Իսպանիա

25.05.2017

Հայտնի է Եվրոպա լիգայի այս մրցաշրջանի խորհրդանշական հավաքականը

Եվրոպա լիգան ներկայացրել է այս մրցաշրջանի խորհրդանշական հավաքականը: Հավաքականը բաղկացած է 18 հոգուց, որի համարյա  կեսը անգլիական «Մանչեսթեր Յունայթեդի» ներկայացուցիչներն են: Հավաքականի կազմում ընդգրկվել են մանկունիացիների ֆուտբոլիստներ Սերխիո Ռոմերոն, Էրիկ Բային, Դեյլի Բլինդը, Անտոնիո Վալենսիան, Հենրիխ Մխիթարյանը, Պոլ Պոգբան, Անդեր Էրերան և Զլատան Իբրահիմովիչը: Խորհրդանշական հավաքականի մյուս անդամներն են Սերխիո Ալվարեսը, Գուստավո Կաբրալը, Ժերեմի Մորելը, Մատյես դե Լիգթը, Պաբլո Էրնանդեսը, Յուրի Տիլեմանսը, Կորենտին Տոլիսոն, Ամին Յունեսը, Ալեքսանդր Լյակազետը և Բերտրան Տրաորեն:
25.05.2017

«Բարսելոնայի» հարձակվողը բաց կթողնի Իսպանիայի գավաթի եզրափակիչը

Կատալոնական «Բարսելոնայի» հարձակվող Լուիս Սուարեսը վնասվածք է ստացել և շարքից դուրս եկել 15 օրով: Ինչպես հաղորդում է ակումբի պաշտոնական կայքը, ուրուգվայցի հարձակվողը մարզման ժամանակ մկան է ձգել և չի կարողանա խաղադաշտ դուրս գալ 15 օր: Եթե անգամ չլիներ վնասվածքը, Սուարեսն այնուամենայնիվ չէր կարողանա օգնել իր թիմին, քանի որ որակազրկված էր: Ընթացիկ մրցաշրջանում ուրուգվայցին բոլոր մրցաշարերում դարձել է 37 գոլի հեղինակ: Հիշեցնենք նաև, որ վնասվածքի պատճառով Իսպանիայի գավաթի խաղարկության եզրափակիչ «Բարսելոնա» - «Ալավես» խաղը բաց կթողնի նաև «կապտանռնագույնների» կիսապաշտպան Սերխի Ռոբերտոն: Իսպանիայի գավաթի եզրափակիչը տեղի կունենա մայիսի 27-ին, հանդիպումը կմեկնարկի 23:30-ին:
24.05.2017

«Ռեալը» ցանկանում է ձեռք բերել «Բետիսի» երիտասարդ ֆուտբոլիստին

Մադրիդի «Ռեալը»  ընթացիկ մրցաշրջանից հետո ցանկանում է ձեռք բերել «Բետիսի» կիսապաշտպան Դանի Սեբալյոսին: AS-ի հաղորդմամբ, «արքայական» ակումբը ցանկանում է գնել 20-ամյա կիսապաշտպանին և թողնել, որպեսզի նա շարունակի հանդես գալ «Բետիսի» կազմում, սակայն արդեն վարձավճարով: Մադրիդյան ակումբի ղեկավարությունը ցանկանում է գնել երիտասարդ և տաղանդավոր ֆուտբոլիստների, թողնել, որ նրանք փորձ ձեռք բերեն և նոր միայն ընդգրկել թիմի հիմնական կազմում: Հիշեցնենք, որ նման քաղաքականությունը արդեն գործել է Մարկո Ասենսիոյի դեպքում: «Բետիսն» այժմ այնպիսի ֆինանսական վիճակում է, որ դժվար թե հրաժարվի մադրիդցիների առաջարկից: Սեբալյոսի տրանսֆերը գնահատվում է 15 մլն. եվրո: Թիմերի ներկայացուցիչներն արդեն հանդիպել են և քննարկել ֆուտբոլիստի տեղափոխման հարցը: «Ռեալը» պատրաստվում է 20-ամյա կիսապաշտպանի համար վճարել նախնական 10 մլն. եվրո: Սեբալյոսի ծառայություններով հետաքրքրված են նաև  «Ատլետիկոն», «Արսենալը» և «Լիվերպուլը»:  
24.05.2017

Հայտնի է՝ որ համազգեստով «Ռեալը» կխաղա ՉԼ եզրափակչում (լուսանկար)

Չեմպիոնների լիգայի եզրափակիչ խաղում Մադրիդի «Ռեալը» կխաղա արտագնա խաղերի համազգեստով: Մադրիդցիները կխաղան մանուշակագույն մարզահագուստով, իսկ «Յուվենտուսը»` իր տնային սև ու սպիտակ համազգեստով: Մարզաշապիկների վրա տպագրված  կլինի եզրափակիչ խաղի անցկացման վայրն ու տարեթիվը, ինչպես նաև մրցող թիմերի անունները:   Real Madrid usará o uniforme alternativo na decisão. Juve (que estava de azul no último título, em 96) vai com a camisa tradicional pic.twitter.com/GOb6Ar521M — Leonardo Bertozzi (@lbertozzi) 24 мая 2017 г.
24.05.2017

Ինիեստա. «Կա հավանականություն, որ կարիերաս կավարտեմ ոչ «Բարսելոնայում»

«Բարսելոնայի» կիսապաշտպան Անդրես Ինիեստան մեկնաբանել է իր ապագան կատալոնական ակումբում: «Այնուամենայնիվ մի փոքր հավանականություն կա, որ ես կավարտեմ կարիերաս «Բարսելոնայում»: Ոչինչ չեմ կարող ասել  «Բարսայի» հետ նոր պայմանագիր կնքելու մասին, նախ պետք է ամեն ինչ վերլուծեմ՝ հիմնվելով ավարտված մրցաշրջանում իմ ելույթների վրա: Միայն դրանից հետո որոշում կկայացնեմ»,-ասել է Ինիեստան: Ավելի վաղ տեղեկացրել էինք, որ «Յուվենտուսը» պատրաստ է պայմանագիր առաջարկել Ինիեստային:
24.05.2017

Մեսին դատապարտվել է 21 ամսվա ազատազրկման

Իսպանիայի վճռաբեկ դատարանը այսօր հրապարակել է Լիոնել Մեսիի գործով վճիռը: Ի սկզբանե, մեղադրող կողմը պահանջում էր 3 տարվա ազատազրկում Մեսիի և իր հոր Խորխեի համար, սակայն դատարանը նվազեցրեց պատժի ժամկետը մինչև 21 ամիս: Տեղեկացվում է, որ արգենտինացին չի վճարել 4,1 մլն. եվրո Իսպանիայի հարկային մարմնին: Սակայն պետք է ընդգծել, որ Իսպանիայում 2 տարվա ազատազրկումը տնտեսական բնույթի հանցագործությունների համար չեն պատժվում իրական ազատազրկումով: Այսպիսով, ֆուտբոլիստը միայն կվճարի դատարանի կողմից սահմանած տուգանքը, իսկ եթե կրկին նրան մեղադրանք առաջադրեն նման կարգի հանցագործության առիթով, ապա նա այլևս չի խուսափի ազատազրկումից:  
24.05.2017

Կոուտինյոն ասել է, թե ինչու երբեք «Բարսելոնա» չի տեղափոխվի

«Լիվերպուլի» բրազիլիացի կիսապաշտպան Ֆիլիպե Կոուտինյոն Independent-ի հետ զրույցում խոստովանել է, որ երբեք չի տեղափոխվի «Բարսելոնա», Մադրիդի «Ռեալ» կամ «Բավարիա»: «Երկարաժամկետ պայմանագիր ունեմ «Լիվերպուլի» հետ:  Եթե մնամ այստեղ, իմ պատվին մի օր արձան կկանգնեցնեն: Իսկ եթե գնամ ինչ-որ այլ ակումբ օրինակ` «Բարսելոնա», «Բավարիա» կամ «Ռեալ», կդառնամ շարքային մի ֆուտբոլիստ: Այստեղ կարող եմ դառնալ ավելին, քան ինչ-որ ֆուտբոլիստ»,-շեշտել է 24-ամյա կիսապաշտպանը: Կոուտինյոյի պայմանագիրը «Կարմիրների» հետ նախատեսված է մինչև 2022 թվականը, և խաղացողը, ինչպես պարզ է դառնում, ոչ մի ցանկություն չունի լքել Անգլիայի Պրեմիեր լիգան: ԱՊԼ-ի ավարտված մրցաշրջանում Բրազիլիայի հավաքականի ֆուտբոլիստը 13 գոլի հեղինակ է դարձել և օգնել թիմի նվաճել Չեմպիոնների լիգայի ուղեգիր:
24.05.2017

Չավի. «Ռեալի» այդ ֆուտբոլիստը իմ խաղի ժառանգն է, նա թիմի մեքենան է»

«Բարսելոնայի» նախկին կիսապաշտպան Չավին խոսել է Չեմպիոնների լիգայի եզրափակիչ «Յուվենտուս»-«Ռեալ Մադրիդ» հանդիպման մասին և ընդգծել, որ չի կարող երկրպագել «արքայական» ակումբին, քանի որ կատալոնական ակումբի սանն է. «Որպես «Բարսելոնայի» սան, չեմ կարող երկրպագել «Ռեալին»:  Միշտ էլ այդպես է եղել: Եթե ինչ-որ բան լավ է «Ռեալի» համար, ապա «Բարսելոնայի» համար դա վատ է, և ճիշտ ընդհակառակը: Բայց պետք է ասեմ, որ «Ռեալը» արժանի է այդ հաջողություններին»: Չավին նաև անվանել է «Ռեալի» այն ֆուտբոլիստին, ում խաղը իրեն ամենից շատն է հիացնում. «Կրոսը «Ռեալի» մեքենան է: Նրա խաղաոճը հիշեցնում է իմ խաղը, կարելի է ասել, որ այդ դիրքում նա իմ խաղի ժառանգն է: Իսկ Խեդիրան միշտ իր թիմի տրամադրության տակ է: Լավն այն է, որ նա լուռ իր գործն է անում և չի ցանկանում ճանաչում ձեռք բերել»,-ասել է իսպանացին Sport Bild-ի հետ զրույցում:
24.05.2017

«Մեսի՞, թե՞ Ռոնալդու». Ինչպես է այդ հարցին պատասխանել «Ռեալի» նորեկը (տեսանյութ)

Ինչպես արդեն տեղեկացրել էինք, «Ֆլամենգոյի» հարձակվող Վինիսիուս Ժունիորը կարիերան շարունակելու է Մադրիդի «Ռեալում»: Տրանսֆերային պայմանագիրը պաշտոնապես ուժի մեջ է մտնելու 2018 թվականի հուլիսից, իսկ 16-ամյա ֆուտբոլիստը շարունակելու է ելույթները «Ֆլամենգոյի» կազմում մինչև 2019 թվականի հուլիսը: Ըստ ոչ պաշտոնական լուրերի՝ մադրիդյան ակումբին այս տրանսֆերն արժեցել է 45 մլն եվրո: Սակայն մինչև այս տրանսֆերի պաշտոնական հաստատումը Վինիսիուսը խոստովանել է, որ Նեյմարի իր կուռքն է, իսկ Ռոնալդու և Մեսի անվերջ շարունակվող դիմակայությունից, նախապատվություն է տալիս «Բարսելոնայի» առաջատարին:
24.05.2017

Նեյմարի հայրը հորդորում է որդուն տեղափոխվել անգլիական ակումբ

Ինչպես տեղեկացնում է Daily Express-ը, «Բարսելոնայի» հարձակվող Նեյմարի հայրը հորդորում է որդուն փոխել ակումբային գրանցումը: Բրազիլիացու հայրը, որը հանդիսանում է նաև նրա գործակալը, գտնում է, որ 25-ամյա ֆուտբոլիստը չի կարողանում ցույց տալ իր լավագույն որակները՝ գտնվելով Լիոնել Մեսիի և Լուիս Սուարեսի շողքի տակ: Եթե Նեյմարը ցանկանում է գերազանցել Ռոնալդուին և Մեսիին, ապա նա պետք է պաշտպանի մեկ այլ ակումբի գույները: Հարձակվողի հայրը համոզված է, որ նա կարող է մեծ հաջողությունների հասնել «Մանչեսթեր Սիթիիում» և «Մանչեսթեր Յունայթեդում», որոնք պատրաստ են ֆուտբոլիստի տեղափոխության վրա ահռելի գումարներ ծախսել:
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: