Հայաստանի ազգային հավաքական | Էջ - 2

08.05.2017

Ժամանակի իզուր վատնում. Ինչո՞ւ Դավիթ Յուրչենկոյին չենք ցանկանում տեսնել Հայաստանի հավաքականում

Վերջին օրերին կրկին քննարկումների առիթ էր դարձել Հայաստանի ազգային հավաքականի դարպասապահի հարցը: ՀՖՖ նախագահ Ռուբեն Հայրապետյանը հայտարարել էր, որ պատրաստ է գրկաբաց ընտրանու կազմ ընդունելու Մախաչկալայի «Անժիի» դարպասապահ Դավիթ Յուրչենկոյին: Այս հայտարարությունը մի փոքր անսպասելի էր, քանի որ Յուրչենկոն անցյալում ևս հրավեր է ստացել հայկական կողմից, բայց հրաժարվել է դրանից՝ պատճառաբանելով, որ Ռուսաստանում կհամարվի լեգեոներ և ցանկանում է հանդես գալ այդ երկրի ազգային հավաքականում: VivaroNews.am-ը ներկայացնում է իր հիմնավորումները, թե ինչո՞ւ է Յուրչենկոյին ազգային հավաքական հրավիրելը, մեղմ ասած, ժամանակի կորուստ: Մի՞թե ամենակարևորը հայրենասիրությունը չէ ՀՖՖ-ի ներկայացուցիչները, ազգային հավաքականը երբևէ գլխավորած մարզիչները միշտ հայտարարել են, որ ընտրանու կազմում հանդես գալու գլխավոր նախապայմանը ֆուտբոլիստի հայրենասիրությունն է: Այդ դեպքում ի՞նչ իմաստ կա «ընկնելու մի խաղացողի հետևից», ում պետք է անընդհատ համոզել և փորձել հավաքականում խաղալու ցանկություն առաջացնել նրա մեջ: Յուրչենկոն դեռ մեկ տարի առաջ հայտարարել էր. «Ես ունեցել եմ և այժմ էլ ունեմ առաջարկ Հայաստանի հավաքականից: Բայց ես այդ մասին արդեն խոսել եմ. ցանկանում եմ հանդես գալ Ռուսաստանի հավաքականում: Եվ այն պահին, երբ ես ընդունեցի այդ որոշումը՝ մերժելով Հայաստանի հավաքականի առաջարկը, լեգեոնականների հարցն այդքան սուր դրված չէր և իմ դիրքորոշման վրա չի ազդել: Ինչպես արդեն ասել եմ, ես մրցակցությունից չեմ վախենում: Ռուսաստանն իմ հայրենիքն է, այստեղ եմ ապրում 8 տարեկանից: Ցանկանում եմ ապացուցել, որ պատրաստ եմ պաշտպանելու նման երկրի հավաքականի դարպասը»: Յուրչենկոն արձագանքել էր ՀՖՖ-ի վերջին հայտարարությանը՝ նշելով, որ Հայաստանի հավաքականի մասին կրկին կմտածի, երբ կոնկրետ առաջարկներ լինեն: Մի՞թե այս ժամանակահատվածում նրա մեջ հայրենասիրություն է ի հայտ եկել: Ամենևին: Պարզապես նա երևի գիտակցել է, որ Ռուսաստանի հավաքականից ուշադրության չի արժանանում, իսկ ժամանակն էլ անցնում է կայծակնային արագությամբ (Յուրչենկոն 31 տարեկան է): Իսկ եթե Հայաստանից դեռ հիշում են նրա մասին, ապա ինչո՞ւ բաց թողնել այդ հնարավորությունը... Ինչո՞վ են նրան զիջում Արսեն Բեգլարյանը, Անատոլի Այվազովը և Գրիգոր Մելիքսեթյանը Հիմա անցնենք մարզական կողմին: Ոչ մի կասկած չկա, որ Յուրչենկոն բարձրակարգ դարպասապահ է, նա դա ապացուցել է թե՛ «Մորդովիայում», թե՛ «ՈՒՖԱ»-ում, և թե՛ այժմ «Անժիում» իր ելույթներով: Բայց մեր հավաքականում դարպասապահի հարցն այս պահին ամենաառաջնայինը չէ: Այնտեղ առողջ մրցակցություն է ձևավորվել երիտասարդներ Արսեն Բեգլարյանի և Անատոլի Այվազովի միջև, չպետք է մոռանալ նաև փորձառու Գրիգոր Մելիքսեթյանի մասին: Բեգլարյանը վերջին հանդիպումներում անփոխարինելի է հավաքականում և խաղից խաղ գործում է ավելի վստահ: Դա նաև պայմանավորված է նրանով, որ Արսենը զգում է՝ ցանկացածի պահի իր տեղում կարող է հայտնվել հավասարազոր հնարավորություններ ունեցող Այվազովը: Երկուսն էլ հիանալի են հանդես գալիս Հայաստանի Բարձրագույն խմբի առաջնությունում և լիովին արժանի են եղել հրավիրվելուն ազգային հավաքական: Շատերը կարող են հիշել Այվազովի կոպիտ սխալը «Գանձասար-Կապանի» հետ մրցավեճում, բայց նրանք, ովքեր ուշադիր են հետևում ներքին առաջնությանը, կփաստեն՝ այդ ամենից հեռուն գնացող եզրակացություններ անելը սխալ է: Իհարկե, թե՛ Բեգլարյանը, թե՛ Այվազովը զարգանալու դեռ շատ տեղ ունեն: Առայժմ շատ վաղ է համեմատականներ անցկացնելու նրանց և հավաքականի լեգենդար դարպասապահ Ռոման Բերեզովսկիի միջև: Բայց առաջընթացն օրեցօր նկատվում է: Եվ այս պարագայում արժե՞ հրավիրել Յուրչենկոյին: Ե՞րբ նա պետք է խաղադաշտ դուրս գա: Միգուցե ընկերական խաղերո՞ւմ: Ավելի լավ է՝ այդ հնարավորությունը տալ Այվազովին, ով դեռևս չի նշել նորամուտն ազգային հավաքականում: Նրանց կողքին պետք չէ մոռանալ նաև 30-ամյա Մելիքսեթյանի մասին: Նա Հայաստանի առաջնության գարնանային հատվածում հիանալի հանդես եկող «Գանձասար-Կապանի» առանցքային ֆուտբոլիստներից է, ամեն խաղում առնվազն 4-5 անգամ փրկում է իր թիմին վերահաս գոլերից: 24-ամյա Բեգլարյանն ու 20-ամյա Այվազովը կարող են ավելի մեծ փորձ կուտակել՝ մարզվելով Մելիքսեթյանի կողքին: Մենք ավելի հրատապ խնդիրներ ունենք Նախընտրելի է՝ հավաքականի մարզչական շտաբը մտածի այլ խնդիրների մասին: Օրինակ՝ մենք չունենք իսկական գոլահար, ով կկարողանա գոլերի վերածել խաղընկերների ջանքերը: Փաստ է, որ մինչ օրս էլ չունենք արժանի փոխարինող Յուրա Մովսիսյանին: Նրա դիրքում հնարավորություն ստացան Դավիթ Արշակյանը, Ռուսլան Կորյանը, Արթուր Սարկիսովը, նույնիսկ Վարդան Պողոսյանը, բայց անկեղծ լինենք՝ նրանցից ոչ ոք Յուրա Մովսիսյան չէ: Իսկ հավաքականն ամեն անգամ չի կարող հույս դնել, որ Հենրիխ Մխիթարյանն ինչ-որ հրաշք կարարի, Գևորգ Ղազարյանը վերջին րոպեներին կվճռի խաղերի ելքերը կամ Արաս Օզբիլիսի ձախ ոտքը կախարդական փայտիկի գործառույթ կկատարի: Իզուր չէին Ղազախստանի հավաքականի հետ հանդիպումից հետո Հենրիխ Մխիթարյանի այն խոսքերը, որ ընտրանու մյուս տղաներն էլ պետք է պատասխանատվություն վերցնեն իրենց վրա, փորձեն առաջատարի ունակություններ դրսևորել դժվարին պահերին: ՀՖՖ-ն միշտ հայտարարում է, որ արտերկրում հանդես եկող հայազգի բոլոր ֆուտբոլիստները նրանց ուշադրության կենտրոնում են: Այդ խաղացողները մեծ մասն, իրոք, ունեն բավականին լավ տվյալներ և երազում են ազգային հավաքականում խաղալու մասին: Պետք է ճիշտ ընտրություն կատարել՝ նրանց խաղերին գործուղելով մասնագետների և հասկանալով նրանց իրական խաղամակարդակը: Այլապես հեռավոր Հայաստանից դժվար է եզրակացություն անել, թե ի՞նչ որակներ ունեն Գերմանիայի 4-րդ դիվիզիոնում կամ Հոլանդիայի առաջնությունում հանդես եկող մեր հայրենակիցները: Հ. Գ. Առջևում Սենթ Քիթս և Նևիսի հետ ընկերական հանդիպումն է: Սա այն մրցակիցը չէ, որի հետ խաղում կկարողանանք տեսնել հավաքականի ֆուտբոլիստների իրական ներուժը, բայց փորձարկումներ, բնականաբար, կլինեն: Գլխավոր մարզիչ Արթուր Պետրոսյանի օրոք հավաքականի գործերը սահուն քայլերով դեպի առաջխաղացում են ընթանում, ուստի պետք է սպասել: Բայց մեկ բան հաստատ է. հավաքականում պետք է լինեն ամենաարժանիները, նրանք, ովքեր պատվով են կրում նրա մարզաշապիկը: Իսկ մենք բազմիցս ենք համոզվել, որ հավաքականում վատ մարզավիճակը կարելի է փոխհատուցել բացառիկ նվիրվածության հաշվին:
08.05.2017

ՀՖՖ-ն նվազեցրել է տոմսերի գները Հայաստանի հավաքականի առաջիկա ընկերական խաղի համար

Մայիսի 8-ից մեկնարկել է Հայաստան- Սենթ Քիթս և Նևիս ընկերական հանդիպման տոմսերի վաճառքը, հայտնում է ՀՖՖ պաշտոնական կայքը։ Հիշեցնենք, որ խաղը կկայանա հունիսի 4-ին՝ ժամը 20:00-ին, Վազգեն Սարգսյանի անվան «Հանրապետական» մարզադաշտում: Տոմսերը կարող եք ձեռք բերել Վազգեն Սարգսյանի անվան «Հանրապետական» մարզադաշտի մուտքերի մոտ գտնվող տոմսարկղերից: Մարզադաշտի Արևմտյան տրիբունայի տոմսերն արժեն 4000-5000 դրամ, արևելյան տրիբունայի տոմսերը՝ 3000-4000 դրամ, հյուսիսային և հարավային տրիբունաների տոմսերը՝ 2000 դրամ: Նշենք, որ ազգային հավաքականի նախորդ խաղերում գործել էին կրկնակի բարձր գներ։ Տոմսերի հետ կապված հարցերով զանգահարել միայն «Հանրապետական» մարզադաշտ` 55 53 52, 55 53 51: Առաքումն իրականացվում է 077 52 30 34 հեռախոսահամարով:
04.05.2017

Յուրչենկո. «Հայաստանի հավաքականի հրավերի վերաբերյալ որոշում կընդունեմ, երբ լուրջ խոսակցություններ լինեն»

«Անժիի» դարպասապահ Դավիդ Յուրչենկոն մեկնաբանել է Հայաստանի ֆուտբոլի ֆեդերացիայի նախագահ Ռուբեն Հայրապետյանի հայտարարությունը, որ ազգային ընտրանուն գրակաբաց սպասում են իրեն: «Հենց նոր իմ հայ ընկերներից իմացա այդ հայտարարության մասին, այսպիսով դեռևս ոչ մեկի հետ չեմ խոսել այդ թեմայով: Նախընտրում եմ գնալ այն հավաքական, որն իմ սրտին ավելի մոտ է: Ո՞րը կընտրեմ, ժամանակը ցույց կտա: Այն, որ այդ հրավերը ընդունելուց հետո լեգեոներ կհամարվեմ, ակումբում վաղուց է քննարկվում: Որոշում կընդունեմ, երբ ավելի լուրջ խոսակցություններ լինեն»,-Յուրչենկոյի խոսքերն է մեջբերում «Чемпионат»-ը: http://www.vivaronews.am/ruben-hayrapetyan-menkh-grkabac-spasum-enkh-davith-yurchenkoyin-hayastani-havakhakanum
12.04.2017

Էդգար Մանուչարյան.«Հայաստանի հավաքականը սեփական դաշտում կարող է հաղթել բոլորին»

Հայաստանի հավաքականի և «Ուրալի» հարձակվող Էդգար Մանուչարյանը հարցազրույց է տվել իր ակումբի պաշտոնական կայքին, որում անդրադարձել է նաև Հայաստանի հավաքականում իր ելույթներին:  - Վերջին հրավերը ազգային հավաքական անսպասելի՞ էր: - Ինչո՞ւ: - Դու երկար ժամանակ հանդես չէր եկել բարձր մակարդակում: - Այո, չէի խաղացել: Բայց գիտեի, որ մարզիչն իմ վրա հույս է դնում: Մինչ այդ չէի հրավիրվում, որովհետև խաղային պրակտիկա չունեի: Բայց երբ ես լավ մարզավիճակում եմ ու պարբերաբար խաղում եմ, ինձ հրավիրում են: Ես խոսել էի մարզչի հետ: Նա ասաց, որ հույս է դնում իմ վրա, պետք է միայն մարզվել ու խաղալ: Ես միշտ ուրախ եմ, որ ինձ հավաքական են հրավիրում: - Ղազախստանի հետ խաղում Հայաստանը երկու գոլ խփեց այն բանից հետո, ինչ դու փոխարինման դուրս եկար: Կարելի՞ է ասել, որ դու ուժեղացրիր խաղը հարձակման գծում: - Չեմ հետևում վիճակագրությանը: Ես ուղղակի զբաղվում եմ իմ գործով: Ինձ հետաքրքիր չէ, թե ով է գոլ խփում կամ փոխանցումներ կատարում: Ամենակարևորն այն է, որ ես 100 տոկոսով նվիրվեմ թիմին: Իհարկե, շատ ուրախ եմ, որ իմ փոխարինման մտնելուց հետո մենք խփեցինք: Գտնում եմ, որ մենք արժանի հաղթեցինք: - Ինչպե՞ս ես գնահատում Հայաստանի շանսերը՝ հայտնվելու Աշխարհի առաջնության եզրափակիչ փուլում: - Հիմա մենք լավ շանսեր ունենք: Այո, դեռ ծանր խաղեր կան, բայց ամեն ինչ կախված է մեզնից: Առջևում ծանր խաղ է Չեռնոգորիայի դեմ՝ հունիսին: Եթե հաղթենք, կբարձրանանք երկրորդ տեղ: Իսկ հետո տնային խաղերի շարք է: Մեր դաշտում հնարավոր է հաղթել բոլորին: - Ո՞վ է ամենաուրախ տղան Հայաստանի հավաքականում: - Ես (ծիծաղում է՝ խմբ.): - Ինչպե՞ս է դա արտահայտվում: - Չգիտեմ: Այդպես են ասում: Ես թիմում ամենամեծն եմ: Թեև երբեմն դա չեմ զգում ու ինձ պահում եմ, ինչպես ամենաերիտասարդը: Ես այնպիսին եմ, ինչպես մյուսները՝ զգում եմ, թե 18 տարեկան եմ, ոչ թե 30: - Հասցրեցի՞ր տանը լինել: - Միայն մեկ օր: Մարտի 19-ին տանն էի, իսկ արդեն հաջորդ օրը սկսվեցին հավաքականի մարզումները: - Հավանաբար, տանը հատուկ պատրաստվել էին քո այցին: - Իհարկե: Մայրիկս միշտ սպասում է ինձ: Նա տխրեց, որ միայն մեկ օրով եմ եկել: Ժամանակ չկար, որ ինչ-որ տեղ գնայինք միասին: - Ո՞րն է մայրիկիդ պատրաստած ամենասիրելի ուտեստը: - Մայրս գիտի, որ ես ուտում եմ ամեն ինչ: Ինձ ամեն ինչ շատ է դուր գալիս: - Երևանում, երևի, արդեն ամեն ինչ ծաղկում է: - Այո: Այնտեղ տաք է՝ +15 կամ +20 աստիճան: Այնտեղ միշտ ապրիլից լավ եղանակ է սկսվում մինչև սեպտեմբեր-հոկտեմբեր:
11.04.2017

Մանուչարյան. ««Ուրալ» չեմ եկել օրեր հաշվելու և գումար աշխատելու համար»

Ֆուտբոլի Հայաստանի հավաքականի և «Ուրալի» հարձակվող Էդգար Մանուչարյանը պատմել է, թե ինչու  է անցած մրցաշրջանի վերջում  Թաիլանդից տեղափոխվել «Ուրալ»: «Զգում էի, որ ինչ-որ բանով չէի կարող օգնել թիմին, ցանկանում էի նոր առաջնությունում հանդես գալ: Բայց երբեք չգիտես՝ վաղը ինչ կլինի, և այնպես պատահեց, որ վերադարձա «Ուրալ»: Շնորհակալ եմ Գրիգորիյ Վիկտորովիչին ինձ ընդառաջելու և հնարավորություն տալու համար: Իհարկե, չեմ եկել օրեր հաշվելու և գումար վաստակելու համար: Բոլորը գիտեն, որ ես կարող եմ թիմին օգնել»: Մանուչարյանն հավելել է, որ«Ուրալից» տեղափոխվել է , քանի որ մի քանի գործակալներ խաբել են իրեն և ինքը տրանսֆերային պատուհանի վերջում որոշել է կարիերան շարունակել Թաիլանդում: «Նորից նշեմ, որ ինձանից շատ բան կախված չէր, մի քանի գործակալներ խաբեցին ինձ: Ես առաջարկների էի սպասում, իսկ տեղափոխվելու ժամանակն ավարտվում էր: Վերջին պահին որոշեցի տեղափոխվել Թաիլանդ,չնայած գիտեի, որ ավելիին եմ արժանի» ,-ֆուտբոլիստն ասել է  Znak.com-ին:
30.03.2017

Գևորգ Ղազարյանը բուժզննում է անցել, նրան վիրահատել են

Մարտի 29-ին Գևորգ Ղազարյանը պետք է բուժզննում անցներ Գերմանիայի Մյունխեն քաղաքի մասնագիտացված կլինիկաներից մեկում: Այսօր առավոտյան ՀՖՖ պաշտոնական կայքը կապ է հաստատել Գևորգ Ղազարյանի հետ, ով ասել է հետևյալը. «Ինչպես և սպասվում էր, բուժզննումը ցույց տվեց, որ վիրահատության կարիք կա: Երեկ վիրահատվեցի: Փառք Աստծո, ամեն ինչ նորմալ անցավ: Բարեբախտաբար, մենիսկիս հետ ամեն ինչ նորմալ է, կողային կապանը ևս վիրահատության կարիք չուներ: Վիրահատել են միայն խաչաձև կապանս, որը վնասվել էր առջևից և ետևից: Նախնական տվյալներով վերականգմանս համար կպահանջվի առնվազն 6 ամիս՝ կախված վերականգնման ընթացքից: Անկախ տեղի ունեցածից հավատում եմ, որ ամեն ինչ լավ կլինի, և, օգտվելով առիթից, ուզում եմ շնորհակալություն հայտնել Հայաստանի ֆուտբոլի ֆեդերացիային իմ՝ Գերմանիա մեկնելու և վիրահատվելու գործընթացն արագ կազմակերպելու համար: Շնորհակալ եմ նաև իմ խաղընկերներին և հատկապես երկրպագուներին, որոնցից ստանում եմ քաջալերանքի բազմաթիվ խոսքեր և որոնց աջակցությունը զգացել եմ առաջին իսկ րոպեից մինչև հիմա»:
29.03.2017

Հովհաննես Համբարձումյանի վնասվածքը լուրջ չէ

«Վարդարի» և Հայաստանի հավաքականի պաշտպան Հովհաննես Համբարձումյանի վնասվածքը, բարեբախտաբար, լուրջ չէ, հայտնում է Հայաստանի ֆուտբոլի ֆեդերացիայի պաշտոնական էջը: Հովհաննես Համբարձումյանը բուժզննում է անցել Գերմանիայում: Հայ ֆուտբոլիստը կկարողանա խաղադաշտ դուրս գալ մոտ 10 օրից: Հիշեցնենք՝ Հովհաննեսը վնասվածք էր ստացել ազգային հավաքականի տրամադրության տակ գտնվելիս և չէր կարողացել մասնակցել Աշխարհի առաջնության որակավորման փուլի Ղազախստանի դեմ խաղին (2-0):
29.03.2017

Գևորգ Ղազարյանի բոլոր 10 գոլերը Հայաստանի հավաքականում (տեսանյութ)

Գևորգ Ղազարյանը, ինչպես և Հենրիխ Մխիթարյանը, Հայաստանի հավաքականում իր նորամուտը նշել է ուղիղ 9 տարի առաջ՝ Էստոնիայի հետ խաղում: Այս ընթացքում նա հասցրել է խփել 10 գոլ, որից վերջինը Չեռնոգորիայի դեմ խաղում գոլն էր: Ներկայացնում ենք կիսապաշտպանի բոլոր գոլերը ազգային թիմում.
29.03.2017

Ժերար Պիկե. «Ռեալը» հաղթեց Չեմպիոնների լիգան խաղից դուրս վիճակից խփված գոլով, բայց այդ մասին բոլորը լռում են»

«Բարսելոնայի» պաշտպան Ժերար Պիկեն անդրադարձել է այն մեղադրանքներին, թե մրցավարները օգնել են կատալոնական թիմին հաղթելու ՊՍԺ-ին: «Ե՞րբ են մրցավարները բարեհաճ եղել մեր նկատմամբ: Չեմպիոնների լիգայո՞ւմ: Իսկ ես մտածեցի Իսպանիայի առաջնության մասին է: Լա Լիգայում դա արդեն վաղուց չկա: Մենք պատմական վերադարձ արեցինք «ՊՍԺ»-ի հետ, իսկ դուք խոսում եք մրցավարության մասին: «Ռեալը» հաղթեց Չեմպիոնների լիգան Ռամոսի՝ խաղից դուրս վիճակից խփված գոլով, բայց այդ մասին բոլորը լռում են»,-ասել է Պիկեն:
29.03.2017

Գևորգ Ղազարյանը բժշկական հետազոտություն է անցնում

Հայաստանի հավաքականի կիսապաշտպան Գևորգ Ղազարյանն այժմ գտնվում է Գերմանիայի Մյունխեն քաղաքում, հայտնում է ՀՖՖ ֆեյսբուքյան էջը: Այստեղ ֆուտբոլիստը մասնագիտացված կլինիկաներից մեկում անցնում է բժշկական հետազոտություն: Գևորգ Ղազարյանը վնասվածք ստացավ Հայաստան - Ղազախստան հանդիպման հենց առաջին րոպեին: Ազգային ընտրանու 10 համարի մոտ գրանցվել էր ծնկի խաչաձև կապանների մասնակի կտրվածք և աճառի վնասվածք: Ղազարյանին, հավանաբար, կպահանջվի վիրահատություն: http://www.vivaronews.am/articles/gevorg-ghazaryan-yerkar-dadaric-heto-luys-em-tesnum-thuneli-verjum
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: