Հայաստանի ազգային հավաքական | Էջ - 11

12.11.2016

Միջազգային մամուլի արձագանքը Հայաստանի հավաքականի հաղթանակին և Մխիթարյանի խաղին

Աշխարհի առաջնության ընտրական փուլում Հայաստանի հավաքականը ցույց տված բարձր կամային որակների շնորհիվ ապշեցուցիչ հաղթանակ տոնեց ԱԱ 2018-ի խմբային փուլում 7 միավոր գրպանում ունեցող Չեռնոգորիայի ընտրանու նկատմամբ: Արթուր Պետրոսյանի սաները իրենց օրինակելի խաղով ոչ միայն զարմացրին հյուրերին, այլ նաև մեծ աղմուկ բարձրացրին միջազգային մամուլում: Այս ամենից անմասն չմնաց նաև  «Մանչեսթեր Յունայթեդի» կիսապաշտպան Հենրիխ Մխիթարյանի ցուցադրած խաղը 90 րոպեի ընթացքում: Daily Mail «Հենրիխ Մխիթարյանի Հայաստանի հավաքականը էպիկ քամբեք է տոնում Չեռնոգորիայի ընտրանու նկատմամբ: 2-0 հաշվով պարտվելիս հայերը պայքար են տալիս և սենսիացիոն գոլ են խփում  94-րդ րոպեին: Հայաստանի հավաքականը գտնվելով Group E-ի վերջին տեղում՝ առանց միավորի, զարմացնում է բոլորին և խմբի առաջատարից նրան բաժանում է 4 միավոր: Դու տեսնո՞ւմ ես սա Մոուրինյո»: Mirror «Մանչեսթեր Յունայթեդի» կորած ֆուտբոլիստ Հենրիխ Մխիթարյանը մասնկացում է իր հավաքականի ֆենոմենալ քամբեքին Չեռնոգորիայի ընտրանու դեմ: 27-ամյա կիսապաշտպանը խաղաց 90 րոպե և մեծ հույս ունի, որ բարելավել է մարզավիճակը, որպեսզի վերջապես ընդգրկվի մանչեսթերյան թիմի հայտացուցակում»: Metro «Մանչեսթեր Յունայթեդի» աստղ Հենրիխ Մխիթարյանը մեծ դեր է տանում իր հավաքականի դրամատիկ հաղթանակում և յուրօրինակ հաղորդագրություն ուղարկում Ժոզե Մոուրինյոյին: Գևորգ Ղազարյանի անհավանական կրակոցը հանդիպման վերջին րոպեին փոխում է իրերի դասավորվածությունը և Հայաստանի հավաքականին պարգևում ԱԱ 2018-ի ընտրական փուլի առաջին հաղթանակը: Չնայած Հենրիխ Մխիթարյանը չփայլեց առաջին կեսին, քանի որ երկար ժամանակ արհամարվում էր Ժոզե Մոուրինյոյի կողմից և խաղային պրակտիկա չէր ստանում, բայց նա սկսեց նկատելիորեն բարելավել խաղը 45 րոպեից հետո և ապացուցեց պորտուգալացի մասնագետին, որ լավ մարզավիճակում է: Վտանգավոր տուգանային հարվածը, 2 պաշտպանի միջով թիմի պաշտպանությունը կոտրելով և վերջին րոպեներին դարպասին կատարած հարվածը ցույց թվեցին երկրպագուներին, թե ինչ կարող է տալ Ժոզե Մոուրինյոյի թիմին «Բորուսիայի» նախկին ֆուտբոլիստը»: Givemesport «Հենրիխ Մխիթարյանի հզոր հաղորդագրությունը Ժոզե Մոուրինյոյին: Միայն Ժոզե Մոուրինյոն կարող է 26 մլն. ֆունտ ծախսել բարձրակարգ ֆուտբոլիստ ձեռք բերելու համար և չօգտագործել նրան:»
12.11.2016

Գևորգ Ղազարյանը մտավ հավաքականի լավագույն ռմբարկուների եռյակ

Չեռնոգորիայի հավաքականի հետ հանդիպման ավելացված ժամանակի վերջին վայրկյաններին հեռահար հարվածով Գևորգ Ղազարյանի խփած տպավորիչ գոլը ոչ միայն կամային հաղթանակ պարգևեց ՀՀ հավաքականին, այլև դարձավ 28-ամյա ֆուտբոլիստի հոբելյանական՝ 10-րդ գնդակը: Ղազարյանը դարձավ ազգային հավաքականում 10 գոլի սահմանագիծը հատած ընդամենը 3-րդ ֆուտբոլիստը: Այդ ցուցանիշին Գևորգը հասավ հավաքականում անցկացրած 52-րդ խաղում: Ազգային հավաքականում առաջինը 10 գոլի սահմանագիծը հատել է մեր ընտրանու ներկայիս գլխավոր մարզիչ Արթուր Պետրոսյանը՝ հոբելյանը նշելով 2003թ. մարտի 29-ին Երևանում Հս. Իռլանդիայի հավաքականի հետ կայացած Եվրոպայի առաջնության ընտրական մրցախաղում: Դա հավաքականում Արթուր Պետրոսյանի անցկացրած 60-րդ հանդիպումն էր: Ավելի արագ ազգային հավաքականում 10 գոլ է խփել մեր ընտրանու լավագույն ռմբարկու Հենրիխ Մխիթարյանը: Նման արդյունքի հասնելու համար նրանից 35 խաղ է պահանջվել: Հենրիխն իր 10-րդ գնդակը խփել է 2012թ. նոյեմբերի 14-ին Երևանում Լիտվայի հավաքականի հետ կայացած ընկերական մրցախաղում: Գևորգ Ղազարյանն ազգային հավաքականում 3 տարի գոլի հեղինակ չէր դարձել: Վերջին անգամ նա խփած գոլի բերկրանքը վայելել էր 2013թ. սեպտեմբերի 6-ին Պրահայում չեխերի հետ կայացած աշխարհի առաջնության ընտրական մրցախաղում: Ի դեպ, այդ խաղում էլ Գևորգը մրցակցի դարպասը գրավել էր ավելացված ժամանակում՝ 2:1 հաշվով հաղթանակ պարգևելով Հայաստանի հավաքականին: Իսկ գոլերի հաշիվը հավաքականում Ղազարյանը բացել է 2009թ. մարտի 28-ին Երևանում էստոնացիների հետ կայացած աշխարհի առաջնության ընտրական մրցախաղում: 87-րդ րոպեին նա գրավեց Սերգեյ Պարեյկոյի պաշտպանած դարպասը՝ մեր հավաքականին փրկելով պարտությունից (2:2): Դա ազգային հավաքականում 21-ամյա ֆուտբոլիստի 10-րդ խաղն էր: 2010թ. Ղազարյանը Եվրոպայի առաջնության ընտրական մրցաշարում մեկական անգամ գրավել է Սլովակիայի և Անդորրայի հավաքականների դարպասը, հաջորդ տարի կրկին աչքի է ընկել նույն մրցակիցների, ինչպես նաև մակեդոնացիների հետ կայացած ընտրական խաղերում: 2012թ. Գևորգը դուբլի հեղինակ է դարձել ղազախների հետ կայացած ընկերական խաղում: Գոլերից 8-ը Գևորգ Ղազարյանը խփել է ընտրական մրցախաղերում՝ այդ ցուցանիշով հավասարվելով Յուրա Մովսիսյանին: Ավելի շատ գոլեր ընտրական հանդիպումներում խփել են միայն Հենրիխ Մխիթարյանը (11) և Արթուր Պետրոսյանը (9): Նշենք նաև, որ ազգային հավաքականում գոլերի հաշիվը բացեցին Արտակ Գրիգորյանն ու Վարազդատ Հարոյանը: Անցկացրած 182 հանդիպումներում ՀՀ հավաքականը 167 գոլ է խփել: Դրանցում իրենց ներդրումն են ունեցել մեր հավաքականի 56 ֆուտբոլիստներ, ինչպես նաև սեփական դարպասը գրաված մրցակցի 4 խաղացողներ: Vivaronews.am-ը ներկայացնում է ազգային հավաքականում 2 և ավելի գոլ խփած ֆուտբոլիստների ցանկը: Ֆուտբոլիստներ Գոլ Առաջին գոլը 1.Հենրիխ Մխիթարյան 19 28.03.2009 Էստոնիա՝ 2:2 (ԱԱ) 2.Արթուր Պետրոսյան 11 15.11.1995 Դանիա՝ 1:3 (ԵԱ) 3.Գևորգ Ղազարյան 10 28.03.2009 Էստոնիա՝ 2:2 (ԱԱ) 4.Էդգար Մանուչարյան 9 04.06.2005 Մակեդոնիա՝ 1:2 (ԱԱ) 5.Մարկոս Պիզելի 9 28.05.2008 Մոլդովա՝ 2:2 (Ը) 6.Յուրա Մովսիսյան 9 07.09.2010 Մակեդոնիա՝ 2:2 (ԵԱ) 7.Արա Հակոբյան 7 28.04.2004 Թուրքմենստան՝ 1:0 (Ը) 8.Արմեն Շահգելդյան 6 10.05.1995 Մակեդոնիա՝ 2:2 (ԵԱ) 9.Արման Քարամյան 5 04.02.2000 Կիպրոս՝ 2:3 (Ը) 10.Ռոբերտ Արզումանյան 5 02.06.2007 Ղազախստան՝ 2:1 (ԵԱ) 11.Արթուր Սարկիսով 5 06.09.2011 Սլովակիա՝ 4:0 (ԵԱ) 12.Տիգրան Եսայան 4 25.06.1996 Պարագվայ՝ 2:1 (Ը) 13.Արաս Օզբիլիս 4 29.02.2012 Կանադա՝ 3:1 (Ը) 14.Էրիկ Ասադուրյան 3 05.10.1996 Հս. Իռլանդիա՝ 1:1 (ԱԱ) 15.Ալբերտ Սարգսյան 3 07.09.2002 Ուկրաինա՝ 2:2 (ԵԱ) 16.Ռազմիկ Գրիգորյան 2 10.05.1995 Մակեդոնիա՝ 2:2 (ԵԱ) 17.Կարապետ Միքայելյան 2 09.10.1996 Գերմանիա՝  1:5 (ԱԱ) 18.Գառնիկ Ավալյան 2 06.09.1997 Ալբանիա՝  3:0 (ԱԱ) 19.Կարեն Դոխոյան 2 02.02.2000 Մոլդովա՝ 2:1 (Ը) 20.Անդրեյ Մովսիսյան 2 03.06.2000 Լիտվա՝ 2:1 (Ը) 21.Արտակ Մինասյան 2 12.02.2001 Ուզբեկստան՝ 2:0 (Ը) 22.Արտավազդ Քարամյան 2 19.02.2004 Ղազախստան՝ 3:3 (Ը) 23.Համլետ Վ. Մխիթարյան 2 18.03.2005 Քուվեյթ՝ 1:3 (Ը) 24.Սարգիս Հովսեփյան 2 02.06.2007 Ղազախստան՝ 2:1 (ԵԱ) 25.Արարատ Առաքելյան 2 04.02.2008 Բելառուս՝ 2:1 (Ը) 26.Լևոն Փաչաջյան 2 28.05.2008 Մոլդովա՝ 2:2 (Ը) 27.Կառլեն Մկրտչյան 2 14.11.2012 Լիտվա՝ 4:2 (Ը) 28.Գեղամ Կադիմյան 2 28.05.2016 Գվատեմալա՝ 7:1 (Ը) Աշոտ Հայրապետյան http://www.vivaronews.am/articles/arthur-petrosyani-pharahegh-noramuteh-vitchakagruthyun
12.11.2016

Արթուր Պետրոսյանի փառահեղ նորամուտը. Վիճակագրություն

Արթուր Պետրոսյանի նորամուտը Հայաստանի ազգային հավաքականի գլխավոր մարզչի պաշտոնում իրոք շատ փառահեղ ստացվեց: Առաջին խաղակեսում 0:2 հաշվով զիջելով Չեռնոգորիայի հավաքականին, մեր ֆուտբոլիստներն իրենց մեջ ուժ գտան բեկելու մրցակցության ընթացքը և ավելացված ժամանակում խփած գոլի շնորհիվ կամային հաղթանակ տոնեցին: Նման բան ՀՀ հավաքականի ողջ պատմության ընթացքում առաջին անգամ տեղի ունեցավ: Հավաքականի անցկացրած 182 հանդիպումներում սա մեր ընտրանու կամային ընդամենը 5-րդ հաղթանակն էր: Այս հաղթանակը նաև առաջինն էր վերջին 3 տարիների ընթացքում անցկացրած ընտրական 13 հանդիպումներում, որոնցից 9-ում մեր հավաքականը պարտվել էր: Մինչ այդ վերջին անգամ մեր ֆուտբոլիստներին հաջողությունն ուղեկցել էր 2013թ. հոկտեմբերի 11-ին Երևանում բուլղարացիների հետ կայացած աշխարհի առաջնության ընտրական մրցախաղում (2:1): http://www.vivaronews.am/hayastan-chernogoria-fantastik-handipumeh-%D5%9D-lusankarnerov-fvotvosharkh Արթուր Պետրոսյանը դարձավ ՀՀ հավաքականում նորամուտը հաղթանակով նշած 6-րդ մարզիչը: Նախկինում նման բախտի էին արժանացել Սուրեն Բարսեղյանը, Անդրանիկ Ադամյանը, Միխայ Ստոյկիցան, Յան Պոուլսենը և Բեռնար Շալանդը: Առավել հաջողակ է գտնվել Սուրեն Բարսեղյանը, որին առաջինն է հաջողվել նորամուտը հաղթանակով նշել: Նրա գլխավորությամբ մեր հավաքականն Աբովյանում կայացած ընկերական խաղում 1:0 հաշվով հաղթել է Լիբանանի հավաքականին: Հաջորդ 2 հանդիպումներում ևս Սուրեն Բարսեղյանն իր սաների հետ դրական արդյունքի է հասել: Եվրոպայի առաջնության ընտրական մրցաշարի մեկնարկում մեր հավաքականը Երևանում նախ 3:1 հաշվով հաղթեց Անդորրայի ընտրանուն, ապա գոլազուրկ ոչ-ոքի խաղաց իսլանդացիների հետ: Եվ միայն 4-րդ խաղում Բարսեղյանի սաներն ընտրական մրցախաղում՝ Կիևում 0:2 հաշվով պարտվեցին ուկրաինացիներին: Յան Պոուլսենը ևս նորամուտը հավաքականում նշել է 2 անընդմեջ հաղթանակով: Նրա գլխավորությամբ մեր ֆուտբոլիստները Մալթայի մրցաշարում հաղթել են տանտերերին (1:0) և բելառուսներին (2:1): Սակայն մրցաշարի ավարտական խաղում ՀՀ հավաքականը 0:2 հաշվով պարտվել է իսլանդացիներին: VivaroNews.am-ը ներկայացնում է,  թե ինչպես են իրենց նորամուտը նշել Հայաստանի ազգային հավաքականը գլխավորած մարզիչները: Մարզիչներ Ամսաթիվ Մրցակից Հաշիվ Մրցավայր Խաղ 1.Էդուարդ Մարգարով 14.10.1992 Մոլդովա 0:0 Երևան Ը 2.Սամվել Դարբինյան 26.04.1995 Իսպանիա 0:2 Երևան ԵԱ 3.Խորեն Հովհաննիսյան 20.06.1996 Պերու 0:4 Լիմա Ը 4.Սուրեն Բարսեղյան 18.08.1998 Լիբանան 1:0 Աբովյան Ը 5.Վարուժան Սուքիասյան 09.01.2000 Գվատեմալա 1:1 Լոս Անջելես Ը 6.Անդրանիկ Ադամյան 07.06.2002 Անդորրա 2:0 Անդորրա լա Վիլա Ը 7.Օսկար Լոպես 07.09.2002 Ուկրաինա 2:2 Երևան ԵԱ 8.Միխայ Ստոյկիցա 29.03.2003 Հս. Իռլանդիա 1:0 Երևան ԵԱ 9.Բեռնար Կազոնի 18.08.2004 Մակեդոնիա 0:3 Սկոպիե ԱԱ 10.Հենկ Վիսման 04.06.2005 Մակեդոնիա 1:2 Երևան ԱԱ 11.Իան Պորտերֆիլդ 06.09.2006 Բելգիա 0:1 Երևան ԵԱ 12.Թոմ Ջոնս 08.09.2007 Կիպրոս 1:3 Ախնա Ը 13.Վարդան Մինասյան 17.11.2007 Պորտուգալիա 0:1 Լեյրիա ԵԱ 14.Յան Պոուլսեն 02.02.2008 Մալթա 1:0 Ատարդ Ը 15.Բեռնար Շալանդ 27.05.2014 ԱՄԷ 4:3 Ժնև Ը 16.Սարգիս Հովսեփյան 13.06.2015 Պորտուգալիա 2:3 Երևան ԵԱ 17.Արթուր Պետրոսյան 11.11.2016 Չեռնոգորիա 3:2 Երևան ԱԱ Աշոտ Հայրապետյան
12.11.2016

Հայաստան – Չեռնոգորիա ֆանտաստիկ հանդիպումը ՝ լուսանկարներով (ՖՈՏՈՇԱՐՔ)

ԱԱ 2018թ. որակավորման փուլ Հայաստան - Չեռնոգորիա (3-2) ֆանտաստիկ հանդիպումը ՝ լուսանկարներով Լուսանկարները ՝ Հրաչ Խաչատրյանի և Գրիգոր Գրիգորյանի
12.11.2016

Հայաստանի հավաքականի ֆուտբոլիստների գնահատականները՝ ըստ Vivaronews-ի

Vivaronews.am կայքը որոշեց ամփոփել Հայայստան-Չեռնոգորիա հանդիպումը ՝ գնահատականներ սահմանելով մեր ընտրանու ֆուտբոլիստների համար: ԱՐՍԵՆ ԲԵԳԼԱՐՅԱՆ – 5  Մեր ընտրանու ամենապատասխանատու խնդրահարույց դիրքը շարունակում է մնալ այդպիսին: Արսեն Բեգլարյանն իր լավագույն հանդիպումը չանցկացրեց: Դանիայի հետ արտագնա հանդիպումից հետո բոլորը նրան հերոսացնում էին, բայց էպիկ պահերն անցան ու եկանք իրականություն: Արսենը դեռ ստաբիլության հետ խնդիր ունի: ՎԱՐԱԶԴԱՏ ՀԱՐՈՅԱՆ – 8 «Փյունիկում» հանդես եկող Վարազդատ Հարոյանից այլևս ոչինչ չի մնացել: Տեղափոխվելով Իրան՝ Հարոյանը տիտանական աշխատանք կատարեց ու վերածվեց կենտրոնական գոտու առաջատար խաղացողի: Հիմա արդեն պետք է Անդոնյանը մտածի խաղային պրակտիկա հավաքելու ու հավաքականում նորից տեղ զբաղեցնելու համար: Համենայն դեպս այսպիսի տեմպերով խաղալու դեպքում Հարոյանը ստաբիլ կդառնա մեր ընտրանու հիմնական կազմի ֆուտբոլիստ: ՀՐԱՅՐ ՄԿՈՅԱՆ – 7 Իրանում հանդես եկող մեր մյուս ֆուտբոլիստն այսօր իր լավագույն հանդիպումը չանցկացրեց: Նման մրցակցի հետ խաղում զգացվում էր նրա խաղային պրակտիկայի պակասը ու վնասվածքից նոր ապաքինված լինելու հանգամանքը: Օգնեցին փորձն ու ուժային պայքար մղելու ունակությունը: ՏԱՐՈՆ ՈՍԿԱՆՅԱՆ – 6,5 Ակնհայտորեն աջ պաշտպանի դիրքը Տարոն Ոսկանյանի համար չէր: Գուցե 3 կենտրոնականով խաղալու դեպքում նա կարողանար հաջող փակել եզրերից մեկը՝ առանց գրոհելու: Թեպետ ճակատարգրական սխալներ չեղան, բայց վստահության համար կարելի է այլ աջ պաշտպան գտնել: ԼԵՎՈՆ ՀԱՅՐԱՊԵՏՅԱՆ – 4 Առավել քան ակնհայտ է, որ Լևոն Հայրապետյանն այս հանդիպման ամենաթույլ ֆուտբոլիստն է: Առաջին կեսում նրա սխալներից հետո մրցակիցը գոլ խփեց: Կասեցումներ, գրոհների շարունակություն: Ամենուրեք սխալներ էին: Չէին դիմանում անգամ Մխիթարյանի նյարդերը: Կարելի է մտածել այլ թեկնածուի մասին: ԱՐՏԱԿ ԳՐԻԳՈՐՅԱՆ – 9 Հայաստանի հավաքականի նոր շարժիչը: Դավիթ Մանոյանի բացակայությամբ հենց նրան էր վստահված հենակետայինի պարտականությունը: Արտակը ոչ միայն լավ քանդում էր մրցակցի գրոհները, այլև այն աշխարհից հետ բերեց մերոնց՝ կրճատելով հաշվի տարբերությունը: ԳՈՌ ՄԱԼԱՔՅԱՆ – 6 Այսօր Մալաքյանը ևս կարող էր ծանր կացության մեջ դնել թիմին: Վաղաժամ դեղինից հետո սկսեց ավելի զգուշավոր խաղալ ու տանուլ տալ անհատական պայքարների մեծամասնությունը: ՀԵՆՐԻԽ ՄԽԻԹԱՐՅԱՆ – 6,5 Խաղից առաջ Մխիթարյանը հայտարարել էր, որ այսօր կարևորը ոչ թե պրակտիկան է, այլ նվիրվածությունը: Խաղը ցույց տվեց հակառակը: Բազմաթիվ դրվագներում զգացվում էր, որ Հենոն խաղային տոնուսի զգալի պակաս ունի: Բայց համեմատաբար բարձր կարգը թույլ տվեց նրան լիարժեք հանդիպում անցկացնել: ՄԱՐԿՈՍ ՊԻԶԵԼԻ – 6 Ասյօր Մարկոսի օրը չէր: Գորշ հանդիպում անցկացրեց: Պատահական չէր, որ հենց առաջինն էլ փոխարինվեց: ԳԵՎՈՐԳ ՂԱԶԱՐՅԱՆ – 9,5 Հանդիպման լավագույն ֆուտբոլիստը: Բառացիորեն բոլոր դրվագներում Ղազարյանը ոչ մի սխալ թույլ չտվեց, կատարեց մեծ ծավալի աշխատանք ու ցույց տվեց, որ իսկապես պետք է հավաքականին: Գոլի արժեքի մասին խոսելն ավելորդ է: ՌՈՒՍԼԱՆ ԿՈՐՅԱՆ – 5,5 Հայաստանի հավաքականին անհրաժեշտ է լավ կենտրոնական հարձակվող: Ռուսլան Կորյանն այսօր չտպավորեց: ԱՐԹՈՒՐ ՍԱՐԿԻՍՈՎ – 5,5 Սարկիսովը նույնպես: ԿԱՄՈ ՀՈՎՀԱՆՆԻՍՅԱՆ - 5,5 Կամո Հովհաննիսյանը դուրս եկավ ճիշտ ժամանակին ու թարմություն հաղորդեց խաղին: Ոչ ավելին:  
12.11.2016

Մեր մրցակիցները. Լեհաստանի և Դանիայի հավաքականները հաղթեցին

Հայաստան - Չեռնոգորիա խաղից բացի, մեր ընտրանու խմբում տեղի ունեցավ ևս երկու հանդիպում: Դանիայի հավաքականը հյուրընկալեց Ղազախստանի ընտրանուն և առավելության հասավ 4-1 հաշվով, իսկ Լևանդովսկիի դուբլն ու Գրոսիցկիի գնդակը հաղթանակ պարգևեցին լեհերին Ռումինիայի հավաքականի հարկի տակ կայացած խաղում: Այսպիսով՝ 4-րդ տուրից հետո Լեհաստանի հավաքականը 10 միավորով գլխավորում է մրցաշարային աղյուսակը, Չեռնոգորիայի ընտրանին 7 միավորով երկրորդն է, Դանիայի հավաքականը 6 միավորով՝ 3-րդը, Ռումինիայի հավաքականը 5 միավորով՝ 4-րդը, իսկ Հայաստանի ընտրանին վաստակած 3 միավորով 5-րդն է: Մրցաշարային աղյուսակը եզրափակում է Ղազախստանի ընտրանին, որը վաստակել է 2 միավոր: Ռումինիա - Լեհաստան՝ 0-3 Դանիա - Ղազախստան՝ 4-1
12.11.2016

Հարոյան. «Հայաստանի հավաքականը շարունակելու է պայքարել Աշխարհի առաջնության ուղեգրի համար»

Աշխարհի առաջնության ընտրական փուլում Հայաստանի հավաքականը տնային հաղթանակ տոնեց Չեռնոգորիայի հավաքականի դեմ: Մեր ընտրանու կազմում գոլի հեղինակ դարձած Վարազդատ Հարոյանը կիսվեց տպավորություններով: «Շատ ուրախ եմ գոլիս համար, բայց ավելի շատ թիմի հաղթանակի համար: Մենք կարողացանք դուրս գալ  բարդ իրավիճակից. մոտ 3 տարի պաշտոնական խաղերում չէինք կարողանում հաղթել: Հայաստանը շարունակելու է պայքարել Աշխարհի առաջնության ուղեգրի համար: Առաջին խաղակեսից հետո բոլորը հանդերձարանում հավատում էին մեր հաղթանակին»:
12.11.2016

Մարկոս Պիզելի. «Արթուր Պետրոսյանը ցույց տվեց՝ մեր թիմը, ինչ որակներ ունի»

Հայաստանի ազգային ընտրանու քամբեքից հետո Չեռնոգորիայի ազգային հավաքականի դեմ մեր ընտրանու կիսապաշտպան Մարկոս Պիզելին պատասխանեց լրագրողների հարցերին: - Հայաստանի հավաքականը երկար ընդմիջումից հետո կարողացավ հաղթանակ տոնել: Ի՞նչ տրամադրություն ունեք: -Մենք 3 տարի չէինք կարողանում հաղթել, և Արթուր Պետրոսյանը եկավ ու մեզ շատ օգնեց պատրաստվել այս խաղին: Մենք էլ կարողացանք ցույց տալ, որ ֆուտբոլը շատ հասարակ բան է: Մենք մեծ թիմի դեմ լավ ֆուտբոլ խաղացինք: - Արթուր Պետրոսյանն ի՞նչ փոխեց հավաքականում: -Ամեն մարզիչ մի ձևով է աշխատում: Տակտիկական այլ աշխատանք է անում, կազմում փոփոխություններ է անում: Բայց Արթուր Պետրոսյանը մեզ հետ շատ է խոսել և ապացուցել է, թե ինչ որակներ ունեցող թիմ ենք: Նա մեզ օգնեց և մենք սկսեցինք դաշտը տեսնել:
12.11.2016

Շալանդ. «Արթուր Պետրոսյանը շատ բան կարող է տալ այս թիմին »

Չեռնոգորիայի հավաքականի դեմ տարած Հայաստանի ընտրանու փառահեղ հաղթանակից հետո մեր հավաքականի նախկին գլխավոր մարզիչ Բեռնարդ Շալանդը պատասխանեց Vivaronews.am-ի լրագրողի հարցերին: Ի՞նչ կասեք Հայաստանի Հավաքականի այսօրվա ցուցադրած խաղի մասին: -Ես շատ ուրախ եմ Հայաստանի ազգային հավաքականի և Արթուր Պետրոսյանի համար: 2-րդ խաղակեսը շատ լավ անցկացրեցին, թիմը ցույց տվեց մարտական ոգի, իհարկե, դա հեշտ չէր անել 2-0 հաշվի ժամանակ, բայց հայ ժողովրդի մարտական ոգին օգնեց թիմին և շնորհավորում ենք բոլոր ֆուտբոլիստներին: Մոտ 2 տարի է, ինչ լքել եք Հավաքականի գլխավոր մարզչի պաշտոնը: Ի՞նչ դրական փոփոխություններ նկատեցիք թիմում: -Կարծում եմ, որ թիմը լավ սկսեց, բայց առաջին կեսի ավարտին ամեն ինչ փոխվեց: Բայց ի վերջո խաղավերջին հավաքականը սկսեց պայքարել և տիրել գնդակին: Շնորհավորում եմ մարզչին, որը մեծ աշխատանք է տարել: Ո՞ր ֆուտբոլիստի խաղը Ձեզ ամենաշատը տպավորեց: -Սա թիմի հաղթանակն է: Ղազարյանը մեծ աշխատանք կատարեց: Արթուր Պետրոսյանը Ձեր օգնականն էր հավաքականում աշխատելու տարիներին: Աճե՞լ է նա որպես մարզիչ: -Երկար տարիներ է, ինչ Արթուրին ճանաչում եմ, նա հիանալի մարզիչ է և դրանում կասկած չի կարող լինել:  Նա կարող է շատ բան տալ այս թիմին: Հայաստանի հավաքականը դեռ կարո՞ղ է պայքարել Աշխարհի առաջնության ուղեգրի համար: -Այո՛, դեռ հնարավորություն կա: Ճիշտ է՝ դա հեշտ խնդիր չէ: Բայց եթե թիմը այսպիսի կամային ֆուտբոլ ցուցադրի, կկարողանա Աշխարհի առաջնության ուղեգիր նվաճել:
12.11.2016

Ռուսլան Կորյան. «Չի կարելի հանձնվել, որովհետև խաղում ենք հայրենիքի համար»

Հայաստանի հավաքականի հարձակվող Ռուսլան Կորյանը Չեռնոգորիայի դեմ խաղից հետո պատասխանեց VivaroNews.am-ի թղթակցի հարցերին. - Ի՞նչ տպավորություններ ունեք խաղից: - Շնորհավորում եմ բոլորիս: Ինչպիսի տպավորություններ կարող է լինել նման խաղից հետո: Կարծես առաջին կեսում լավ էինք սկսել, բայց ինքներս մեզ մի քանի գոլ բերեցինք: Լավ է, որ չհանձնվեցինք ու խաղը հետ բերեցինք: - Ի՞նչ էիք մտածում 0-2 հաշվից հետո: - Չի կարելի հանձնվել: Չի կարելի, որովհետև մենք խաղում ենք մեր հայրենիքի համար, մարդիկ գալիս են, ողջ սրտով երկրպագում, ուստի մենք չէինք կարող մեզ թույլ տալ հանձնվել: - Իսկ ինչ ասեց մարզիչը առաջին կեսից հետո: - Նույնն էլ նա ասեց: Որ չպետք է գլուխներս կախենք, պետք է աշխատենք, ու արդյունքը կգա: Իհարկե, բախտերս էլ բերեց, բայց այս ամենը պետք էր վաստակել: - Ի՞նչպես եղավ, որ թիմը այդպես կերպարանափոխվեց: - Մենք աստիճանաբար կայանում ենք որպես թիմ, խաղակցվում ենք: Սա, ընդհանրապես, իմ առաջին խաղն էր մեկնարկային կազմում: - Ի՞նչ է տալիս Հենրիխ Մխիթարյանի ներկայությունը թիմում: - Կարճ ասեմ՝ Հենրիխը մեր թիմի ամեն ինչն է: Նա թե պահեր է ստեղծում, թե պահում է խաղը:
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: