Հայաստանի ազգային հավաքական

28.05.2017

ՀՀ նախագահը պարգևատրել է Հենրիխ Մխիթարյանին

Հայաստանի հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը պարգևատրվեց Հայաստանի Հանրապետության նախագահի կողմից «Հայրենիքին մատուցած ծառայությունների համար» 1-ին աստիճանի մեդալով, հաղորդում է «Արմենպրես» լրատվական գործակալությունը: Հայաստանի հավաքականի ավագը պարգևատրվել է սպորտի զարգացմանը նպաստելու և Հայաստանն աշխարհում լավագույնս ներկայացնելու համար: Լրագրողների հետ զրույցում Մխիթարյանն ասել է, որ իր համար նախագահից նման պարգև ստանալը շատ մեծ պատիվ է, որը խթան կհանդիսանա իր հետագա նվաճումների համար: Մխիթարյանը նշել է նաև, որ պարգևը ստանալիս նախագահը իրեն շնորհակալություն է հայտնել Հայաստանը լավագույնս ներկայացնելու համար: Մխիթարյանն անդրադարձել է նաև Եվրոպա լիգայում հաղթելուց հետո Հայաստանի դրոշով մարզադաշտում շրջելուն. «Ինձ համար մեծ պատիվ է Հայաստանի դրոշը բարձրացնել նման վայրերում: Դրա մասին վաղուց եմ երազել, ի վերջո ստացվեց, և ես շատ ուրախ եմ»:  
27.05.2017

Ընդդեմ Գերմանիայի, Ֆրանսիայի և այլոց. Ինչպե՞ս են ավարտվել Հայաստանի ընտրանու վերջին 10 ընկերական խաղերը

Ինչպես հայտնի է, Հայաստանի հավաքականը հունիսի 4-ին Երևանում ընկերական հանդիպում է անցկացնելու Սենտ Քիթս և Նևիսի ընտրանու հետ: Արթուր Պետրոսյանի սաներն այդ մրցավեճի միջոցով կնախապատրաստվեն հունիսի 10-ին Չեռնոգորիայի հավաքականի հետ արտագնա հանդիպմանը, որ մեծ նշանակություն ունի 2018 թվականի աշխարհի առաջնության ընտրական մրցաշարում: Հայաստանի հավաքականը սեփական հարկի տակ հաճախ չի անցկացնում ընկերական հանդիպումներ, ուստի սա լավ հնարավորություն կլինի սեփական աչքերի առջև գնահատելու ընտրանու մարզավիճակը: Սա նաև մարզիչների համար հիանալի առիթ է փորձարկելու նոր ֆուտբոլիստների կամ, միգուցե, մարտավարություն: VivaroNews.am-ը ձեր ուշադրությանն է ներկայացնում Հայաստանի հավաքականի վերջին 10 ընկերական հանդիպումները և դրանց հետ կապված մանրամասները՝ ժամանակագրական հաջորդականությամբ: ԱՄԷ (Արաբական միացյալ Էմիրություններ) - Հայաստան՝ 3-4 Մայիսի 27, 2014թ. Գոլերը՝ 0-1՝ Լևոն Հայրապետյան 38՛, 1-1՝ Իսմայիլ Ահմեդ 40՛, 1-2՝ Հենրիխ Մխիթարյան 42՛, 2-2՝ Օմար Աբդուլռահման 52՛, 2-3` Հենրիխ Մխիթարյան 67՛, 2-4՝ Ռումյան Հովսեփյան 71՛, 3-4՝ Մուհանադ Սալեմ 85՛ «Ֆոնտենետ» մարզադաշտ, Ժնև, Շվեյցարիա Հայաստանի հավաքականի կազմը՝ 12. Գևորգ Կասպարով, 3. Վարազդատ Հարոյան, 6. Կառլեն Մկրտչյան, 8. Ռումյան Հովսեփյան (24. Ալեքս Էնրիկե դա Սիլվա), 10. Գևորգ Ղազարյան (11. Արթուր Սարկիսով), 14. Յուրա Մովսիսյան (27. Մաուրո Գևգեոզյան), 15. Հրայր Մկոյան, 18. Հենրիխ Մխիթարյան, 19. Հովհաննես Համբարձումյան (4. Տարոն Ոսկանյան), 20. Լևոն Հայրապետյան, 23. Արաս Օզբիլիս (25. Նորայր Ասլանյան): Գլխավոր մարզիչ՝ Բեռնար Շալանդ: Ալժիր - Հայաստան՝ 3-1 Մայիսի 31, 2014թ. Գոլերը՝ 1-0՝ Էսաիդ Բելկալեմ 14՛, 2-0՝ Նաբիլ Ղիլաս 23՛, 3-0՝ Իսլամ Սլիմանի 42՛, 3-1՝ Արթուր Սարկիսով 47՛ «Ստադ դե Տուրբիյոն» մարզադաշտ, Սիոն, Շվեյցարիա Հայաստանի հավաքականի կազմը՝ 1. Ռոման Բերեզովսկի, 24. Ալեքս Էնրիկե դա Սիլվա (3. Վարազդատ Հարոյան), 8. Ռումյան Հովսեփյան (9. Արթուր Յուսպաշյան, հետագայում նրա փոխարեն՝ 21. Ալեքսանդր Թումասյան), 4. Տարոն Ոսկանյան, 15. Հրայր Մկոյան (6. Կառլեն Մկրտչյան), 18. Հենրիխ Մխիթարյան, 20. Լևոն Հայրապետյան, 10. Գևորգ Ղազարյան (11. Արթուր Սարկիսով), 23. Արաս Օզբիլիս (19. Հովհաննես Համբարձումյան), 22. Էդգար Մանուչարյան (14. Յուրա Մովսիսյան), 27. Մաուրո Գևգեոզյան (25. Նորայր Ասլանյան): Գլխավոր մարզիչ՝ Բեռնար Շալանդ: Գերմանիա - Հայաստան՝ 6-1 Հունիսի 6, 2014թ. Գոլերը՝ 1-0՝ Անդրե Շյուռլե 52՛, 1-1՝ Հենրիխ Մխիթարյան 69՛, 11մ, 2-1՝ Լուկաշ Պոդոլսկի 71՛, 3-1՝ Բենեդիկտ Հյովեդես 73՛, 4-1՝ Միրոսլավ Կլոզե 76՛, 5-1, 6-1՝ Մարիո Գյոտցե 82՛,89՛ «Կոֆաս Արենա» մարզադաշտ, Մայնց, Գերմանիա Հայաստանի հավաքականի կազմը՝ 1. Ռոման Բերեզովսկի, 3. Վարազդատ Հարոյան, 5. Ռոբերտ Արզումանյան, 7. Արթուր Եդիգարյան, 8. Ռումյան Հովսեփյան (11. Արթուր Սարկիսով), 10. Գևորգ Ղազարյան, 14. Յուրա Մովսիսյան, 15. Հրայր Մկոյան, 18. Հենրիխ Մխիթարյան, 20. Լևոն Հայրապետյան, 22. Էդգար Մանուչարյան (21. Ալեքսանդր Թումասյան): Գլխավոր մարզիչ՝ Բեռնար Շալանդ:
26.05.2017

Ձևավորվեց Հայաստանի հավաքականի ամբողջական հայտացուցակը. Օրվա գլխավոր լուրերի քրոնիկոնը

Օրը հագեցած էր հայկական ֆուտբոլին առնչվող նորություններով: Դրանք առնչվում են և՛ Հայաստանում, և՛ միջազգային ֆուտբոլում կատարվող իրադարձություններին, որոնք անմիջական կապ ունեն արտերկրում հանդես եկող հայազգի ֆուտբոլիստների հետ: Ձեր ուշադրությանն ենք ներկայացնում մայիսի 26-ի իրադարձությունների քրոնիկոնը: Արթուր Պետրոսյանը Հայաստանի Բարձրագույն խմբի առաջնությունից ազգային հավաքական է հրավիրել 7 ֆուտբոլիստների: «Ալաշկերտից» հրավիրվել է 4 (Արսեն Բեգլարյան, Գագիկ Դաղբաշյան, Արտակ Գրիգորյան, Արտակ Եդիգարյան), «Փյունիկից»՝ 2 (Արմեն Մանուչարյան, Նարեկ Ասլանյան), «Գանձասար-Կապանից»՝ մեկ ֆուտբոլիստ (Գրիգոր Մելիքսեթյան): http://www.vivaronews.am/davith-yurchenkon-u-evs-15-futbolist-hravirvel-en-hayastani-azgayin-havakhakan Արթուր Պետրոսյանի հարցազրույցը «Լավ ռադիոյին». «Կփորձարկենք նոր ֆուտբոլիստների, բայց բոլոր առաջատարները, այդ թվում՝ Մխիթարյանը, մասնակցելու են Սենթ Քիթս և Նևիսի հետ ընկերական խաղին: Հնարավոր է՝ Հենրիխը մասնակցի մեկ խաղակեսի: Դավիթ Յուրչենկոն դեռևս չի տվել վերջնական պատասխան»: Արթուր Պետրոսյան. «Կամո Հովհաննիսյանը հունիսի 4-ին խաղ ունի իր ակումբի կազմում, որից հետո միայն կմիանա հավաքականին: Արաս Օզբիլիսի հետ կապված առայժմ հայտնի չէ, նա այդ հարցը քննարկում է իր մարզչի հետ: Գոռ Մալաքյանը վնասվածք ունի, դրա համար էլ հրավիրել ենք Նարեկ Ասլանյանին, իսկ Արմեն Մանուչարյանին՝ Հովհաննես Համբարձումյանի փոխարեն: Արթուր Քարտաշյանն առաջնության երկրորդ հատվածում չխաղաց իր մակարդակի վրա, բայց մենք շարունակելու ենք հետևել նրան»: Արթուր Պետրոսյան. «Հենրիխ Մխիթարյանի հաջողության գործոնը շատ կարևոր փաստ է հատկապես երիտասարդ ֆուտբոլիստների համար և ոչ միայն: Սա ցույց է տալիս, որ ֆուտբոլում անհնարին ոչինչ չկա, եթե ունես նպատակ և աշխատում ես այդ ուղղությամբ»: Օուեն Հարգիվզ. «Մխիթարյանի գոլը եզրափակչում շատ անհրաժեշտ էր «Յունայթեդին», որպեսզի «սպանեին» խաղը: Մխիթարյանն այդ դրվագում փառահեղ հանդես եկավ: Նա շատ գոլեր է խփել Եվրոպա լիգայի փլեյ-օֆֆում, բայց այս մեկը լավագույնն էր»: «ԲՄԱ-Խաբարովսկի» հարձակվող Ռուսլան Կորյանը՝ «Օրենբուրգի» հետ անցումային խաղից հետո (0-0). «Լավ է, որ գոլ բաց չթողեցինք: Մրցակցի դաշտում գոլ խփելը մեծ արժեք կունենա մեզ համար: Ամեն ինչ կորոշվի Օրենբուրգում: Ամեն բան մեզանից է կախված, մենք հավատում ենք մեր ուժերին: Առաջին խաղին չմասնակցեցի որակազրկման պատճառով, բայց մարզադաշտում էի և աջակցում էի մեր թիմին»: Ուկրաինայի Մ-21 առաջնության 31-րդ տուրում «Ստալը» մրցակցի հարկի տակ 3-1 հաշվով հաղթել է «Զիրկային»: Արթուր Դանիելյանը մասնակցել է երկրորդ խաղակեսին, իսկ Արամ Ադամյանը փոխարինման է մտել 80-րդ րոպեին: Եղիշե Մելիքյանի գլխավորած «Ստալ Մ-21»-ն ընթանում է 8-րդ տեղում: Ղազախական «Աստանայի» ֆուտբոլիստ Գևորգ Նաջարյանը հրավիրվել է երկրի երիտասարդական հավաքական, որը հունիսի 5-11-ն անցկացնելու է ուսումնամարզական հավաք: Ընտրանին նախատեսում է ունենալ նաև ընկերական հանդիպումներ:
26.05.2017

Արթուր Պետրոսյան. «Մխիթարյանը և հավաքականի մյուս առաջատարները մասնակցելու են ընկերական խաղին»

Հայաստանի հավաքականի գլխավոր մարզիչ Արթուր Պետրոսյանը «Լավ ռադիոյին» տված հարցազրույցում խոսել է ընտրանու հայտացուցակում ընդգրկված և բացակայող ֆուտբոլիստների մասին: «Չեմ սիրում ընկերական խաղերը պաշտոնական հանդիպումներից առաջ, բայց ես այս անգամ համաձայնեցի, քանի որ երկու խաղերի միջև 6 օրվա դադար կա: Կփորձարկենք նոր ֆուտբոլիստների, բայց բոլոր առաջատարները, այդ թվում՝ Մխիթարյանը, մասնակցելու են Սենթ Քիթս և Նևիսի հետ ընկերական խաղին: Հնարավոր է՝ Հենրիխը մասնակցի մեկ խաղակեսի: Այս տարի ընկերական հանդիպումներ այլևս չենք ունենա, քանի որ ժամանակ չկա: Խաղային բոլոր օրերին մենք ունենալու ենք պաշտոնական մրցավեճեր: Դավիթ Յուրչենկոն դեռևս չի տվել վերջնական պատասխան, բայց նա սպասում էր մեր հրավերին, որն էլ մենք ուղարկել ենք: Կարծում եմ՝ մոտ օրերին ամեն ինչ պարզ կլինի: Նրան հրավիրել ենք մրցակցություն ստեղծելու համար: Մենք արդեն ունենք լավ դարպասապահի՝ ի դեմ Արսեն Բեգլարյանի: Արմեն Համբարձումյանն իրավունք չունի մասնակցելու Չեռնոգորիայի հավաքականի հետ խաղին, նրան հրավիրել ենք, որպեսզի ծանոթանանք: Կարծում եմ՝ սեպտեմբերից արդեն կարող է խաղալ: Կամո Հովհաննիսյանը հունիսի 4-ին խաղ ունի իր ակումբի կազմում, որից հետո միայն կմիանա հավաքականին: Արաս Օզբիլիսի հետ կապված առայժմ հայտնի չէ, նա այդ հարցը քննարկում է իր մարզչի հետ: Գոռ Մալաքյանը վնասվածք ունի, դրա համար էլ հրավիրել ենք Նարեկ Ասլանյանին, իսկ Արմեն Մանուչարյանին՝ Հովհաննես Համբարձումյանի փոխարեն: Իսկ Արթուր Քարտաշյանն առաջնության երկրորդ հատվածում չխաղաց իր մակարդակի վրա, բայց մենք շարունակելու ենք հետևել նրան: Հենրիխ Մխիթարյանը մեր առաջին ֆուտբոլիստն է, ով գոլ է խփել Եվրոպա լիգայի եզրափակչում և նվաճել գավաթը: Սա շատ կարևոր փաստ է հատկապես երիտասարդ ֆուտբոլիստների համար և ոչ միայն: Սա ցույց է տալիս, որ ֆուտբոլում անհնարին ոչինչ չկա, եթե ունես նպատակ և աշխատում ես այդ ուղղությամբ»,- ասել է մասնագետը: http://www.vivaronews.am/hayastani-arajnuthyan-7-futbolistner-hravirvel-en-azgayin-havakhakan http://www.vivaronews.am/davith-yurchenkon-u-evs-15-futbolist-hravirvel-en-hayastani-azgayin-havakhakan
26.05.2017

Հայաստանի առաջնության 7 ֆուտբոլիստներ հրավիրվել են ազգային հավաքական

Մայիսի 16-ին Հայաստանի ազգային հավաքականի գլխավոր մարզիչ Արթուր Պետրոսյանն արդեն հրապարակել էր Հայաստանի ազգային հավաքականի՝ արտերկրում հանդես եկող ֆուտբոլիստների անունները, ովքեր հրավեր էին ստացել մասնակցելու Հայաստան-Սենթ Քիթս և Նևիս ընկերական և Չեռնոգորիա-Հայաստան ընտրական հանդիպումների նախապատրաստական հավաքին: Ինչպես հաղորդում է ՀՖՖ պաշտոնական կայքը, այսօր՝ մայիսի 26-ին, Արթուր Պետրոսյանը հրապարակել է նաև Հայաստանի առաջնությունում հանդեղ եկող ֆուտբոլիստների անունները. Արսեն Բեգլարյան, «Ալաշկերտ» Գրիգոր Մելիքսեթյան, «Գանձասար-Կապան» Արմեն Մանուչարյան, «Փյունիկ» Գագիկ Դաղբաշյան, «Ալաշկերտ» Արտակ Գրիգորյան, «Ալաշկերտ» Արտակ Եդիգարյան, «Ալաշկերտ» Նարեկ Ասլանյան «Փյունիկ» http://www.vivaronews.am/davith-yurchenkon-u-evs-15-futbolist-hravirvel-en-hayastani-azgayin-havakhakan
25.05.2017

Հենրիխ Մխիթարյանը՝ հայկական ֆուտբոլի լավագույն ռմբարկուների հնգյակում

Եվրոպա լիգայի եզրափակչում «Այաքսի» դարպասը Հենրիխ Մխիթարյանի խփած գեղեցիկ գոլը ոչ միայն ամրապնդեց «Մանչեսթր Յունայթեդի» հաղթանակը, այլև հնարավորություն տվեց Հայաստանի հավաքականի ավագին ու ռմբարկուին ընդգրկվելու հայկական ֆուտբոլի ամենաարդյունավետ ֆուտբոլիստների լավագույն հնգյակում: Այդ գոլը պաշտոնական մրցումներում Հենրիխի 178-րդ գնդակն էր: Գոլերից 30-ը Մխիթարյանը խփել է «Փյունիկում» ՀՀ առաջնությունում, 6 անգամ էլ աչքի է ընկել Հայաստանի գավաթի հանդիպումներում: Ազգային հավաքականում Հենրիխի հաշվին 20 գոլ է գրանցված, իսկ ավելի վաղ նա 9 գոլ էր հեղինակել Հայաստանի երիտասարդական հավաքականի կազմում:  Բնականաբար, գոլերի մեծամասնությունը (113) Մխիթարյանը խփել է արտերկրի թիմերում՝ Դոնեցկի «Մետալուրգում» և «Շախտյորում», Դորտմունդի «Բորուսիայում» և «Մանչեսթր Յունայթեդում»: Նշված 113 գոլերից 77-ը նա խփել է Ուկրաինայի, Գերմանիայի և Անգլիայի առաջնություններում, 14-ը՝ այդ երկրների գավաթի խաղարկություններում, 1-ը՝ Գերմանիայի Սուպերգավաթի խաղում, 21 անգամ էլ աչքի է ընկել եվրոգավաթների մրցաշարերում: Ինչ խոսք, Հենրիխ Մխիթարյանի խփած գոլերն ավելի արժեքավոր են, քանի որ դրանք գրանցվել են ուժեղ մրցակիցների հետ հանդիպումներում: Հայ ֆուտբոլիստներից միայն Վարդան Ղազարյանն է արտերկրում խփած գոլերի քանակով (155) առայժմ գերազանցում Հենրիխ Մխիթարյանին: Սակայն պետք է հաշվի առնել, որ նա այդ գոլերը խփել է Լիբանանում հանդես գալիս, որի առաջնությունը չես համեմատի Ուկրաինայի, առավել ևս Գերմանիայի և Անգլիայի առաջնությունների խաղամակարդակի հետ: Առայժմ Հայաստանի անկախության շրջանի հայկական ֆուտբոլի լավագույն ռմբարկուն Արսեն Ավետիսյանն է, ով պաշտոնական մրցումներում իր բոլոր 236 գոլերը խփել է հայկական ակումբներում և ՀՀ ազգային հավաքականում: Մխիթարյանը լավ հնարավորություն ունի տարիներ անց գերազանցելու Ավետիսյանի ցուցանիշը և դառնալու հայկական ֆուտբոլի լավագույն ռմբարկուն: Ընթացիկ մրցաշրջանում նա «Մանչեսթր Յունայթեդում» անցկացրած պաշտոնական 40 հանդիպումներում 11 գոլի հեղինակ է դարձել: Գոլերից 4-ը Հենրիխը խփել է Անգլիայի պրեմիեր լիգայում, 1-ը՝ Անգլիայի գավաթի մրցաշարում, 6-ը՝ Եվրոպա լիգայի հանդիպումներում: Ի դեպ, Մխիթարյանը դարձավ Եվրոպա լիգայի մրցաշարում «Մանչեսթր Յունայթեդի» լավագույն ռմբարկուն՝ շրջանցելով Զլատան Իբրահիմովիչին: Իր ֆուտբոլային կարիերայի ընթացքում Մխիթարյանն առայժմ առավել արդյունավետ է գործել 2012/13թթ. մրցաշրջանում՝ Դոնեցկի «Շախտյորի» կազմում անցկացրած պաշտոնական 42 հանդիպումներում դառնալով 29 գոլի հեղինակ: Այդ տարի նա 25 գնդակով դարձավ Ուկրաինայի առաջնության լավագույն ռմբարկու՝ սահմանելով արդյունավետության նոր ռեկորդ, որը մինչ օրս չի գերազանցվել: VivaroNews.am-ը ներկայացնում է հայկական ֆուտբոլի լավագույն ռմբարկուների ցանկը, որոնք պաշտոնական մրցումներում 100 և ավելի գոլ են խփել: Հաշվի են առնված ՀՀ առաջնություններում (Ա), ՀՀ գավաթի մրցաշարերում (Գ), Հայաստանի Սուպերգավաթի հանդիպումներում (Ս), հայկական ակումբներում եվրոգավաթների մրցաշարերում (Ե), ՀՀ ազգային (ԱՀ) և երիտասարդական (ԵՀ) հավաքականներում, «Համագործակցության գավաթի» խաղարկություններում (ԱՊՀ) և արտերկրի բարձրագույն խմբի թիմերում (ԱԵ) խփած գոլերը: Ֆուտբոլիստներ Ա Գ Ս Ե ԱՀ ԵՀ ԱՊՀ ԱԵ ԸՆԴ 1.Արսեն Ավետիսյան 197 28 - 4 2 - 5 - 236 2.Արթուր Պետրոսյան 125 15 1 - 11 - 2 37 191 3.Արթուր Քոչարյան 140 23 - - - 4 - 19 186 4.Արա Հակոբյան 131 13 - - 7 6 2 21 180 5.Հենրիխ Մխիթարյան 30 6 - - 20 9 - 113 178 6.Վարդան Ղազարյան 20 2 - - - - - 155 177 7.Արամ Ոսկանյան 89 17 1 2 - 1 - 50 160 8.Արման Քարամյան 100 18 - 3 5 - 1 21 148 9.Տիգրան Եսայան 125 14 - - 4 - 1 3 147 10.Արամ Հակոբյան 110 26 - 4 2 2 2 - 146 11.Արմեն Շահգելդյան 105 19 3 3 6 - - 10 146 12.Գեղամ Հովհաննիսյան 111 32 - 1 - - 1 - 145 13.Մարկոս Պիզելի 75 8 1 2 9 - - 36 131 14.Վահե Յաղմուրյան 104 18 - - - - - 6 128 15.Յուրա Մովսիսյան - - - - 9 - - 106 115 16.Սամվել Նիկոլյան 86 24 1 1 - - - - 112 17.Վարազդատ Ավետիսյան 83 19 1 - 1 - 2 - 106 18.Մհեր Ավանեսյան 89 10 1 1 - - - 4 105 19.Արտյոմ Ադամյան 85 15 1 1 - - - - 102 20.Շիրակ Սառիկյան 96 3 - 1 - - 1 - 101 Աշոտ Հայրապետյան http://www.vivaronews.am/selfi-zlatani-het-ev-gavatheh%D5%9D-glxaverevum-inchpes-henrix-mxitharyaneh-tonec-metc-nvatchumeh-fotoreportazh
24.05.2017

Հայտնի է Չեռնոգորիայի հավաքականի կազմը, որ կնախապատրաստվի Հայաստանի հետ խաղին

Չեռնոգորիայի ազգային հավաքականի գլխավոր մարզիչ Լյուբիշա Տումբակովիչը հրապարակել է ընդլայնված կազմ, որը կնախապատրաստվի Իրանի հետ ընկերական և Հայաստանի հետ ԱԱ-2018 որակավորման փուլի հանդիպումներին: Դարպասապահներ՝ Մլադեն Բոժովիչ /«Զետա»/, Վուկաշին Պոլեկշիչ /«Վաշաշ», Հունգարիա/, Դանիել Պետկովիչ /ՄՏԿ, Հունգարիա/, Միլան Միյատովիչ /«Դեչիչ»/, Պաշտպաններ՝ Ստեֆան Սավիչ /«Ատլետիկո Մադրիդ», Իսպանիա/, Ֆիլիպ Ստոյկովիչ /«Մյունխեն 1860», Գերմանիա/, Ադամ Մարուշիչ, Ժարկո Տոմաշևիչ /երկուսն էլ՝ «Օստենդե», Բելգիա/, Նեմանյա Միյուշկովիչ /«Տարազ», Ղազախստան/, Էլսադ Էվերոտիչ /«Սիոն», Շվեյցարիա/, Մարկո Շիմիչ /«Ռոստով», Ռուսաստան/, Մարկո Բաշա /«Լիլ», Ֆրանսիա/, Դուշան Լագատոր /«Չուկարիչկի», Սերբիա/, Կիսապաշտպաններ՝ Մարկո Յանկովիչ, Նեբոյշա Կոսովիչ /երկուսն էլ՝ «Պարտիզան», Սերբիա/, Նիկոլա Վուկչևիչ /«Բրագա», Պորտուգալիա/, Մարկո Բակիչ /«Ալկորկոն», Իսպանիա/, Ալեքսանդր Շեկիչ /«Գենչլերբիրլիգի», Թուրքիա/, Վուկա Սավիչիչ /«Սլովան», Սլովակիա/, Միրկո Իվանիչ /ԲԱՏԵ, Բելառուս/, Դամիր Կոյաշևիչ /«Վարդար», Մակեդոնիա/, Վլադիմիր Յովովիչ /«Սպարտակ Սուբոտիցա», Սերբիա/, Սեադ Խակշտաբանովիչ /«Հալշտադտ», Շվեդիա/, Հարձակվողներ՝ Ստեֆան Յովետիչ /«Սևիլիա», Իսպանիա/, Ֆատոս Բեչիրայ /«Դինամո» Մոսկվա, Ռուսաստան/, Ստեֆան Մուգոշա /«Կառլսռուհե», Գերմանիա/, Լուկա Ջորջևիչ /«Զենիթ», Ռուսաստան/, Միրկո Վուչինիչ /«Ալ Ջազիրա», ԱՄԷ/:
23.05.2017

«Մխիթարյանն այն ֆուտբոլիստն է, որ միշտ կգտնի իր տեղը». Լևոն Պաչաջյանի հարցազրույցը VivaroNews.am-ին (տեսանյութ)

Ստոկհոլմում VivaroNews.am-ի անձնակազմը հանդիպել է Հայաստանի հավաքականի նախկին ֆուտբոլիստ Լևոն Պաչաջյանին, ով ծավալուն հարցազրույց է տվել՝ պատմելով Հենրիխ Մխիթարյանի առաջին քայլերի, նրա առաջընթացի և խաղաոճի, Մանչեսթերում ունեցած նախնական դժվարությունների, ինչպես նաև իր ակումբային գործերի մասին.
23.05.2017

Մոնիկա Մխիթարյան. «Հենրիխին երբեմն անվանում եմ «վարձու մարդասպան»»

«Մանչեսթեր Յունայթեդի» և Հայաստանի ազգային հավաքականի կիսապաշտպան Հենրիխ Մխիթարյանի քույրը՝ Մոնիկա Մխիթարյանը, ով աշխատում է ՈՒԵՖԱ-ում, հարցազրույց է տվել «Հայեր» մեդիահարթակին: Նա, մասնավորապես, պատմել է ֆուտբոլային ոլորտում աշխատելու, եղբոր մարդկային որակների և ապագա պլանների մասին: «Հավանաբար, դեպի ֆուտբոլային աշխարհ ընտրությունը շատ բնական էր: Գիտեք, որ մեր ընտանիքի շարժիչ ուժը լուսահոգի հայրս է և այս ընտրությունը միշտ նրա հետ լինելու ճանապարհն է: Ֆուտբոլը մեր ընտանիքի երկրորդ կրոնն է: Նրանում ինչ-որ հատուկ մի բան կա ու ես սիրում եմ այն: Երբ տանը ֆուտբոլ եմ նայում, ինձ թվում է, որ ես երաժշտություն եմ լսում նրանում: Հենրիխը շատ օրինակելի է իր գործում ու շատ զգայուն մարդ, բայց խղճահարության նշույլ անգամ չունի խաղադաշտում: Երբեմն նրան անվանում եմ «վարձու մարդասպան»: Նա միշտ կամ մահացու փոխանցում է անում դեպի դարպասը կամ՝ նպատակային կրակոց: Ինձ համար, իհարկե, նա իմ կրտսեր եղբայրն է, որի հետ ես կարող եմ խենթություններ անել ու հաճույք ստանալ: Նա իմ լավագույն ընկերն է: Այս պահին աշխատում եմ ՈՒԵՖԱ-ում: Աշխատում եմ մի ծրագրում, որը խնդիր ունի աջակցել ազգային ասոցիացիաներին կոմունիկացիոն ռազմավարության ոլորտում: Ապագայում՝ չգիտեմ: Եթե մի օր թողնեմ ՈՒԵՖԱ-ն, գուցե զբաղվեմ իրենց պրոֆեսիոնալ կարիերայում ֆուտբոլիստներին աջակցելու հարցերով»,- ասել է Մոնիկա Մխիթարյանը: http://www.vivaronews.am/video/sky-sports-i-lragrogh-mxitharyaneh-shat-lav-e-ashxatum-mourinyoyi-het-tesanyuth
22.05.2017

Արթուր Պետրոսյան. «Յուրչենկոյից դեռևս պատասխան չենք ստացել»

Հայաստանի հավաքականի գլխավոր մարզիչ Արթուր Պետրոսյանը Հանրային հեռուստաընկերությանը տված հարցազրույցում անդրադարձել է ազգային ընտրանի հրավիրված Դավիթ Յուրչենկոյին, որը ներկայումս պաշտպանում է Մախաչկալայի «Անժիի» գույները: «Դավիթ Յուրչենկոյին հրավեր ենք ուղարկել, սակայն դեռևս վերջնական պատասխան չենք ստացել, սպասում ենք: Նա պետք է որոշում կայացնի, եթե ցանկանա Հայաստանի հավաքականում խաղալ, մեծ հաճույքով նրան կընդունենք»: Հայ մարզիչը անդրադարձել է նաև «Ռոստովի» կիսապաշտպան Խորեն Բայրամյանին և «Մորդովիայի» կիսապաշտպան Արմեն Համբարձումյանին: Վերջինս նույնպես հրավեր է ստացել ազգային հավաքականից: «Արմեն Համբարձումյանին ավելի շատ հրավիրել ենք ծանոթանալու նպատակով, քանի որ նա չի կարող մասնակցել առաջիկա հանդիպմանը, որովհետև նա խաղացել է Ռուսաստանի երիտասարդական ու պատանեկան հավաքականներում, և նրա փաստաթղթերի հարցը դեռ ընթացքի մեջ, այնպես որ այս խաղին նա չի կարողանա մասնակցել: Սակայն կմարզվի հավաքականի հետ, և տեսնենք՝ ինչ կլինի: Իսկ ինչ վերաբերում է Խորեն Բայրամյանին, ապա հնարավոր է, որ մոտ ապագայում տեսնենք նրան հավաքականում, բայց որոշումը պետք է ֆուտբոլիստը կայացնի: Նրա հետ ևս խոսել ենք այս թեմայի շուրջ, ինքը պետք է խոսի իր թիմի ղեկավարության հետ, նոր մեզ վերջնական պատասխան տա, բայց, կարծում եմ, այս խաղին չենք հասցնի»: Հիշեցնենք՝ Հունիսի 4-ին՝ ժամը 20:00-ին՝ Վազգեն Սարգսյանի անվան «Հանրապետական» մարզադաշտում, կկայանա Հայաստան-Սենթ Քիթս և Նևիս ընկերական հանդիպումը, իսկ հունիսի 10-ին՝ ժամը 22:45-ին, Պոդգորիցայի «Գրադսկի» մարզադաշտում կկայանա Աշխարհի 2018 թ. առաջնության ընտրական փուլի Չեռնոգորիա-Հայաստան հանդիպումը:
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: