Հայաստանի ազգային հավաքական | Էջ - 5

24.11.2016

Հայաստանի հավաքականը մեծ թռիչք է կատարել ՖԻՖԱ-ի վարկանիշային աղյուսակում

ՖԻՖԱ-ն նոյեմբերի 24-ին հրապարակել է ազգային հավաքականների վարկանիշային նոր աղյուսակը: Հայաստանի հավաքականը 38 հորիզոնականի թռիչք է կատարել ու հայտնվել է 87-րդ տեղում: Մեր մրցակիցներից Ղազախստանի հավաքականը 97-րդն է, Չեռնոգորիան 63-րդն է, Դանիան՝ 46-րդը, Ռումինիան՝ 39-րդը, իսկ Լեհաստանը մնացել է 15-րդ հորիզոնականում: Աղյուսակը շարունակում է գլխավորել Արգենտինայի հավաքականը, Բրազիլիան շրջանցել է Գերմանիային և բարձրացել երկրորդ հորիզոնական, 4-րդ տեղում Չիլին է, այնուհետև՝ Բելգիան: Լավագույն տասնյակում են նաև Կոլումբիան, Ֆրանսիան, Պորտուգալիան, Ուրուգվայը և Իսպանիան:
17.11.2016

10 հետաքրքիր փաստ Գևորգ Ղազարյանի ֆուտբոլային կարիերայից

«Փյունիկի» մարզադպրոցի սանը թիմի հիմնական կազմում ելույթները սկսել է 2005թ.-ից` 17 տարեկանում: «Փյունիկի» հոլանդացի մարզիչ Հենկ Վիսմանն առաջին անգամ տակավին պատանի ֆուտբոլիստին հիմնական կազմում խաղադաշտ դուրս բերեց հուլիսի 6-ին Երևանի «Լեռնագործի» հետ հանդիպման ընդմիջումից անմիջապես հետո` փոխարինելով Աղվան Մկրտչյանին: Այդ տարի Գևորգը թիմի հիմնական կազմում մասնակցեց 11 հանդիպման: Ընդհանուր առմամբ Ղազարյանը «Փյունիկում» 2005-2011թթ. ՀՀ առաջնություններում 122 խաղ է անցկացրել:
14.11.2016

Մխիթարյանի անհատական գործողությունները՝ Չեռնոգորիայի հետ խաղում (տեսանյութ)

Չեռնոգորիայի հետ Աշխարհի առաջնության որակավորման փուլի խաղում Հենրիխ Մխիթարյանն անցկացրեց 90 րոպե: Նրա բոլոր գործողությունները ներառված են տեսանյութում.
13.11.2016

Հենրիխ Մխիթարյան. «Արև քիչ կա, բայց լողափ գնալու համար չեմ տեղափոխվել Մանչեսթեր»

Հայաստանի ազգային հավաքականի առաջատար և «Մանչեսթեր Յունայթեդի» 27-ամյա կիսապաշտպան Հենրիխ Մխիթարյանը ծավալուն հարցազրույց է անցկացրել ՀՖՖ պաշտոնական կայքի հետ: Նշենք, որ հարցազրույցն անցկացվել է Հայաստան-Չեռնոգորիա խաղից առաջ: -Հենրիխ, ի՞նչն էր քեզ ամենից շատ գրավում ֆուտբոլում, երբ երեխա էիր: - Ինձ ոգեշնչողը հայրս էր, ես երազում էի դառնալ նրա նման ֆուտբոլիստ։ -Որո՞նք են լավագույն հիշողություններդ այն  տարիներից, երբ նոր էիր սկսում ֆուտբոլային կարիերադ «Փյունիկում»: - Ես 7 տարեկան էի, երբ սկսեցի մարզվել «Փյունիկում»։ Ես շատ երջանիկ էի, երբ հետագայում միացա «Փյունիկի» հիմնական թիմին։ Դա իմ կարիերայի վաղ շրջանի ամենահուզիչ պահերից մեկն էր ինձ համար։ -Ե ՞րբ հասկացար, որ ֆուտբոլը ոչ միայն զվարճանք է, այլ կարող  է դառնալ կյանքիդ հիմնական զբաղմունքը: - Ես միշտ երազել եմ պրոֆեսիոնալ ֆուտբոլիստ դառնալու մասին, և երբ երազանքդ կատարվում է, և դու սկսում ես քո ճանապարհը, դու անհավանական երջանկություն ես զգում։ Երբ ես տեղափոխվեցի իմ առաջին արտասահմանյան ակումբը՝ Դոնեցկի«Մետալուրգ», հասկացա, որ կարող եմ շարունակել առաջխաղացումս և ֆուտբոլային լավ կարիերա ունենալ։ -Ինչպե՞ս կբնութագրես հայկական ֆուտբոլն այն ժամանակ, երբ նոր էիր սկսում և այսօր: Ի՞նչ է փոխվել: - Ներկայումս Հայաստանի առաջնությունն ավելի թույլ է, քան այն ժամանակ, երբ ես էի հանդես գալիս Հայաստանում, մրցակցությունն այն ժամանակ ավելի բարձր էր։ -Եղե՞լ է պահ, երբ կարող էիր թողնել ֆուտբոլը: Եթե այո՝ ապա ի՞նչը ստիպեց չթողնել այն և ինչպե՞ս հաղթահարեցիր պահը: - Երբեմն ֆուտբոլիստի կարիերայի ընթացքում լինում են դժվար ժամանակներ, բայց երբեք պետք չէ հանձնվել։ Երբեմն կարող ես ունենալ մտքեր, որ պետք է կանգ առնել։ Դա մարդկային բնական զգացողություն է, բայց դա չի կարող քեզ ստիպել դադարեցնել այն, ինչ դու սկսել ես։ Դու պետք է ուժ գտնես վատ մտքերը վանելու համար։ -Փոքր տարիքից եղել ես ուշադրության կենտրոնում: Ինչպե՞ս ես վերաբերվել մարդկանց այն պնդումներին, որ անպայման մեծ ֆուտբոլիստ ես դառնալու: - Իմ հայրը, իրոք, շատ հայտնի ֆուտբոլիստ էր, բայց ես շատ ճնշում չեմ զգացել փոքր տարիքում։ Իմ ընտանիքն ինձ հնարավորություն ընձեռեց ընտրել ֆուտբոլիստ դառնալու և այլ մասնագիտությամբ շարունակելու միջև, և ես որոշում կայացրեցի ընտրել ֆուտբոլային ուղին։ -Կարո ՞ղ ես հիշել առաջին խաղդ և գոլդ «Փյունիկի» առաջին թիմի կազմում: - Իհարկե հիշում եմ։ Ես գոլի հեղինակ դարձա «Փյունիկի» կազմում իմ առաջին իսկ խաղում՝ գրավելով «Շիրակի» դարպասը։ Ես շատ ուրախ էի այդ պահին։ -Ընդամենը 17 տարեկան էիր, երբ նշեցիր նորամուտդ Հայաստանի ազգային  հավաքականում. Ի՞նչ էիր զգում այդ պահին: - Շատ երջանիկ էի այդ պահին։ Մեծ պատիվ էր հրավեր ստանալ ազգային հավաքականից։ Ես իրոք ուզում էի խաղալ իմ ազգի համար և շատ աշխատանք եմ տարել ազգային հավաքականի կարևոր խաղացող դառնալու համար։ Հարցազրույցն ամբողջությամբ՝ այստեղ
13.11.2016

Հայաստան – Չեռնոգորիա. Խաղի տեսագրությունը

Ներկայացնում ենք Հայաստան - Չեռնոգորիա ֆանտաստիկ հանդիպման տեսագրությունը:
13.11.2016

Վերջին 4 մրցաշրջաններում ՀՀ հավաքականն իր լավագույն արդյունքը գրանցեց

Չեռնոգորիայի հավաքականի հետ ընտրական մրցախաղով Հայաստանի ազգային հավաքականն ավարտեց ելույթները մրցաշրջան-2016-ում: Եթե զուտ գրանցված ընդհանուր արդյունքները (8 խաղ, +3=1-4, 15:14) հաշվի առնենք, ապա վերջին 4 տարիներին սա հավաքականի համար լավագույն մրցաշրջանն էր: Սակայն հավաքականի ցուցադրած խաղի և ընտրական մրցաշարում ցույց տված արդյունքների առումով մրցաշրջան-2016-ը բնավ էլ հաջողված չի կարելի համարել: Ազգային հավաքականը Վարուժան Սուքիասյանի գլխավորությամբ մրցաշրջանը սկսեց մարտին բելառուսների հետ երևանյան ընկերական խաղում գրանցված գոլազուրկ ոչ-ոքիով: Ապա հետևեցին ամերիկյան շրջագայության ժամանակ խոշոր հաշվով տարած հաղթանակները Գվատեմալայի (7:1) և Սալվադորի (4:0) հավաքականների նկատմամբ, որոնք ֆուտբոլասերներին լավատեսորեն տրամադրեցին: Սակայն ընտրական մրցաշարի մեկնարկից առաջ ընկերական խաղում չեխերից 0:3 հաշվով կրած պարտությունը խիստ մտահոգության առիթ տվեց, որն անհիմն չէր: Մեր ֆուտբոլիստները պարզապես ձախողեցին ընտրական մրցաշարի մեկնարկը՝ պարտությոններ կրելով Դանիայի (0:1), Ռումինիայի (0:5) և Լեհաստանի (1:2) ընտրանիների հետ կայացած հանդիպումներում: Բարեբախտաբար, հավաքականը մրցաշրջանն ավարտեց հաղթական նոտայով: Փառք ու պատիվ հավաքականի նորանշանակ գլխավոր մարզիչ Արթուր Պետրոսյանին և նրա գլխավորած մարզչական շտաբին ու ֆուտբոլիստներին, որոնք վերադարձրին երկրպագուների սերն ու հավատն ազգային ընտրանու նկատմամբ, կրկին լավատեսորեն տրամադրեցին նրանց: Հայաստանի ազգային հավաքականը 10-րդ անգամ մրցաշրջանն ավարտեց նոյեմբերին: Մեր ֆուտբոլիստները բավական անհաջող են խաղացել աշնան վերջին ամսին՝ 11 հանդիպումներում տոնելով ընդամենը 3 հաղթանակ, 2 խաղ ավարտելով ոչ-ոքի, կրելով 6 պարտություն: ՀՀ հավաքականը խփել է 12 գոլ, սեփական դարպասը բաց է թողել 16 գնդակ: Չեռնոգորիայի հավաքականի նկատմամբ տարած հաղթանակն առաջինն է նոյեմբերին անցկացրած ընտրական 9 հանդիպումներում: Հետաքրքիր է, որ դրանցից 6-ը կայացել են Եվրոպայի առաջնությունների ընտրական մրցաշարերում և բոլորում էլ մեր ֆուտբոլիստները պարտվել են: Իսկ ահա աշխարհի առաջնությունների ընտրական մրցաշարերի նոյեմբերյան նախորդ 2 հանդիպումներն էլ ավարտվել են ոչ-ոքի: Նոյեմբերին տարած նախորդ 2 հաղթանակներն էլ մեր հավաքականի օգտին գրանցվել են ընկերական հանդիպումներում: Առաջին հաղթանակը մեր ընտրանին տոնել է 1998թ.՝  Սուրեն Բարսեղյանի գլխավորությամբ Աբովյանում 2:1 հաշվով պարտության մատնելով էստոնացիներին: Այդ խաղում ազգային հավաքականում իրենց նորամուտը նշեցին միանգամից 10 ֆուտբոլիստներ, որոնցից Կարեն Բարսեղյանն ու Կարեն Սիմոնյանը դարձան գոլերի հեղինակներ: 2-րդ հաղթանակը նոյեմբերին մեր հավաքականը տոնել է 2012թ.՝ Երևանում 4:2 հաշվով պարտության մատնելով լիտվացիներին: Դա հավաքականում Սարգիս Հովսեփյանի հրաժեշտի խաղն էր: Ընթացիկ մրցաշրջանում անցկացրած 8 հանդիպումներում հավաքականի կազմում ընդհանուր առմամբ խաղադաշտ են դուրս եկել 32 ֆուտբոլիստներ, որոնցից Արսեն Բեգլարյանը, Գոռ Մալաքյանը, Գեղամ Կադիմյանը, Տիգրան Բարսեղյանը, Բենիկ Հովհաննիսյանը, Սերգեյ Ավագիմյանը, Դավիթ Հակոբյանը, Գևորգ Հովհաննիսյանը և Դավիթ Արշակյանը նորամուտն են նշել ազգային թիմում: Հավաքականի խփած 15 գոլերից 3-ն իր օգտին է գրանցել Հենրիխ Մխիթարյանը, 2-ը՝ Գեղամ Կադիմյանը: Մեկական գոլի հեղինակ են դարձել Էդգար Մանուչարյանը, Արթուր Սարկիսովը, Զավեն Բադոյանը, Հովհաննես Համբարձումյանը, Տիգրան Բարսեղյանը, Մարկոս Պիզելին, Արտակ Գրիգորյանը, Վարազդատ Հարոյանն  ու Գևորգ Ղազարյանը, ինչպես նաև Սալվադորի հավաքականի պաշտպան Խավիեր Գարսիան՝ գրավելով սեփական դարպասը: VivaroNews.am-ը ներկայացնում է Հայաստանի ազգային հավաքականի ցուցանիշները տարբեր մրցաշրջաններում: Թ Խ Հ Ո Պ Գ Մ % Ռմբարկուն Գոլ 1992 1 0 1 0 0:0 1 33,3 - - 1994 5 1 1 3 1:5 4 26,6 - - 1995 7 1 1 5 5:13 4 19 Ռազմիկ Գրիգորյան Արմեն Շահգելդյան 2 2 1996 9 1 3 5 5:23 6 22,2 - - 1997 9 1 2 6 5:26 5 18,5 Էրիկ Ասադուրյան 2 1998 5 3 1 1 6:4 10 66,6 Տիգրան Եսայան 2 1999 9 1 1 7 5:15 4 14,8 Արմեն Շահգելդյան 2 2000 9 2 3 4 11:13 9 33,3 Արթուր Պետրոսյան 4 2001 8 1 4 3 6:14 7 29,1 - - 2002 3 1 1 1 4:4 4 44,4 - - 2003 7 2 0 5 5:14 6 28,5 Արթուր Պետրոսյան Ալբերտ Սարգսյան 2 2 2004 9 2 2 5 8:17 8 29,6 Արման Քարամյան Արտավազդ Քարամյան 2 2 2005 9 2 1 6 8:16 7 25,9 Արա Հակոբյան 3 2006 6 0 1 5 0:9 1 5,55 - - 2007 12 3 4 5 7:12 13 36,1 Ռոբերտ Արզումանյան 3 2008 10 3 2 5 7:17 11 36,6 Արա Հակոբյան 2 2009 8 1 2 5 6:14 5 20,8 - - 2010 7 3 1 3 14:11 10 47,6 Հենրիխ Մխիթարյան Էդգար Մանուչարյան Յուրա Մովսիսյան 3 3 3 2011 8 3 1 4 14:11 10 41,6 Հենրիխ Մխիթարյան 4 2012 9 4 0 5 13:12 12 44,4 Մարկոս Պիզելի Գևորգ Ղազարյան Հենրիխ Մխիթարյան Արաս Օզբիլիս 2 2 2 2 2013 9 3 2 4 11:12 11 40,7 Յուրա Մովսիսյան 4 2014 9 1 1 7 8:23 4 14,8 Հենրիխ Մխիթարյան 4 2015 6 0 1 5 3:14 1 5,55 - - 2016 8 3 1 4 15:14 10 41,6 Հենրիխ Մխիթարյան 3 Աշոտ Հայրապետյան
12.11.2016

Ինչպիսին կլինի Արթուր Պետրոսյանի նոր` Հայաստանի հավաքականը

Արթուր Պետրոսյանի վերադարձը հայկական ֆուտբոլ նման էր Ձմեռ Պապի այցի. նա եկավ ու բարություն սփռեց շուրջբոլորը, ու վերջում չմոռացավ նաև բոլորին նվերներ հանձնել` ֆուտբոլիստներին, երկրպագուներին և նույնիսկ լրագրողներին, ովքեր արդեն վաղուց չէին հավատում Ձմեռ Պապի գոյությանը: Այս մեծ ցնծությունից ուշքի գալով` պետք է բացել տուփերը և լավ զննել նվերները, տեսնել, թե իրականում ինչ է տվել Արթուր Պետրոսյանը հավաքականին: Առաջին խաղից հետո հետևություններ անելը միանշանակ սխալ է ֆուտբոլային վերլուծության տեսանկյունից: Ուստի իմ բոլոր դիտարկումները փորձել եմ նախ կառուցել զուտ չոր թվային փաստերի վրա, իսկ երկրորդ` խնդրում եմ այս ամենը ընդունել որպես հում հիպոթեզներ, որոնք դեռ 1-2 խաղ եփվելու կարիք ունեն: Ինչպես Արթուր Պետրոսյանն է նշում` պետք է համեստ մնալ ու քայլ առ քայլ առաջ շարժվել: Փաստ 1. Հայաստանի հավաքականն իր պատմության մեջ միայն 2-րդ պաշտոնական խաղում է երկրորդ խաղակեսում 3 գոլ խփում: Փաստ 2. Մեր հավաքականը մինչ այս միայն 1 անգամ է կամային հաղթանակ տոնել պաշտոնական խաղում` 1-2 հաշվով: Դա եղել է ԵՎՐՈ-1996-ի ընտրական փուլում, Մակեդոնիայի դեմ արտագնա խաղում, երբ Արթուր Պետրոսյանը խաղադաշտում էր, իսկ նրա այժմյան օգնականներից Սարգիս Հովհաննիսյանը թիմի ավագն էր, իսկ Ռազմիկ Գրիգորյանը` գոլերից մեկի հեղինակը: 3 տարվա անհաջող շարքից հետո 2 գնդակ ընդունել, բայց չկորցնել հավատը` փառահեղ նվաճում է: Հայաստանի հավաքականի համար դա ոչ միայն փառահեղ նվաճում է, այլև լրիվ նոր բան: Մեր տղաները հավաքականի գոյության 24 տարվա ընթացքում դեռ երբեք չեն կարողացել հետ գալ ու հաղթել 2 գոլի տարբերությունից: Չեռնոգորիայի հավաքականի մարզիչը խաղից հետո նշեց` Հայաստանի թիմի ֆուտբոլիստները մինչև վերջին րոպեն գիտեին, թե իրենք ինչ են ուզում: Այդպես էլ կար: Մեր թիմը երբեք նման նվիրված չէր կառչել արդյունքից ու չէր պայքարել մինչև վերջ: Դա չի նշանակում, թե տղաները նախկինում նվիրված չեն եղել: Ուղղակի, խաղալ արդյունքի համար, դա այլ է, քան խաղալ սեփական պատվի, հայրենիքի կամ հանդիսատեսի համար: Երբ հավատը թույլ է, 0-2-ից հետո կարող ես պայքարել 1 գնդակի համար, կարող ես ուղղակի լավ խաղ ցույց տալ հանդիսականների աչքերին, բայց առավելագույնը` կարող ես ոչ-ոքիի հասնել ու բավարարվել դրանով: Նման խաղերում հաղթելու համար պետք է հավատ: Արթուր Պետրոսյանը տվել էր տղաներին այդ հավատը: Փաստը այն է, որ մեր հավաքականը նախկինում միայն մեկ անգամ էր երկրորդ կեսում 3 գոլ խփել, ավելի ճիշտ` 4: Դա Սլովակիայում կայացած հայտնի հանդիպումն էր: Սակայն, այնտեղ մեր տղաները ուղղակի բռնեցին ալիքը, ու առաջին գոլից հետո հաջորդ ցանկացած գոլ տպավորիչ էր, բայց ոչ որոշիչ: Երեկ Հայաստանի հավաքականը խփեց 3 տպավորիչ ու միաժամանակ որոշիչ գոլեր: Մեր հավաքականը միշտ խաղի ելքը կանխորոշում էր ի սկզբանե` կամ առաջին գոլով բացում էր մրցակցին, խփում էլի ու հաղթում, կամ ընդունում առաջինը, ու պարտվում, իսկ առավելագույնը` ոչ-ոքի կորզում: Մեր տղաները երբեք չեն եղել խաղի ընթացք բեկող թիմ, հատկապես` վերջին տարիների հավաքականը: Իսկ երեկ... Հուսանք, Արթուր Պետրոսյանի մեր նոր հավաքականը միշտ կխաղա ու կհավատա 90+3 րոպե: Կարեն Ռաֆայելյան
12.11.2016

Արթուր Պետրոսյանի մարզական սխրանքը հաջողվել էր միայն Միխայ Ստոյկիցային

Ընդամենը մեկ շաբաթ առաջ Հայաստանի ազգային հավաքականի ղեկը ստանձնած Արթուր Պետրոսյանին հաջողվեց իր սաների հետ առաջին 3 միավորը վաստակել աշխարհի առաջնության ընտրական մրցաշարում: Պետրոսյանը կրկնեց ռումինացի Միխայ Ստոյկիցայի արդյունքը, ով 2003թ. մարտին փոխարինելով արգենտինացի Օսկար Լոպեսին, ընդամենը մեկ շաբաթ անց հաղթանակով նշեց նորամուտն ընտրական մրցախաղում: Մարտի 29-ին ՀՀ հավաքականը Ստոյկիցայի գլխավորությամբ «Հանրապետական» մարզադաշտում Եվրոպայի առաջնության ընտրական մրցախաղում հաղթեց Հս. Իռլանդիայի ընտրանուն: Հետաքրքիր է, որ մեր հավաքականին հաղթանակ պարգևեց ներկայիս գլխավոր մարզիչ Արթուր Պետրոսյանի՝ խաղավարտից 4 րոպե առաջ խփած միակ գոլը: Մինչ այդ հավաքականն ընտրական մրցաշարի 2 հանդիպումներում ընդամենը 1 միավոր էր վաստակել: Ի տարբերություն Ստոյկիցայի, Արթուր Պետրոսյանը հավաքականի ղեկը ստանձնել էր ավելի բարդ իրավիճակում, քանի որ Վարուժան Սուքիասյանի օրոք հավաքականը պարտվել էր մեկնարկային 3 հանդիպումներում էլ: Աշխարհի և Եվրոպայի առաջնությունների ընտրական 12 մրցաշարերից միայն 5-ում է Հայաստանի հավաքականը մեկնարկից մինչև վերջնագիծ հանդիպումներն անցկացրել միևնույն մարզչի գլխավորությամբ: Նման բախտի են արժանացել Խորեն Հովհաննիսյանը(1998թ. ԱԱ), Սուրեն Բարսեղյանը (2000թ. ԵԱ), Վարուժան Սուքիասյանը (2002թ. ԱԱ) և Վարդան Մինասյանը (2012թ. ԵԱ, 2014թ. ԱԱ): Իսկ ահա ընտրական մյուս 7 մրցաշարերի ընթացքում հավաքականի մարզիչը փոխվել է: Ընտրական մրցաշարերի մեկնարկում բոլորից կարճ ժամանակահատված է հավաքականը գլխավորել արգենտինացի Օսկար Լոպեսը: 2004թ. Եվրոպայի առաջնության ընտրական մրցաշարում նրա օրոք հավաքականը 2002թ. երկու հանդիպում է անցկացրել: Մեկնարկային խաղում մեր ընտրանին Երևանում ոչ-ոքի է (2:2) խաղացել ուկրաինացիների հետ, ապա հյուրընկալվելիս 0:2 հաշվով զիջել է հույներին: 2002թ. մրցաշրջանի ավարտից հետո Լոպեսը հեռացավ Հայաստանի հավաքականից և «Փյունիկից», որին արժանացրել էր ՀՀ չեմպիոնի, գավաթակրի և սուպերգավաթակրի տիտղոսներին: Հատուկ պետք է նշել շոտլանդացի Իան Պորտերֆիլդին: Եթե անբուժելի հիվանդությունը չընդհատեր նրա կյանքը, ապա Պորտերֆիլդը մինչև 2008թ. Եվրոպայի առաջնության ընտրական մրցաշարի ավարտը կգլխավորեր հավաքականը: Ցավոք, ընտրական մրցաշարի 8-րդ տուրում 2007թ. օգոստոսի 22-ին պորտուգալացիների հետ Երևանում կայացած մրցախաղը, որում գրանցվեց ոչ-ոքի (1:1), Պորտերֆիլդի համար վերջինն էր ՀՀ հավաքականի գլխավոր մարզչի պաշտոնում: Պորտերֆիլդը լավ ժառանգություն էր թողել իր օգնական Թոմ Ջոնսին: Շոտլանդացի մասնագետի գլխավորությամբ ազգային հավաքականը վերջին 3 հանդիպումներում վերելքով էր հանդես եկել՝ վաստակելով 7 միավոր: Ուստի պատահական չէր, որ Թոմ Ջոնսի գլխավորությամբ մեր հավաքականն ընտրական հաջորդ խաղում գոլազուրկ ոչ-ոքի ավարտեց մրցավեճը սերբերի հետ: Որքան էլ որ զարմանալի է, սակայն 2006թ. աշխարհի առաջնության ընտրական մրցաշարը ձախողած ֆրանսիացի Բեռնար Կազոնին բավական երկար մնաց ազգային հավաքականի գլխավոր մարզչի պաշտոնում: Միայն ընտրական մրցաշարի 7-րդ տուրից հետո նա պաշտոնանկ արվեց: VivaroNews.am-ը ներկայացնում է ընտրական մրցաշարի ընթացքում կատարված մարզչական փոփոխության ժամանակ նախկին մարզիչների ցուցանիշներն ու նոր մարզիչների գրանցած արդյունքներն ընտրական մրցաշարի իրենց առաջին խաղում: ԸՄ Նախկին մարզիչ Խ Հ Ո Պ Գ Մ Նոր մարզիչ 1-ին խաղը Մրց. 1996 Էդուարդ Մարգարով 3 0 1 2 0:4 1 Սամվել Դարբինյան Իսպանիա՝ 0:2 ԵԱ 2004 Օսկար Լոպես 2 0 1 1 2:4 1 Միխայ Ստոյկիցա Հս. Իռլանդիա՝ 1:0 ԵԱ 2006 Բեռնար Կազոնի 7 1 1 5 4:15 4 Հենկ Վիսման Մակեդոնիա՝ 1:2 ԱԱ 2008 Իան Պորտերֆիլդ 8 2 2 4 4:8 8 Թոմ Ջոնս Սերբիա՝ 0:0 ԵԱ 2010 Յան Պոուլսեն 5 0 1 4 3:14 1 Վարդան Մինասյան Էստոնիա՝ 0:1 ԱԱ 2016 Բեռնարդ Շալանդ 4 0 1 3 3:6 1 Սարգիս Հովսեփյան Պորտուգալիա՝ 2:3 ԵԱ 2018 Վարուժան Սուքիասյան 3 0 0 3 1:8 0 Արթուր Պետրոսյան Չեռնոգորիա՝  3:2 ԱԱ ՀՀ հավաքականը կրկնեց աշխարհի առաջնությունների ընտրական մրցաշարերի մեկնարկային 4 հանդիպումներում ցույց տված իր լավագույն արդյունքը: Մեր ընտրանին 4 խաղում 3 միավոր էր վաստակել նաև 1998 և 2014թթ. ընտրական մրցաշարերում: 1998թ. ընտրական մրցաշարում հավաքականը Խորեն Հովհաննիսյանի գլխավորությամբ մեկնարկային երկու հանդիպումներում ոչ-ոքի էր խաղացել պորտուգալացիների (0:0) և հյուսիսիռլանդացիների (1:1) հետ, այնուհետև պարտվել էր Գերմանիայի ընտրանուն (1:5) և կրկին ոչ-ոքի խաղացել ալբանացիների հետ (1:1): 2014թ. ընտրական մրցաշարը հավաքականը Վարդան Մինասյանի գլխավորությամբ սկսել էր հյուրընկալվելիս Մալթայի ընտրանու նկատմամբ տոնած նվազագույն հաշվով հաղթանակով, որին հաջորդել էին պարտությունները բուլղարացիների (0:1), իտալացիների (1:3) և չեխերի (0:3) հետ մրցախաղերում: VivaroNews.am-ը ներկայացնում է Հայաստանի հավաքականի ցուցանիշներն աշխարհի առաջնությունների ընտրական մրցաշարերի մեկնարկային 4 հանդիպումներում: ԸՄ Խ Հ Ո Պ Գ Մ 1998 4 0 3 1 3:7 3 2002 4 0 2 2 5:7 2 2006 4 0 0 4 1:11 0 2010 4 0 0 4 1:12 0 2014 4 1 0 3 2:7 3 2018 4 1 0 3 4:10 3 Աշոտ Հայրապետյան
12.11.2016

Հայաստանի Մ-19 -Իտալիայի Մ-19. Մերոնք վերջին պահին բաց են թողնում միավորը

Եվրոպայի Մ-19 առաջնություն, տուր 2 Հայաստան Մ-19 1- 2 Իտալիա Մ-19 Երևան, «Բանանց» մարզադաշտ Գոլեր՝Կուտրոնե 13՛, 0-1, Պետրոսյան 81՛, 1-1, Մարկիցա 90՛+3՛ 1-2 (11 մետրանոց)
12.11.2016

Հայաստան Մ-19-Իտալիա Մ-19. Ուղիղ եթեր + մեկնարկային կազմեր

Եվրոպայի Մ-19 առաջնություն, տուր 2 Հայաստան Մ-19-Իտալիա Մ-19 Երևան, «Բանանց» մարզադաշտ Նոյեմբերի 12, ժամը՝ 15:00 Ներկայացնում ենք մեկնարկային կազմերը: Հայաստան Մ-19 12. Նիկոլաս Մելիքյան 2. Էդգար Գրիգորյան 3. Հայկ Սարգսյան 4. Հովհաննես Նազարյան 5. Էմիլ Ղուկասյան 6. Էրիկ Վարդանյան 7. Հայկ Գալստյան 9. Էրիկ Պետրոսյան 11. Հովհաննես Հարությունյան 13. Պետրոս Տեր-Պետրոսյան 18. Վահան Բիչախչյան Պահեստայիններ՝ 1. Մարկ Գրիգորյան 8. Արթուր Նադիրյան 14. Իշխան Մանուկյան 15. Էդգար Մովսիսյան 16. Ալբերտ Մնացականյան 17.Դավիթ Բաղդասարյան Գլխավոր մարզիչ՝ Արամ Ոսկանյան
ԹԵԺ ԵՎ ԲԱՑԱՌԻԿ

Vivaro News

Հասցե - Գետառի 4/17 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: