Հայաստանի ազգային հավաքական | Էջ - 38

23.03.2016

Ռուբեն Հայրապետյան. «ՖԱՖ-ը երկրպագու չէ և եթե շարունակեն հակաֆուտբոլային արարքներ դրսևորել այլևս մարզադաշտ ոտք չի դնի»

Իսկ ո՞վ է ասել, որ ՖԱՖ-ը հավաքականի երկրպագու է: ՖԱՖ-ը երկրպագու չէ, «Ֆուտբոլ +» շաբաթաթերթին տված հարցազրույցում ասել է Հայաստանի ֆուտբոլի ֆեդերացիայի նախագահ Ռուբեն Հայրապետյանը: -ՖԱՖ-ը դժգոհել է, որ ֆեդերացիան իրենց համար ֆիքսված տեղերի տոմսեր չի վաճառել, երբ այդ տեղերն ազատ են եղել: Ի՞նչն է արգելքի պատճառը: -Ո՞րն է իրենց տեղը: Իրե՞նք են որոշում: Հավաքականի երկրպագուների համար, իրոք, ֆիքսված տեղ կա: Իսկ ո՞վ է ասել, որ ՖԱՖ-ը հավաքականի երկրպագու է: ՖԱՖ-ը երկրպագու չէ: Նրանք արհեստական և քաղաքական ինտրիգներ են սարքում: Նրանք եթե շարունակեն հակաֆուտբոլային արարքներ դրսևորել, մարզադաշտ այլևս ոտք չեն դնի: Նրանք ճանաչվելու են հակաֆուտբոլային մարդիկ և դուրս են մնալու: Մենք հեռարձակման իրավունքները վաճառել ենք: Նրանք իրավունք ունե՞ն իրենց լոգոները բերելու և անվճար գովազդելու: Կվճարեն, համապատասխան թույլտվություն կունենան՝ կանեն: Իրենք սովոր են ձրի տոմս ստանալ և վերավաճառել կամ ֆեդերացիայից 2000 դրամով վերցնել և 3000-ով վաճառել: Հիմա դա չկա՝ դժգոհո՞ւմ են: Աղբյուրը ՝ haynews.am
23.03.2016

Ռուբեն Հայրապետյան. «Մովսիսյանին, Արզումանյանին և Կասպարովին այլևս հավաքականում չենք տեսնի»

Հայաստանի ֆուտբոլի ֆեդերացիայի նախագահ Ռուբեն Հայրապետյանը  հայտարարել է, որ  հավաքականի որոշ առաջատարներ այլևս չեն հրավիրվելու ազգային ընտրանի: «Յուրա Մովսիսյանին, Ռոբերտ Արզումանյանին ու Գևորգ Կասպարովին հավաքական չհրավիրելն իմ պահանջն է. նրանք այլևս չեն լինելու մեր գլխավոր թիմում: Նշված ֆուտբոլիստների վերջին 2 տարիների ելույթները հավաքականում ձեր աչքի առջև են եղել: Թող մեկն ինձ ասի, որ Մովսիսյանը և Արզումանյանը նվիրված պայքարել ու խաղացել են: Այո, նրանք ունեն ֆուտբոլային բարձր որակներ, բայց դա չի նշանակում, որ հավաքականը նրանց համար զբոսանքի կամ զվարճանքների վայր է, որ գան ու զվարճանան: Հավաքականը պարտվում է 0:3 հաշվով, ֆուտբոլիստը նստում է ավտոբուս, ատամները բացում մինչև ականջները: Ինչի՞ համար է ուրախանում: Դավաճանությունը միայն խաղը վաճառելը չէ: Դու գալիս ես հավաքական, տեղ ես զբաղեցնում, ասում ես պատրաստ ես, բայց չես խաղում: Լավ, եթե Յուրա Մովսիսյանի հարցում մենք ենք մեղավոր, բա Մոսկվայի «Սպարտակից» նրան ինչո՞ւ հեռացրին: Բոլորդ տեսել եք, նա ֆուտբո՞լ է խաղացել վերջին 2 տարում, իհարկե ոչ: Իսկ Ռոբերտ Արզումանյանի հարցազրույցներն ու հայտարարությունները տալիս են ամեն ինչի պատասխանը: Նա այդ քայլով ինքն իրեն մատնեց: Դրա համար ես չեմ ուզում անդրադառնալ այդ մարդկանց և ցանկանում եմ հայտարարել, որ քանի դեռ ես ֆեդերացիայի նախագահն եմ, նրանք ոտք չեն դնելու հավաքական: Ինձ մեղադրում են, որ խառնվում եմ ընտրանու ներքին գործրին: Ֆուտբոլի ֆեդերացիայի նախագահը համար մեկ պատասխանատու է և պարտավոր է միջամտել հավաքականի գործերին: Եթե ես չմիջամտեմ, ո՞վ պետք է միջամտի: Այլ բան է, որ հավաքականի գործերին չպետք է միջամտեն կողմնակի մարդիկ»: ՀՖՖ-ի ղեկավարը նաև խոսել է պորտուգալական «Մարիտիմուի» կիսապաշտպան Գևորգ Ղազարյանի` հավաքական չհրավիրվելու մասին. «Գևորգ Ղազարյանը չի մտնում այդ ֆուտբոլիստների մեջ (որոնք չեն հրավիրվելու.խմբ.) և նրան պետք է տարանջատել նշված 3-ից: Նա հավաքական չի հրավիրվել ոչ թե այն պատճառով, որ ես չեմ ուզում, այլ նոր գլխավոր մարզչի որոշմամբ»:   Աղբյուրը ՝ «Ֆուտբոլ +»
22.03.2016

Հենրիխ Մխիթարյանի ու Արաս Օզբիլիզի գեղեցիկ գոլերը՝ մարզման ժամանակ

22.03.2016

Հայաստանի ազգային հավաքականի մարզումը ` լուսանկարներով

 
22.03.2016

Գոռ Մալաքյան. «Ամեն ինչ պատրաստ եմ անել, որ արդարացնեմ սպասելիքները»

Հայաստանի հավաքականի ֆուտբոլիստ Գոռ Մալաքյանը այսօր կայացած բաց մարզումից հետո պատասխանել է Vivaro News-ի հարցերին։ — Շնորհավորում ենք հիմնական հավաքական հրավիրվելու կապակցությամբ։ Ի՞նչ է ֆուտբոլիստի համար նշանակում հավաքականի հրավեր ստանալը։ — Ինչպես գիտեք, առաջին անգամ եմ հրավիրվել ազգային հավաքական, ինչի կապակցությամբ շատ ուրախ եմ։ Ամեն ինչ պատրաստ եմ անել մարզիչների սպասելիքները արդարացնելու համար։ — Այսօրվա մարզման ժամանակ մարզվում էիք հիմնական կազմի ֆուտբոլիստներից բաղկացած խմբում։ Արդյո՞ք դա նշանակում է, որ Բելառուսի հետ խաղը սկսելու եք մեկնարկային կազմում։ — Դա դեռ պարզ չի, քանի որ մարզիչը միայն խաղից առաջ է որոշում կազմը, ու հենց այդ ժամանակ էլ մենք իմանում ենք այդ մասին։ Հիմա չգիտեմ՝ կլինե՞մ մեկնարկային կազմում, թե՞ ոչ։ — Իսկ ի՞նչ մարզավիճակում եք մոտնում այս խաղին։ — Լավ մարզավիճակում եմ։ «Ստալում» հանդես եմ գալիս հիմնական կազմում, մասնակցել եմ բոլոր հանդիպումներին ու լավ մարզավիճակում եմ գտնվում։ — Իր վերջին հարցազրույցներից մեկում «Ստալի» մարզիչ Վան դեր Մեյերը նշել էր, որ հաճելիորեն զարմացած է թե Ձեր, թե [Մալաքյան] Էդգարի խաղով։ Ի՞նչ եք ցույց տվել խաղերի ու մարզումների ժամանակ, որ այսպես տպավորել եք նրան։ — Դե արտառոց ոչ մի բան չենք արել (ծիծաղում է - խմբ.)։ Արել ենք այն, ինչին սովորել ենք, խաղացել ենք ֆուտբոլ, արել ենք դա մեր հնարավորությունների չափով, մարզչի հրահանգները կատարել ենք, ինչի շնորհիվ էլ նա գոհ է մնացել մեզանից։ — Այսօր Վարուժան Սուքիասյանի հետ աշխատանքի առաջին օրն էր։ Ինչպիսի՞ տպավորություններ ունեք մարզումից։ — Նորմալ, տպավորությունները դրական են, ու հույս ունեմ, որ մինչև վերջ էլ այսպես կշարունակվի։
22.03.2016

Դավիթ Արշակյան. «Ես հպարտ եմ ու երջանիկ հավաքականում հանդես գալու համար»

Հայաստանի հավաքականի նորեկ և «Տրակայի» հարձակվող Դավիշ Արշակյանը այսօր հավաքականի բաց մարզումից հետո պատասխանել է Vivaro News-ի հարցերին: -Ի՞նչ է Ձեզ համար նշանակում հավաքականից հրավեր ստանալը: -Ցանկացած ֆուտբոլիստի համար պարծանք է կրել հավաքականի մարզաշապիկը, դա նունիսկ չի կարող քննարկվել: Ես հպարտ եմ, երջանիկ ու պատասխանտվության մեծ զգացումով լցված հավաքականում հանդես գալու համար: -Դուք մեծ արդյունավետություն ենք ցույց տալիս Լիտվայի առաջնությունում: Ի՞նչ է պետք անել հավաքականում նույն արդյունքին հասնելու համար: - Խաղադաշտ եմ դուրս գալու և ամբողջ ուժերս ներդնելու եմ ու պարզապես անելու եմ իմ աշխատանքը: Աստված տա՝ այստեղ ցուցադրածս արդյունքն էլ լինի նույն մակարդակի, ինչ Լիտվայի մրցաշարում: - Հայաստանի հավաքականի ֆուտբոլիստներից որևէ մեկի հետ արդեն ծանոթացե՞լ եք: - Այո՛, դեռևս երիտասարդական հավաքականից որոշ տղաների հետ ծանոթ եմ: Սակայն հիմնական կազմի ֆուտբոլիստներից քչերի հետ եմ ծանոթ այս պահին: - Ինչպիսի՞ն են մարզչի տակտիկական գաղափարները, Ձեր խաղաոճին համապատասխանո՞ւմ են: - Այսօր մարզումների առաջին օրն է, և ես դեռ չեմ հասցրել հասկանալ՝ ինչ է պահանջվում: Վաղը երկկողմ մարզումային խաղ է կազմակերպվելու, և արդեն կտեսնենք, թե ինչ է մեզանից ակնկալում մարզիչը և ինչ սխեմա է մշակել:
22.03.2016

Հենրիխ Մխիթարյան. «Կփորձեմ անել հնարավորը թիմին օգնելու համար»

Հայաստանի հավաքականի կիսապաշտպան Հենրիխ Մխիթարյանը Բելառուսի հետ ընկերական խաղից առաջ պատասխանել է լրագրողների հարցերին։ - Հավաքականում շատ են նորեկները, ինչպես նաև փոխվել է գլխավոր մարզիչը, ում գլխավորությամբ առաջին մարզումն էր։ Խնդրում ենք կիսվել տպավորություններով։ - Այո, շատ են նորեկները, բայց կփորձենք նրանց օգնել, որ շուտ մերվեն թիմին ու կարողանան մեզ օգուտ տալ։ Իսկ առաջին մարզման մասին կասեմ, որ շատ լավ մարզում էր, ու հույս ունեմ, որ լավ կպատրաստվենք Բելառուսի հետ խաղին։ - Ռոման Բերեզովսկու հեռանալուց հետո դարձել եք թիմի ավագը։ Որպես թիմի ավագ ի՞նչ է պետք անել, որպեսզի թիմը նորից սկսի ցուցադրել այն համախմբված ու ոգևորված խաղը, ինչ տեսնում էինք մի քանի տարի առաջ։ - Կարծում եմ՝ ավագի թևկապն այստեղ այնքան էլ մեծ նշանակություն չունի, կարևորը մարդկային որակներն են, որ պետք է ցույց տալ, դժվար պահերին թիմին քո հետևից տանել, ու ոչ մի նշանակություն չունի՝ կլինե՞մ թիմի ավագ, թե՞ ոչ, միշտ պատրաստ եմ թիմին իմ հետևից տանել ու օգնել խաղընկերներիս։ - Նոր մարզիչը արդեն ասե՞լ է, թե ինչ փոփոխություններ են լինելու հավաքականում, ինչպիսի տակտիկա է ընտրելու թիմը։ - Չեմ կարող ասել, քանի որ այդպիսի հարցերը մարզիչը ֆուտբոլիստների հետ չի քննարկում, նա քննարկում է այդ ամենը մարզչական շտաբի մյուս անդամների հետ, իսկ մենք ֆուտբոլիստներ ենք, ովքեր պետք է իրագործեն նրա ցանկությունները՝ ոչ միայն տակտիկական, այլ նաև խաղային, չէ՞ որ տակտիկան այնքան էլ կարևոր չէ, քանի որ խաղում են ֆուտբոլիստները։ Մարզումներին անում ենք այն, ինչ մեզանից պահանջվում է, իսկ խաղերի ժամանակ արդեն պարզ կդառնա՝ ինչքանով ենք պատրաստ։ - Խոսակցություններ կան, որ Ձեզ ցանկանում է ձեռք բերել «Յուվենտուսը»։ Ի՞նչ կասեք այդ մասին։ - Ճիշտն ասած դրանք միայն խոսակցություններ են, ոչ մի կոնկրետ բան չկա, բայց կցանկանամ, որ ավելի շատ հավաքականից հարցեր տաք, քանի որ այստեղ ենք հավաքականի համար։ - Ելնելով մի քանի ամիս առաջ տարածված հայտարարությունից, որտեղ նաև նշվում էր Ձեր անունը (խոսքը 9 ֆուտբոլիստների նամակի մասին է - խմբ.)՝ ինչ գիտեք ՖԱՖ-ՀՖՖ «հակամարտության» մասին։ Նաև Բերեզովսկու հրաժեշտի խաղն է, ու պաստառ չի լինելու մարզադաշտում։ Կասե՞ք Ձեր կարծիքն այդ կապակցությամբ։ - ՖԱՖ-ի ու ֆեդերացիայի հակամարտության մասին ոչ մի գաղափար չունեմ, նման հարցերում չեմ խառնվում, իսկ ինչ վերաբերում է հայտարարությանը, չգիտեմ, թե որ լրագրողն է տարածել այն, բայց դա արդեն անցած էտապ է, ու դրանով այլևս չենք հետաքրքրվում։ - Խոսքը ֆուտբոլիստների կողմից արված հայտարարության մասին է։ - Իհարկե, հասկացա, ու պատասխանս արդեն հնչել է, իսկ ինչ վերաբերում է Ռոման Բերեզովսկու հրաժեշտին, ապա հնարավոր ամեն բան կանենք, որ նրան բարձր տրամադրությամբ հրաժեշտ տանք։ - Ռոբերտ Արզումանյանը որոշեց ավարտել կարիերան հավաքականում։ Ի՞նչ կփոխվի հավաքականում այդ որոշումից հետո։ - Ես կարող եմ միայն հարգել Ռոբերտի որոշումը։ Դեռ չեմ զրուցել նրա հետ ու չգիտեմ որոշման պատճառները, բայց եթե նա այդպես է որոշել, ոչ մի խնդիր չեմ տեսնում դրանում, միայն կարող եմ շնորհակալություն հայտնել նրան այսքան տարիների աշխատանքի համար։ Ճիշտ է ցավալի է, բայց պետք է հետ չնայել ու մտածել, որ հավաքականում կան ֆուտբոլիստներ, ովքեր կարող են փոխարինել նրան։ - Բավականին շատ են նորեկները, ինչպե՞ս կստացվի կազմակերպել խաղացվածությունը, ու ինչքանո՞վ թիմի խաղի վրա կանդրադառնա Գևորգ Ղազարյանի ու Յուրա Մովսիսյանի բացակայությունը։ - Ինչպես ասեցի, նորեկներին կփորձենք օգնել ինչքան հնարավոր է, ցանկանում ենք նրանց օգնել թիմին շուտ մերվելու հարցում, որ կարողանան անել այն ամենը, ինչ մարզիչը պահանջում է նրանից։ Ճիշտ է, Յուրա Մովսիսյանի ու Գևորգ Ղազարյանի բացակայությունը զգացնել կտա, բայց կան ֆուտբոլիստներ, ովքեր պատրաստ կլինեն խաղալ այդ դիրքում։ Եթե մարզիչը որոշել է նրանց չհրավիրել, չեմ կարող ասել թե ինչն է պատճառը։
22.03.2016

Արթուր Սարկիսով. «Բերեզովսկին նախ հիանալի մարդ է, հետո՝ բարձրակարգ ֆուտբոլիստ»

Հայաստանի հավաքականի հարձակվող Արթուր Սարկիսովը պատասխանել է Vivaro News-ի թղթակցի հարցերին։  — Ինչպիսի՞ տպավորություններ ունեք նոր մարզչից առաջին մարզումից հետո։  — Միայն դրական տպավորություններ եմ ստացել։ Բավականին հետաքրքիր է նրա հետ աշխատելը։ Հասկանալի է, թե ինչ է նա մեզանից պահանջում։ Ամեն ինչ կանենք նրա հրահանգները կատարելու համար։ — Իսկ ինչպիսի՞ ֆուտբոլային գաղափարներ է նա փորձում փոխանցել թիմին։ — Որ Հայաստանի հավաքականը պետք է հաղթի յուրաքանչյուր խաղում։ — Իսկ տակտիկակա՞ն առումով։  — Այդ մասին չեմ կարող խոսել։ — Իսկ ինչպիսի՞ մարզավիճակով եք մոտեցել հանդիպմանը։ — Լավ մարզավիճակում եմ, հատկապես հաշվի առնելով այն, որ ժամանել եմ այստեղ թիմի կազմում մինչմրցաշրջանային պատրաստությունից հետո։ — Այս խաղը լինելու է նաև Ռոման Բերեզովսկու հրաժեշտի հանդիպումը։ Ինչպիսի՞ տպավորություններ է թողել Ռոմանը որպես մարդ ու որպես պրոֆեսիոնալ ֆուտբոլիստ։  — Նախ և առաջ նա շատ լավ անձնավորություն է, իսկ հետո՝ նա բարձրակարգ ֆուտբոլիստ է, ով վարպետ է իր գործում։ Մենք շփվում ենք իրար հետ, ու ես շատ ուրախ կլինեմ նրան նորից տեսնելու, խաղադաշտ դուրս գալու ու միասին խաղալու համար։ — Համեմատած մյուս ֆուտբոլիստների հետ, նա տարիքով մեծ էր բոլորից։ Որպես ավագ ընկեր՝ ինչպիսի՞ խորհուրդներ էր տալիս Բերեզովսկին թիմակիցներին։  — Ֆուտբոլային խորհուրդներ էր տալիս, նույնիսկ կյանքի դասեր էր տալիս, պարզապես հիմա դժվարանում եմ վերհիշել ու առանձնացնել կոնկրետ մեկը, նա միշտ հուշում էր մեզ, օգնում էր բոլորիս։ — Իսկ ի՞նչ եք կարծում, հեշտ կլինի փոխարինել Բերեզովսկուն։  — Իհարկե ոչ, քանի որ այս մարդը պաշտպանել է Հայաստանի հավաքականի դարպասը տարիներ շարունակ, ու ինչքան հիշում եմ ինձ, Ռոման միշտ հավաքականի դարպասին է եղել։ Այդ իսկ պատճառով հեշտ չի լինի նրան փոխարինել, բայց ունենք երիտասարդ դարպասապահներ, որոնք աշխատում են, ցույց են տալիս իրենց որակները։ — Հավաքականում շատ են նոր ֆուտբոլիստները։ Ինչպիսի՞ տպավորություն են նրանք թողել։ — Միայն դրական։ Աշխատում ենք միասին, փորձում ենք օգնել միմյանց։ Բոլորն էլ ցանկանում են խաղալ։ Տեսնենք՝ ինչ կստացվի։ — Ռոբերտ Արզումանյանը որոշեց ավարտել կարիերան։ Ի՞նչ կարծիք ունեք այս մասին։  — Չեմ պատասխանի այս հարցին։ — Արդյո՞ք նրա որոշումը բացասական ազդեցություն կունենա թիմի վրա, թե՞ հնարավոր կլինի փոխարինել նրան։  — Բոլոր հարցերը փոխարինումների մասի՞ն են, արդյոք կարելի է փոխարինել ինչ-որ մեկին, թե ոչ (ծիծաղում է - խմբ.)։ Դե հավաքականում շատ են բարձրակարգ ֆուտբոլիստները, այնպես որ կարծում եմ, որ մի բան կանենք։ Աշխատելու ենք, որ ամեն ինչ լավ լինի։
22.03.2016

Էդգար Մանուչարյան.«Ղազարյանի, Մովսիսյանի ու Կասպարովի բացակայությունը կորուստ է մեզ համար»

Հայաստանի հավաքականի մարզական հավաքի առաջին օրվա ավարտին Էդգար Մանուչարյանը ճեպազրույց է ունեցել լրագրողների հետ: -Տեղյա՞կ եք ՖԱՖ-ՀՖՖ «հակամարտության» մասին: -Ոչ, տեղյակ չեմ: Իհարկե, կցանկանայինք, որ մեր երկրպագուները միշտ մեր կողքին լինեին: Ես չեմ կարող հստակ ասել, թե ինչ խնդիր կա, որովհետև դա իմ խնդիրը չէ: Իսկ ինչ վերաբերում է երկրպագուներին, մենք միշտ ուրախ ենք, որ նրանք մեր կողքին են: -Բերեզովսկին այլևս չի պաշտպանելու Հայաստանի հավաքականի դարպասը: Ինչպիսի՞ զգացողություններ ունեք: -Ուշ դե շուտ դա լինելու էր: Նա երկար տարիներ բարձր մակարդակով պաշտպանում էր Հայաստանի հավաքականի դարպասը: Ամենակարևորը` գլուխը բարձր է հեռանում հավաքականից, շատ քչերն են այդպես հեռանում: Ցանկանում ենք նրան առաջին հերթին առողջություն, որ ինչքան հնարավոր է` մեզ հետ լինի և պատանի ֆուտբոլիստներին ճիշտ ուղղություն ցույց տա: -Մի քանի առաջատար ֆուտբոլիստներ, այդ թվում` Յուրա Մովսիսյանը, Գևորգ Կասպարովը և Գևորգ Ղազարյանը չեն հրավիրվել Հայաստանի հավաքական, դրա մասին ի՞նչ կասեք: -Դա կարելի է մարզչին հարցնել: Իհարկե, դա կորուստ է մեզ համար, նրանք միշտ մեր կողքին են եղել թե ծանր, թե ուրախ պահերին: Բայց մենք պետք է լրացնենք նրանց տեղը: Իհարկե, նրանց կարիքը անպայման կզգանք, բայց ինչ արած` ֆուտբոլ է: -Ըստ Ձեզ հետագայում նրանք կհրավիրվե՞ն: -Ես մարզիչը չեմ, չեմ կարող այդ հարցին պատասխանել: -Առաջին մարզումը անցկացրեցիք նոր մարզչի ղեկավարությամբ, ինչպիսի՞ն են տպավորությունները: Ի՞նչ սպասելիքներ կան նոր ընտրական մրցաշարից: -Տպավորությունները լավն էին: Բոլորն էլ գիտեն, որ Վարուժան Սուքիասյանը փորձառու մասնագետ է: Ընտրական փուլին դեռ ժամանակ կա, բայց ընկերական խաղերից ելնելով` արդեն պարզ կլինի, թե մենք ինչքանով պատրաստ կլինենք ընտրական խաղերին: Իհարկե, ընկերական խաղերն էլ իրանց տեղն ունեն: Պետք է ամեն ինչ անենք, որ հաղթենք ու նոր փուլին մոտենանք լավ մարզավիճակում: -Հավաքականի նորեկների մասին ի՞նչ կասեք: -Դեռ չենք հասցրել միասին շատ մարզվել: Բայց եթե հրավիրվել են, ուրեմն արժանի են: Խաղից հետո ավելի պարզ կլինի, թե ինչպես կդրսևորեն իրենց:
22.03.2016

Գաել Անդոնյան. «Միգուցե Արզումանյանը մի օր նորից վերադառնա հավաքական»

Հայաստանի հավաքականի պաշտպան Գաել Անդոնյանը Vivaro News-ի թղթակցին տված հարցազրույցում խոսել է հավաքականի ու իր մարզավիճակի մասին։ — Ինչպիսի՞ մարզավիճակով ես մոտենում խաղին։ Գիտենք, որ «Դիժոնում» վերջին շրջանում խաղաժամանակ չես ստանում։  — Այո, խաղաժամանակ քիչ եմ ստացել, բայց շատ եմ մարզվել։ Բացի նրանից, որ առավոտյան մարզվում եմ ընդհանուր խմբի հետ, կեսօրին գնում եմ մարզադաշտ ու առանձին մարզվում եմ մարզասրահում, վազքային վարժություններ եմ կատարում, այնպես որ լավ մարզավիճակում եմ ու պատրաստ եմ օգնել թիմին։ — Գիտենք, որ հավաքականում շատ են նոր ֆուտբոլիստները։ Այս փոփոխություններից հետո ի՞նչ կարող ենք ասել հավաքականի մասին, ինչպիսի հեռանկարներ ունի այս թիմը։ — Կարծում եմ՝ հեռանկարները լավն են, քանի որ շատ երիտասարդ ֆուտբոլիստները, ու ես կարծում եմ, որ շատ լավ է այն փաստը, որ մենք երիտասարդ տարիքից գալիս ենք հավաքական ու սկսում ենք խաղալ իրար հետ, քանի որ ապագայում՝ 2-3 տարուց, իրար արդեն անթերի կճանաչենք, ու դա շատ լավ կլինի հավաքականի համար։ — Նաև փոխվել է գլխավոր մարզիչը։ Արդյո՞ք արդեն հասկանալի է, թե ինչ է պահանջում նա ֆուտբոլիստներից։ — Մարզիչը մեզ ասաց, որ առաջին հերթին թիմում ցանկանում է տեսնել միասնականություն, պայքարող ոգի։ Կարծում եմ, որ նա իրավացի է, քանի որ դա կօգնին մեզ հաղթել խաղերում։ — Եվ վերջին հարցը. Ռոբերտ Արզումանյանը որոշեց հեռանալ ազգային հավաքականից։ Ի՞նչ կփոխի դա թիմում, ու ո՞վ կարող է փոխարինել նրան։ — Չգիտեմ՝ ով է խաղալու այդ դիրքում, բայց Ռոբերտը շատ լավ ֆուտբոլիստ էր։ Նա որոշեց ավարտել ելույթները ազգաիյն հավաքականում, բայց ո՞վ գիտի, միգուցե նա մի օր նորից վերադառնա ազգային հավաքական։ Նրան ամենայն բարիք եմ մաղթում։
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: