաքականը գրեթե միշտ շատ հեռու է մեր աչքից: Ընկերականի մակարդակի չհասնող ստուգողական հանդիպումներ աշխարհի տարբեր անկյուններում, որի տեսագրությունը կամ գոնե գոլերը շատ հաճախ նույնիսկ համացանցում չեն հայտնվում: 2014թ. Հայաստանում տեղի է ունեցել հավաքականի միայն 2 խաղ, 2015-ին ու 2016-ին՝ 3-ական: Ի՞նչ պահանջել հայ երկրպագուներից՝ առանց նրանց ֆուտբոլ տալու: Ընկերական խաղերի վերջին բուռն պոռթկումը Հայաստանում եղավ Բեռնար Շալանդի օրոք, երբ շվեյցարացին կարողացավ 5 ընկերական խաղ անցկացնել 2014թ.: Դրանից հետո եղան միայն Ֆրանսիայի հետ պարտադրված ընկերականները, Բերեզովսկու հրաժեշտի խաղը և ամերիկյան շրջագայությունը, ինչպես նաև Չեխիայի հետ կորստաբեր մրցավեճը: Բայց մեղավորներ փնտրելու ժամանակն անցել է: Հիմա ՈՒԵՖԱ-ն արդեն կթելադրի իր կանոնները: Եթե նույնիսկ ՀՖՖ-ն ոչինչ չձեռնարկի, 2018թ. Հայաստանի հավաքականը ստիպված կլինի անցկացնել նվազագույնը 6 խաղ՝ Ազգերի լիգայի խմբային փուլում: 2019թ. արդեն ԵՎՐՈ-2020-ի որակավորման փուլում մեր թիմը կրկին ստիպված կլինի խաղալ 8-10 խաղ, իսկ եթե Ազգերի լիգայում հաջողվի խմբում առաջին տեղը գրավել, ապա 2020թ. մարտին կգումարվի ևս 2 փլեյ-օֆֆ հանդիպում՝ չհաշված նույն մրցաշարի արդեն 2020թ. խմբային փուլը, որտեղ ևս 6 խաղ տեղի կունենա խմբային փուլում: Ու ևս մեկ ուրախ լուր՝ Ազգերի լիգայի խմբային փուլում 6 խաղերից 3-ը պարտադիր անցկացվելու են Երևանում: Այսպիսով, Ազգերի լիգայի միակ երաշխավորված օգուտը մեզ համար այն է, որ մենք ունենալու ենք հավաքականի ավելի շատ խաղեր, ավելի թեժ խաղեր, ու խաղեր՝ հենց մեր աչքի առաջ՝ Հայաստանում: Մնացած օգուտների համար արդեն պետք է պայքարել հենց խաղադաշտում:
31.01.2017

Արաս Օզբիլիսը կարող է վերադառնալ Հոլանդիա

«Բեշիքտաշի» և Հայաստանի հավաքականի կիսապաշտպան Արաս Օզբիլիսը կարող է վերադառնալ Հոլանդիա, հաղորդում է Soccernews.nl-ը: «Վիլլեմ II»-ը ցանկանում է մինչ տրանսֆերային պատուհանի փակումը ձևակերպել ֆուտբոլիստի վարձակալությունը: Այդ թիմը Հոլանդիայի ընթացիկ առաջնությունում ընթանում է 11-րդ հորիզոնականում՝ իր ակտիվում ունենալով 22 միավոր: Ֆուտբոլիստն ամռանն է տեղափոխվել Թուրքիա, սակայն առաջնությունում ընդամենը 6 րոպե է անցկացրել խաղադաշտում: Թիմի շարքերն է համալրել նաև Ռայան Բաբելը, ինչից հետո ավելի են փոքրացել Օզբիլիսի՝ հիմնական կազմում հայտնվելու հնարավորությունները: Արասը համարվում է Ամստերդամի «Այաքսի» ակադեմիայի սան: Հայաստանի հավաքականի ֆուտբոլիստը հանդես է եկել նաև «Կուբանի», Մոսկվայի «Սպարտակի» և «Ռայո Վալյեկանոյի» կազմում: http://www.vivaronews.am/dimitri-selyuk-aras-ozbilisn-ardtyen-moracel-e-or-hay-e
30.01.2017

«Հենո-400». Հենրիխ Մխիթարյանի համար «Ուիգանի» հետ խաղը հոբելյանական էր

«Ուիգանի» հետ Անգլիայի գավաթի խաղարկության 1/16 եզրափակիչ հանդիպումն ակումբային մակարդակով Հենրիխ Մխիթարյանի հոբելյանական՝ 400-րդ խաղն էր պաշտոնական մրցումներում: Հերթական հոբելյանը հայ ֆուտբոլիստը նշեց՝ «Մանչեսթր Յունայթեդում» բացելով գոլերի հաշիվը նաև Անգլիայի գավաթի մրցաշարում: Տպավորիչ այդ ցուցանիշին հասնելու համար հայկական ֆուտբոլի ներկայիս աստղին 11 մրցաշրջան պահանջվեց: Ակումբային մակարդակով պաշտոնական առաջին հանդիպումը Մխիթարյանն անցկացրել է 2006թ. հունիսի 27-ին «Ուլիսի» հետ կայացած առաջնության 12-րդ տուրի խաղում: 77-րդ րոպեին, երբ «Փյունիկը» հաշվի մեջ արդեն առջևում էր 3:0 հաշվով, Սամվել Պետրոսյանն Էդուարդ Պարցիկյանի փոխարեն խաղադաշտ դուրս բերեց 17-ամյա պատանի Մխիթարյանին, ով արդեն իր մասին գովեստով խոսելու առիթ էր տվել «Փյունիկ-2-ում» ունեցած արդյունավետ  ու գրագետ խաղի շնորհիվ: Հայկական ֆուտբոլում Մխիթարյանի ակումբային կարիերան կարճ տևեց՝  ընդամենը 3,5 տարի: «Փյունիկի» կազմում չհասցնելով նույնիսկ 100 պաշտոնական խաղ անցկացնել, Հենրիխը հայտնվեց Դոնեցկի «Մետալուրգում», որտեղից սկսվեց նրա արտասահմանյան փայլուն կարիերան: Մխիթարյանի ֆուտբոլային տաղանդը հատկապես վառ դրսևորվեց «Շախտյորում» 2012/13թթ. մրցաշրջանում: Ուկրաինայի առաջնությունում Հենրիխը պարզապես հիացրեց իր արդյունավետությամբ: Անցկացրած 29 հանդիպումներում խփած 25 գնդակով նա ճանաչվեց Ուկրաինայի առաջնության լավագույն ռմբարկու և արդյունավետության նոր ռեկորդ սահմանեց՝ գերազանցելով Կիևի «Դինամոյի» ճանաչված ռմբարկուներ Սերգեյ Ռեբրովի (1997/98թթ.) և Մաքսիմ Շացկիխի (2002/2003թթ.) արդյունքը, որոնք 22-ական գոլի հեղինակ էին դարձել: Հարկ է նշել, որ մինչ օրս Մխիթարյանի արդյունավետության ռեկորդը ոչ մեկին չի հաջողվել նույնիսկ կրկնել: Դորտմունդի «Բորուսիան» հայկական ֆուտբոլի աստղին խաղային ունակությունները նորովի դրսևորելու ավելի լայն հնարավորություն ընձեռեց: Թիմի կազմում անցկացրած 3 մրցաշրջանների ընթացքում Մխիթարյանը պաշտոնական մրցումներում 140 խաղ անցկացրեց, ինչը նրա արտասահմանյան ակումբային կարիերայում առայժմ ռեկորդային արդյունք է: VivaroNews.am-ը ներկայացնում է Հենրիխ Մխիթարյանի ցուցանիշները տարբեր ակումբներում տարբեր մրցաշարերում: Թվական Ակումբ Ա Գ Ս Ե ԸՆԴ 2006-2009 «Փյունիկ» 70 15 1 6 92 2009-2010 «Մետալուրգ» Դոնեցկ 37 2 - 6 45 2010-2013 «Շախտյոր» 72 11 2 21 106 2013-2016 «Բորուսիա» Դորտմունդ 90 17 1 32 140 2016-2017 «Մանչեսթր Յունայթեդ» 12 2 - 3 17 Հենրիխ Մխիթարյանը դարձավ հայ ֆուտբոլիստներից 17-րդը, ով իր ակումբային կարիերայի ընթացքում պաշտոնական մրցումներում հատեց 400-րդ խաղի սահմանագիծը: Իսկ ահա արտերկրի ակումբներում անցկացրած խաղերի քանակով Հենրիխը յուրօրինակ ռեկորդակիր է: Արտասահմանյան 4 ակումբների կազմում Մխիթարյանն ընդհանուր առմամբ 308 խաղ է անցկացրել: 400-ի խորհրդանշական ակումբի անդամների ցանկը գլխավորում է հայկական ֆուտբոլի անվանի վետերաններից մեկը՝ Սարգիս Հովսեփյանը, ով 1992-2012թթ. ընթացքում «Փյունիկի», Սանկտ Պետերբուրգի «Զենիթի» և Մոսկվայի «Տորպեդո-Մետալուրգի» կազմում ընդհանուր առմամբ 651 խաղ է անցկացրել: VivaroNews.am-ը ներկայացնում է ակումբային մակարդակով (միայն բարձրագույն խմբի թիմերում) պաշտոնական մրցումներում 400 և ավելի խաղ անցկացրած ֆուտբոլիստների ցուցանիշները: Դրանք ներառում են ՀՀ առաջնություններում (Ա), ՀՀ գավաթի (Գ), Սուպերգավաթի (Ս), եվրոգավաթների (Ե) և ԱՊՀ երկրների «Համագործակցության գավաթի» (ԱՊՀ) խաղարկություններում, ինչպես նաև արտերկրի ակումբներում (ԱԵ) անցկացրած պաշտոնական խաղերը: Ֆուտբոլիստներ Ա Գ Ս Ե ԱՊՀ ԱԵ ԸՆԴ 1.Սարգիս Հովսեփյան 365 66 3 26 13 178 651 2.Հովհաննես Թահմազյան 461 83 6 20 6 - 576 3.Արթուր Քոչարյան 357 67 1 11 2 82 520 4.Տիգրան Դավթյան 409 62 3 31 - - 505 5.Համլետ Մխիթարյան 192 44 2 18 7 231 494 6.Կարեն Ալեքսանյան 324 52 4 21 10 80 491 7.Արթուր Ոսկանյան 254 43 3 16 6 123 445 8.Գևորգ Կասպարով 294 45 4 20 10 59 432 9.Արթուր Պետրոսյան 214 45 2 8 6 155 430 10.Արամ Ոսկանյան 216 46 2 9 - 155 428 11.Արարատ Հարությունյան 336 68 3 17 3 - 427 12.Աղվան Մկրտչյան 271 50 5 32 19 49 426 13.Դավիթ Գրիգորյան 299 47 2 15 3 54 420 14.Կարեն Դոխոյան 205 30 1 12 3 164 415 15.Արսեն Ավետիսյան 329 62 3 14 7 - 415 16.Ալեքսանդր Թադևոսյան 275 42 3 21 13 58 412 17.Հենրիխ Մխիթարյան 70 15 1 6 - 308 400 Աշոտ Հայրապետյան
28.01.2017

Հայաստանի հավաքականի լավագույն գոլի մրցանակը հանձնվեց Համլետ Մխիթարյանին (լուսանկարներ)

Ավարտվեց VivaroNews.am-ի կողմից կազմակերպված Հայաստանի հավաքականի լավագույն գոլը նախագիծը: Ինչպես գիտեինք, եզրափակչում միմյանց դեմ էին դուրս եկել երկու՝ Հենրիխ և Համլետ Մխիթարյանները: 66%-34% հարաբերությամբ հաղթանակ տարավ Համլետ Մխիթարյանի խփած գնդակը Լեհաստանի հավաքականի դարպասը: VivaroNews.am-ը հանձնել է լավագույն գոլի համար սահմանված մրցանակը, ինչպես նաև հատուկ նվերը Վիվառո ընկերության կողմից: Պարգևատրման արարողությունը և Համլետ Մխիթարյանի հետ հարցազրույցը կարող եք դիտել VivaroNews հաղորդման շրջանակներում՝ կիրակի օրը, 20:00-ին Armnews հեռուստաընկերության եթերում:
27.01.2017

Հայաստանի հավաքականն «Ազգերի Գավաթում» կմեկնարկի 4-րդ դիվիզիոնում

2018 թվականի աշնանը մեկնարկելու է նոր մրցաշար՝ ՈւԵՖԱ-ի «Ազգերի Գավաթը»: Հայաստանի ազգային հավաքականը մրցաշարում մեկնարկելու է 4-րդ դիվիզիոնում՝ գրում է «Спорт-Экспресс»-ը: «Ազգերի Գավաթը», որին մասնակից են լինելու Եվրոպական ֆուտբոլային ասոցիացիաների բոլոր 55 երկրները, բաղկացած է լինելու 4 դիվիզիոններից: Մրցաշարը հնարավորություն է տալու ընկերական խաղերը փոխարինել ներմրցաշարային հանդիպումներով՝ միաժամանակ կոմերցիոն հնարավորություն ընձեռելով թե՛ ՈւԵՖԱ-ին, թե՛ ազգային ֆեդերացիաներին: Ընդ որում՝ 4 դիվիզիոնների հաղթողները հնարավորություն են ունենալու մասնակցել Եվրո 2020-ի եզրափակիչ փուլին: Հավաքականների որակավորման համար հիմք են հանդիսանում ԱԱ 2014-ի, Եվրո 2016-ի, ինչպես նաև ԱԱ 2018-ի որակավորման մրցաշարում գրանցված արդյունքները: Այս պահին խմբերը հետևյալ տեսքն ունեն. Առաջին դիվիզիոն(Լիգա A). Գերմանիա, Ֆրանսիա, Բելգիա, Պորտուգալիա, Շվեյցարիա, Իսպանիա, Անգլիա, Իտալիա, Խորվաթիա, Լեհաստան, Իռլանդիա, Ուկրաինա: Երկրորդ դիվիզիոն(Լիգա B). Հոլանդիա, Ռուսաստան, Իսլանդիա, Հունգարիա, Ուելս, Բոսնիա և Հերցեգովինա, Շվեդիա, Հունաստան, Սլովակիա, Ավստրիա, Իսրայել, Սլովենիա: Երրորդ դիվիզիոն(Լիգա C). Հյուսիսային Իռլանդիա, Ռումինիա, Չեխիա, Թուրքիա, Ալբանիա, Դանիա, Չեռնոգորիա, Սերբիա, Բուլղարիա, Շոտլանդիա, Նորվեգիա, Լիտվա, Ադրբեջան, Կիպրոս, Ֆինլանդիա: Չորրորդ դիվիզիոն(Լիգա D). Էստոնիա, Բելառուս, Վրաստան, Հայաստան, Լատվիա, Ֆարերյան կղզիներ, Ղազախստան, Մոլդովա, Լյուքսեմբուրգ, Մակեդոնիա, Կոսովո, Լիխտենշտեյն, Մալթա, Անդորրա, Սան Մարինո, Ջիբրալթար: Նշենք, որ յուրաքանչյուր դիվիզիոնում կազմվելու է 4 խումբ, որոնց հաղթողները նվաճելու են հաջորդ փուլի ուղեգիր: Խմբերի տեսքը վերջնական չէ:
27.01.2017

Ի՞նչ է իրենից ներկայացնում «Շկոդա Կսանտին». Ծանոթանում ենք Մարկոս Պիզելիի նոր ակումբի հետ

Երեկ պաշտոնապես հաստատվեց, որ Հայաստանի ազգային հավաքականի կիսապաշտպան Մարկոս Պիզելին պայմանագիր է կնքել հունական «Շկոդա Կսանտիի»հետ: Երկրպագուներից շատերը գուցե առաջին անգամ են լսում այս ակումբի մասին: Փորձենք պարզել, թե որտեղ է հանդես գալու մեր ազգային հավաքականի առաջատարներից մեկը: Ակումբը ստեղծվել է 1967թ հունական երկու նախկին ակումբներ «Ասպիդա Կսանտիի» և «Օրֆեասի» միավորումից: «Շկոդա Կսանտի» ակումբը իր անվանումը ստացել է 1991թ.: «Viamar S.A»-ն, որը ավտոմեքենաների դիլեր է Հունաստանում (Skoda մեքենաների), գնել էր ակումբը նախկին սեփականատերերից և փոխել անունը «Շկոդա Կսանտի Ատլետիկ»: 2016թ. երբ համագործակցությունը ավարտվեց, ակումբը նորից ստացավ իր նախկին օրիգինալ անվանումը: Իր պատմության ընթացքում «Շկոդա Կսանտին» 4 անգամ մասնակցել է ՈւԵՖԱ-ի գավաթին (այժմ Եվրոպա լիգա) ՝ 2001-02, 2005-06, 2006-07 և 2013-14: Ակումբի լավագույն արդյունքը հունական Սուպեր լիգայում եղել է 4-րդ հորիզոնականը(2004-05 մրցաշրջան): 2014-15 մրցաշրջանում «Շկոդա Կսանտին» հասել է Հունաստանի գավաթի եզրափակիչ: Ակումբը իր տնային խաղերը անցկացնում է «Կսանտի արենա» մարզադաշտում: Նշենք, որ ակումբն այս պահին զբաղեցնում է Հունաստանի առաջնության 2-րդ հորիզոնականը ու պայքարում է Չեմպիոնների լիգայի որակավորման փուլի ուղեգրի համար:
25.01.2017

Արտակ Եդիգարյանը կազմել է իր երազանքի 6-հոգանոց թիմը

Երևանի «Ալաշկերտի» և Հայաստանի ազգային հավաքականի ֆուտբոլիստ Արտակ Եդիգարյանը VivaroNews-ին տված հարցազրույցի վերջում ներկայացրել է նաև իր երազանքի թիմը՝ կազմված 6 ֆուտբոլիստներից: http://www.vivaronews.am/artak-yedigaryan-hetakhrkhir-klini-yura-movsisyani-thimi-dem-xaghaleh
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: