Հայաստանի ազգային հավաքական | Էջ - 7

25.03.2017

Գևորգ Ղազարյան. «Երկար դադարից հետո լույս եմ տեսնում թունելի վերջում»

Հայաստանի ազգային հավաքականը 3 տարի սեփական հարկի տակ հաղթանակ չէր տարել: Երկրպագուների թիվը մարզադաշտում խաղից խաղ կրճատվում էր: Մոնտենեգրոյի հետ խաղից հետո անկումը ևս շարունակվելու միտում կունենար, սակայն մրցավարի ավելացված ժամանակի բառացիորեն վերջին վայրկյաններին Գևորգ Ղազարյանն իր ֆանտաստիկ հարվածով էյֆորիայի մեջ գցեց ամբողջ «Հանրապետականն» ու Հանրապետությունը՝ դառնալով այդ խաղի, ինչպես նաև VMag ամսագրի 13-րդ համարի (դեկտեմբեր 2016) հերոսը:  - Ինչպե՞ս դասավորվեց քեզ համար 2016 թվականը, ինչո՞վ էր այն առանձնանում մյուսներից: - 2016 թվականն, առհասարակ, ես ինձ համար բաժանում եմ երկու հատվածի: Առաջինն ամենաանհաջողներից էր իմ կարիերայի ընթացքում: Տարվա սկզբից 3 վնասվածք ստացա: Դրանցից մեկը բավական լուրջ ստացվեց: Ստիպված եղա խաղադաշտից դուրս մնալ մոտ 4 ամսով, սակայն կարողացա ոտքի կանգնել, կազդուրվել ու վերադառնալ խաղադաշտ: Այդտեղից սկսվում է 2016-ի երկրորդ, համեմատաբար ավելի հաջող հատվածը: Վնասվածքից հետո քայլ առ քայլ վերադարձա շարք, սկսեցի մասնակցել հանդիպումներին ու խաղաժամանակ ստանալով նորից հասա իմ լավագույն մարզավիճակին: - Տարվա վերջին խաղում քո խփած գնդակը հաղթական ստացվեց: Ի՞նչ արժեք ունի այս գոլը քեզ համար: - Մոնտենեգրոյի դարպասը խփած գնդակն ինձ համար, իսկապես, մեծ արժեք ունի: Առաջին հերթին՝ խաղի բառացիորեն վերջին վայրկյաններին այն Հայաստանի հավաքականին երեք միավոր պարգևեց: Բացի դրանից, անձամբ ինձ համար այս գնդակը կարևոր էր հոգեբանական տեսանկյունից: Երկար ժամանակ աչքի չէի ընկել հավաքականի կազմում: Ավելի քանի երեք տարի չէի կարողանում դառնալ գոլի հեղինակ: Հուսամ՝ սառույցը կոտրվեց: - 10 համարի մարզաշապիկով հանդես եկող ֆուտբոլիստը խփեց իր 10-րդ գնդակը հավաքականում: Թվերի մոգական ուժին հավատու՞մ ես: - Որ ճիշտն ասեմ՝ մոգական ուժերին առհասարակ չեմ հավատում: Եթե այդպես լիներ՝ 100 համարի մարզաշապիկով կխաղայի: (ժպտում է) - Կարելի՞ է արդյոք այս գնդակը համարել Հայաստանի հավաքականի նոր հաղթական ուղու առաջին քայլը: - Չգիտեմ՝ որքանով այն կարելի է հաղթական ուղու սկիզբ համարել, բայց երկարատև դադարից հետո լույս եմ տեսնում թունելի վերջում: Հույս արթնացավ երկրպագուների ու առհասարակ բոլորի շրջանում: Անկախ այս հաղթանակից, Հայաստանի հավաքականն ունի բազում թերություններ ու խնդիրներ, մասնավորապես՝ պաշտպանությունում: Չափից շատ էին անհիմն վտանգավոր պահեր ծագում մեր դարպասի մոտ: Բնականաբար, չենք կարող ամեն անգամ խաղային դրվագը թողնել բախտի քմահաճույքին ու խնդրել ճակատագրին, որ այդ անգամ էլ գնդակը չհայտնվի մեր դարպասում: Ամեն ինչ շտկել է պետք: Իսկ դա, իհարկե, մի օրում չի լինում: Ես հասկանում եմ երկրպագուներին, նրանք հոգնել են սպասելուց: Ուղղակի պետք է գիտակցել ու հասկանալ, որ մարզիչը չունի կախարդական փայտիկ, որը մեկ վայրկյանում կլուծի բոլոր խնդիրները: Այո՛, լավ է, գերազանց է, էպիկ հաղթանակ ենք տարել 3-2 հաշվով, բայց խնդիրները դեռևս ահռելի են: - Հայաստանի հավաքականում խաղացել ես տարբեր մարզիչների գլխավորությամբ: Ու՞մ հետ էր ամենից հեշտ աշխատել: - Իհարկե, յուրաքանչյուր մարզիչ ունի աշխատանքի իր մեթոդիկան ու իր համապատասխան ծրագիրը: Անձամբ ինձ հեշտ է եղել աշխատել Վարդան Մինասյանի աշխատակազմի հետ: Ինչու՞ չեմ առանձնացնում միայն Վարդան Մինասյանին, որովհետև մարզչի հաջողության առյուծի բաժինը կախված է լավ օգնականներից՝ Վարդան Մինասյան, Ռաֆայել Նազարյան, Արթուր Մկրտչյան, Արթուր Ավագյան: Մենք բոլորս մի ընտանիքի պես էինք: Այդ հավաքականը հավերժ կմնա իմ հուշերում, որպես բոլոր ժամանակների լավագույն հավաքական: - Վերջին հաջողություններից հետո ինչպե՞ս են ընթանում գործերդ «Մարիտիմուում»: Մտադի՞ր ես մնալ Պորտուգալիայում, թե՞ ինչ-որ առաջարկի ես սպասում: - «Մարիտիմուում» ամեն ինչ նորմալ է, ընթանում է բնականոն հունով: Այս պահին այլ ակումբում կարիերաս շարունակելու մասին չեմ մտածում:  Բնականաբար, չեմ բացառում ոչինչ: Եթե լինեն ավելի գայթակղիչ առաջարկներ, կքննարկեմ ակումբիս հետ: Բայց ինձ այստեղ ամեն ինչ գոհացնում է, ես շարունակում եմ մնալ «Մարիտիմուի» ֆուտբոլիստ, բացի դրանից ունեմ գործող պայմանագիր, որն ուժի մեջ է ևս մեկ մրցաշրջան: - Ուժերդ փորձել ես տարբեր մենթալիտետներ ու խաղաոճեր ունեցող առաջնություններում: Ինչո՞վ քեզ գրավեց Պորտուգալիան։ - Ես կյանքում սիրում եմ փոփոխություններ: Պորտուգալիայից առաջարկ ստանալու հետ մեկտեղ ունեցա առաջարկ այլ երկրներից: Կար տարբերակ Ուկրաինայում՝ «Մետալիստ» ակումբում, ինչպես նաև հետաքրքիր առաջարկ էի ստացել հունական երկու ակումբից: Բայց քանի որ արդեն հասցրել էի ուժերս փորձել այդ երկրներում, ընտրություն կատարեցի հօգուտ Պիրենեյան թերակղզու: Գիտեի, որ այստեղի առաջնությունը հետաքրքիր է ու տարբերվում է մյուսներից: Բացի դրանից ավելի հեռանկարային է: - Կա՞ առաջնություն կամ երկիր, որտեղ կցանկանայիր երբևէ հանդես գալ: - Իհարկե, աշխարհը մեծ է, գայթակղությունը՝ նույնպես: Կուզենայի երբևէ ուժերս փորձել այստեղի հարևան երկրի՝ Իսպանիայի առաջնությունում: Դա իսկապես մեծագույն մարտահրավեր կլիներ ինձ համար: http://www.vivaronews.am/gevorg-ghazaryaneh-kazmel-e-ir-erazankhi-5-hoganoc-thimeh - Մեր հաջորդ մրցակիցը Ղազախստանի հավաքականն է: Այնտեղ հանդես գալու փորձ ունես դու, ինչպես նաև հավաքականի այլ ֆուտբոլիստներ: Ինչպե՞ս է փոխվել այդ երկրի հավաքականը և ինչպիսի՞ն են մեր շանսերը - Ղազախստանի հավաքականը շատ-շատ է փոխվել: Այն հավաքականից, որին մենք հաղթել էինք 3-0 հաշվով, բառացիորեն ոչինչ չի մնացել: Հիմա ղազախներն ավելի մրցունակ են դարձել: Եվ դա տեղի է ունեցել մեծապես ներքին առաջնության խաղամակարդակի բարձրացման հաշվին: Մի քանի անգամ Եվրոպական ակումբային ամենահեղինակավոր մրցաշարերին մասնակցելով՝ այդ ակումբները լուրջ խթան հանդիսացան Ղազախստանում ֆուտբոլի նկատմամբ հետաքրքրության աճի ու, առհասարակ, մակարդակի բարձրացման համար: - Երկար տարիներ Հայաստանում չես: Փորձե՞լ ես հետևել Հայաստանի առաջնության հանդիպումներին և ու՞ր է գնում հայկական ֆուտբոլը: Կա՞ն հեռանկարներ: - Դեպքից դեպք հետևում եմ Հայաստանի առաջնության հանդիպումներին: Եթե անկեղծ լինեմ՝ մեր առաջնությունը երբեք այսքան թույլ չի եղել: Ես հիշում եմ, թե ինչ առաջնություն էր 5-6 տարի առաջ, և հիմա, որ նայում եմ, միմյանց հետ որևէ աղերս չունեն: Դժվարանում եմ ասել՝ ինչպես կարելի է ոտքի կանգնեցնել հայկական ակումբային ֆուտբոլը, որն օրեցօր ավելի է մոտենում անդունդի հատակին: http://www.vivaronews.am/video/gevorg-ghazaryan-karevorn-ayn-e-or-arthur-petrosyani-galuc-heto-thimum-tramadruthyuneh-bardzracel-e - Բավական ակտիվ ես սոցցանցերում: Շփվու՞մ ես երկրպագուների հետ: - Սիրում եմ ժամանակ անցկացնել սոցցանցերում: Այդ ընթացքում, հնարավորության դեպքում, հասցնում եմ շփվել երկրպագուների հետ: Աշխատում եմ որևէ նամակ անպատասխան չթողնել: Յուրաքանչյուր երկրպագու կարևոր է: - Նկատելի է, որ մեծ սեր ունես խաղակոշիկների նկատմամբ: Քանի՞սն ունես ու ինչպե՞ս ես որոշում դրանց արտաքին տեսքը: - Շատ ճիշտ եք նկատել: Իմ լավ խաղը կախված է լավ խաղակոշիկներից, որոնցից յուրաքանչյուրին մեծ ուշադրություն եմ դարձնում:  Երբեմն ինքս եմ զբաղվում դրանց արտաքին տեսքով, դիզայնով ու պատվիրում եմ: Այս պահին ունեմ 5 զույգ: Դրանք միշտ պիտի փայլեն, արտաքին տեսքը ազդում է խաղիս ու տրամադրությանս վրա: (ժպտում է) - Գաղտնիք չէ, որ սիրում ես ազատ ժամանակդ անցկացնել համակարգչի առջև, մասնավորապես, սիրում ես խաղալ FIFA ֆուտբոլային վիդոխաղ: Ունե՞ս մրցակիցներ հավավաքականի ներսում: - Համակարգչային խաղերը իմ գլխավոր հոբբին էի համարում: Ժամանակին, իսկապես, երբ միայնակ էի ապրում, ընկերներով, մասնավորապես հավաքականի իմ թիմակիցներով, շատ էինք խաղում FIFA ֆուտբոլային վիդեոխաղը: Հիմնական մրցակիցներս Էդգար Մանուչարյանն ու Մալաքյան եղբայրներն էին, սակայն հիմա ազատ ժամանակս փորձում եմ տրամադրել ընտանիքիս ու երեխաներիս: - Ինչ-որ ծրագրեր ունե՞ս որդուդ հետ կապված: Այսինքն մտադի՞ր ես իրեն տանել քո ճանապարհով: - Թեպետ որդիս դեռ 4 տարեկան էլ չկա, բայց այսօր արդեն հետս գալիս է «Մարիտիմուի» պարապմունքներին: Շաբաթը երկու անգամ գալիս է ինձ հետ: Հարցազրույցը վարեց՝ Ռոբերտ Գասպարյանը    
25.03.2017

Որտե՞ղ են հիմա նրանք. Հայաստանի հավաքականի առաջին հաղթանակը տարած կազմը

VivaroNews.am-ը սկսում է նոր շարք, որի նպատակն է անդրադառնալ ֆուտբոլի Հայաստանի հավաքականի անցկացրած կոնկրետ որևէ խաղի մասնակիցների ֆուտբոլային կարիերային և տեղեկացնել, թե նրանք ներկայումս ինչով են զբաղված: Մեր առաջին հրապարակումը վերաբերում է 1995թ. սեպտեմբերի 6-ին Սկոպիեում կայացած Եվրոպայի առաջնության ընտրական մրցաշարի Մակեդոնիա-Հայաստան հանդիպման 14 մասնակիցներին: Այդ խաղը հավաքականի պատմության մեջ հիշարժան է նրանով, որ մեր ընտրանին Սամվել Դարբինյանի գլխավորությամբ պաշտոնական մրցումներում իր առաջին հաղթանակը տոնեց: Ռազմիկ Գրիգորյանի և Արմեն Շահգելդյանի խփած գոլերի շնորհիվ ՀՀ հավաքականը 2:1 հաշվով կամային հաղթանակ տարավ: Հատկանշական է նաև, որ այդ կազմի երեք ֆուտբոլիստներ այժմ ղեկավարում են Հայաստանի հավաքականը։ Ահա թե ինչպես դասավորվեց այդ խաղի մասնակիցների ֆուտբոլային հետագա կարիերան և ներկայումս նրանք ինչով են զբաղված: Արմենակ Պետրոսյան Ֆուտբոլային կարիերան «Արարատում» սկսած դարպասապահը Հայաստանի ազգային հավաքականի կենսագրության առաջին տարիներին իր ավելի փորձառու գործընկեր ու թիմակից Հարություն Աբրահամյանի հետ փոխնիփոխ պաշտպանում էր մեր ընտրանու դարպասը: Մակեդոնացիների նկատմամբ տոնած հաղթանակում էլ  շատ մեծ էր 22-ամյա դարպասապահի ներդրումը, ով խաղավարտից 2 րոպե առաջ հետ մղեց 11մ նշակետից Բոբան Բաբունսկու հարվածը: Առաջին անգամ Պետրոսյանը հավաքականի դարպասը պաշտպանել է 1994թ. մայիսի 15-ին ԱՄՆ-ի ընտրանու հետ Ֆուլերտոնում կայացած ընկերական խաղում: Իսկ վերջին հանդիպումը հավաքականում անցկացրել է 1996թ. նոյեմբերի 9-ին ալբանացիների հետ աշխարհի առաջնության ընտրական մրցաշարի արտագնա խաղում: Հավաքականում Արմեն Պետրոսյանն անցկացրած 7 խաղում 9 գոլ է բաց թողել: Ընդամենը մի քանի մրցաշրջան հանդես գալով «Արարատում» (45 խաղ, 30 բաց թողած գոլ), Արմեն Պետրոսյանը տեղափոխվեց Իրան, որտեղ երկար տարիներ հաջողությամբ պաշտպանում էր տեղի «Սեպահան» և «Զոբահան» թիմերի դարպասը: Ներկայումս 44–ամյա նախկին դարպասապահը բնակվում է Երևանում և զբաղվում է գործարարությամբ:
24.03.2017

Լավագույնների պարգևատրումը և «Ալաշկերտի» մարզչական «քաոսը». Հայկական ֆուտբոլի գլխավոր լուրերի քրոնիկոնը

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք մարտի 24-ի իրադարձությունների քրոնիկոնը: Հենրիխ Մխիթարյանը ստացել է 2016 թվականի Հայաստանի լավագույն ֆուտբոլիստի, իսկ Վարդան Բիչախչյանը՝ լավագույն մարզչի մրցանակը: Պարգևատրվել են նաև լավագույն ֆուտբոլիստի պայքարում 2-3-րդ տեղերը զբաղեցրած համապատասխանաբար Գևորգ Ղազարյանը և Մարկոս Պիզելին: Հենրիխ Մխիթարյան. «Խաղում եմ ազգիս համար, ոչ թե լավագույն ֆուտբոլիստի կոչման»: http://www.vivaronews.am/video/henrix-mxitharyan-xaghum-em-azgis-hamar-och-the-lavaguyn-futbolisti-kochman Գևորգ Ղազարյան. «Կարևորն այն է, որ Արթուր Պետրոսյանի գալուց հետո թիմում տրամադրությունը բարձրացել է»: http://www.vivaronews.am/video/gevorg-ghazaryan-karevorn-ayn-e-or-arthur-petrosyani-galuc-heto-thimum-tramadruthyuneh-bardzracel-e «Ալաշկերտը» պաշտոնապես հայտարարել է գլխավոր մարզիչ Արամ Ոսկանյանի պաշտոնանկության մասին: Նրա հետ թիմից հեռացել են նաև օգնականներ Տիգրան Ասլանյանը և Մանուկ Սարգսյանը: Թիմը կգլխավորի Աբրահամ Խաշմանյանը, ում օրոք «Ալաշկերտը» դարձել էր 2015/16թթ. մրցաշրջանի Հայաստանի չեմպիոն: Վարդան Բիչախչյան. «Մեկ-երկու հաջողությունը Վահան Բիչախչյանին չպետք է շեղի ճիշտ ճանապարհից»: http://www.vivaronews.am/vardan-bichaxchyan-mek-erku-hajoghuthyuneh-vahanin-chpetkh-e-sheghi-tchisht-tchanaparhic-tesanyuth   Ամերիկյան ESPN-ի փորձագետները կանխատեսում են արել Հայաստան - Ղազախստան հանդիպման վերաբերյալ. «Հայաստանի հավաքականը պարտվել է ընտրական փուլի առաջին 3 խաղերում, բայց այնուհետև հաղթել խմբի առաջատարին: Այս անգամ նրանց կհյուրընկալվի Ղազախստանի ընտրանին: Հաղթանակի դեպքում հայերը կարող են պայքարել փլեյ-օֆֆի ուղեգրի համար: Նրանց կարելի է ֆավորիտ համարել առաջիկա խաղում»: Էստոնական «Տալինն» ընկերական խաղում 0-3 հաշվով զիջել է Հելսինկիի «ՀԻԿ»-ին: Սերգեյ Թումասյանը մասնակցել է ամբողջ հանդիպմանը, իսկ Ալեքսանդր Թումասյանը չի հայտնվել թիմի հայտացուցակում: Բաստիան Շվայնշտայգերը պաշտոնապես տեղափոխվել է ամերիկյան «Չիկագո Ֆայր»՝ դառնալով Դավիթ Արշակյանի թիմակիցը: Ղազախստանի Մ-21 հավաքականն ընկերական խաղում 2-3 հաշվով պարտություն է կրել «Կայզերսլաուտեռնի» Մ-21 թիմից: Գևորգ Նաջարյանը մասնակցել է երկրորդ խաղակեսին:
24.03.2017

2050թ. Հենրիխ Մխիթարյանը և Հայաստանի լավագույն ֆուտբոլիստի մրցանակը (ծաղրանկար)

Այսօր Հենրիխ Մխիթարյանը 6-րդ անգամ ստացավ Հայաստանի լավագույն ֆուտբոլիստի մրցանակը։ VivaroNews.am-ը փորձել է պատկերացնել, թե ինչ վիճակում կհայտնվի Մխիթարյանը 2050թ. Նկարազարդումը՝ Սահակ Չիբուխչյան Գաղափարը՝ VivaroTeam
24.03.2017

Հենրիխ Մխիթարյանը կոչով դիմել է Հայաստանի հավաքականի երկրպագուներին (տեսանյութ)

Հայաստանի հավաքականի կիսապաշտպան Հենրիխ Մխիթարյանը Աշխարհի առաջնության որակավորման փուլի Ղազախստանի դեմ հանդիպումից առաջ դիմել է հայ երկրպագուներին:  
24.03.2017

Գևորգ Ղազարյան. «Կարևորն այն է, որ Արթուր Պետրոսյանի գալուց հետո թիմում տրամադրությունը բարձրացել է»

Հայաստանի լավագույն ֆուտբոլիստի մրցանակաբաշխությունից հետո երկրորդ տեղը գրաված Գևորգ Ղազարյանը խոսել է մրցանակի, հավաքականի առաջիկա խաղի և իր մարզավիճակի մասին.
24.03.2017

Հայաստանի լավագույն ֆուտբոլիստներն ու մարզիչը ստացան իրենց մրցանակները (տեսանյութ, լուսանկարներ)

ՀՖՖ տեխնիկական կենտրոնում՝ Ավանի ակադեմիայում տեղի ունեցավ 2016թ. Հայաստանի լավագույն մարզչի ու լավագույն ֆուտբոլիստի մրցանակաբաշխությունը։ Քանի որ լավագույն ֆուտբոլիստի մրցանակաբաշխությունում առաջին երեք տեղը զբաղեցրած ֆուտբոլիստները ձմռանը գտնվում էին ակումբների ենթակայության տակ, մրցանաբաշխության արարողությունը տեղի ունեցավ միայն այժմ։ Հայաստանի լավագույն մարզչի մրցանակը ստացավ «Շիրակի» գլխավոր մարզիչ Վարդան Բիչախչյանը։ Հայաստանի լավագույն ֆուտբոլիստ անվանակարգում երրորդ տեղի մրցանակը ստացավ Մարկոս Պիզելին, երկրորդ տեղի մրցանակը՝ Գևորգ Ղազարյանը, իսկ առաջինը՝ Հենրիխ Մխիթարյանը։ Հանձնելով լավագույն ֆուտբոլիստի մրցանակը հավաքականի ավագին՝ ՀՖՖ նախագահ Ռուբեն Հայրապետյանը նշեց, որ թեև շատ լրագրողներ ֆուտբոլը սպորտ չեն համարում, մենք գիտենք, որ Հայաստանի լավագույն ֆուտբոլիստն ու մարզիչը հենց Մխիթարյանն է։
24.03.2017

Հենրիխ Մխիթարյան. «Խաղում եմ ազգիս համար, ոչ թե լավագույն ֆուտբոլիստի կոչման»

Հայաստանի լավագույն ֆուտբոլիստի մրցանակը ստանալուց հետո Հենրիխ Մխիթարյանը պատասխանեց լրագրողների հարցերին.
23.03.2017

Հայաստանի ֆուտբոլի հավաքականը մրցելու է Անգլիայի հավաքականի դեմ

Մարտի 26-ին տեղի է ունենալու Ֆուտբոլի աշխարհի առաջնության ընտրական փուլի հերթական հանդիպումները: Ընտրական խմբերում լարված իրավիճակ է: E խմբում, որտեղ ընդգրկված է նաև Հայաստանի հավաքականը, ևս սպասվում են հետաքրքիր դիմակայություններ: Հայաստանի հավաքականի մրցակիցը Անգլիայի հավաքական է: Ինչպե՞ս՝ կհարցնեք դուք: Պատասխանը, բնականաբար, շատ պարզ է՝ Վիվառոն տալիս է այդ հնարավորությունը: Ճիշտ է, Հայաստանն այս տուրում խաղալու է Ղազախստանի հավաքականի հետ, իսկ Անգլիան՝ Լիտվայի, բայց Վիվառոյի Mixed Football-ում Հայաստանն ու Անգլիան մրցելու են միմյանց դեմ: Այդ մրցավեճը խոստանում է լինել հետաքրքիր և անկախատեսելի: Mixed Football-ում հաշվարկվում են միայն տվյալ հավաքականի խփած գոլերը: Այստեղ կարևորը թիմի ուժեղությունը կամ հեղինակությունը չէ, այլ այն թե, որ թիմը կգերազանցի մյուսին խփած գնդակների քանակով: Օրինակ, եթե Հայաստանը խփի երկու գոլ, իսկ Անգլիան՝ մեկ, ապա կհաղթի Հայաստանը: Անգլիա - Հայաստան դիմակայությունում սահմանված են գործակիցներ՝ հաղթանակ, պարտություն, ոչ-ոքի ելքերի, ինչպես նաև գոլերի թվերի վերաբերյալ: Վիվառոյի սահմանած գործակիցների լրիվ ցանկին կարող եք ծանոթանալ անցնելով հղումով: Անհնարին թվացող ֆուտբոլային հանդիպումները այսքանով չեն սահմանափակվում, Mixed Football-ում սպասվում են ֆանտաստիկ խաղեր, որոնց կարող եք ծանոթանալ այցելելով vivarobet.am կայք:
23.03.2017

Հենրիխ Մխիթարյանի բարեգործական այցը Ռ. Յոլյանի անվան Արյունաբանական կենտրոն (ԼՈՒՍԱՆԿԱՐՆԵՐ, ՏԵՍԱՆՅՈՒԹ)

ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: