Անգլիա

29.03.2017

Սանչես. «Ցանկանում եմ խաղալ այնպիսի թիմում, որը հաղթում է»

«Արսենալի» հարձակվող Ալեքսիս Սանչեսը հայտնել է, որ ցանկանում է ֆուտբոլային կարիերան շարունակել Լոնդոնում և պաշտպանել հեռանկարներ ունեցող ակումբի գույները: «Երջանիկ եմ Լոնդոնում և կցանկանայի իմ ելույթներով հասնել նրան, որ թարմացնեմ պայմանագիրս «Արսենալի» հետ: Շատ լավ կլիներ խաղալ հավակնոտ թիմի կազմում, որը հաղթում է: Չեմ ուզում փոխել բնակությանս վայրը: 28 տարեկան եմ, և իմ առջև դեռևս նոր հորիզոններ են բացվելու: Կարողանում եմ իմ մասին լավ հոգ տանել»,-ասել է չիլիացի ֆուտբոլիստը: Ավելի վաղ տեղեկացրել էինք, որ Սանչեսի ծառայություններով լրջորեն հետաքրքված է լոնդոնյան  «Չելսին»:
29.03.2017

Ազար. «Կցանկանայի չինարեն սովորել»

«Չելսիի» կիսապաշտպան Էդեն Ազարը անվանել է այն երկրները, որոնք կցանկանար այցելել և ցանկություն է հայտնել զբաղվել չինարենի ու ճապոներենի ուսումնասիրությամբ: «Այո՛, ես խոսում եմ անգլերեն և ֆրանսերեն, բայց կցանկանայի սովորել չինարեն կամ ճապոներեն, քանի որ այդ լեզուները տարբերվում են մյուսներից: Հիանալի կլիներ տիրապետել այդ լեզուներին: Ո՞ր երկիրը կցանկանայի այցելել, լավ հարց է, ես շատ տեղերում եմ եղել ֆուտբոլի շնորհիվ: Բրազիլիայում եմ եղել ԱԱ-2014-ի ժամանակ, բայց կուզեի լինել Լատինական Ամերիկայի մի քանի երկրում ևս, օրինակ, Արգենտինայում, Չիլիիում: Հրաշալի կլիներ նաև Մեքսիկան տեսնելը: Երբ տարբեր երկրներ ես գնում՝ ֆուտբոլային խաղերի, ամեն ինչ այլ է. մարզվում ես, խաղ ես անցկացնում և հանդիպում երկրպագուների հետ: Սակայն երբ հանգստանալում եմ մեկնում որևէ տեղ, ես ինձ սահմանափակում եմ տեղի տեսարժան վայրերը ուսումնասիրելու տեսանկյունից: Ես փոքրիկ երեխաներ ունեմ, և երկար թռիչքներից հետո ամեն ինչ այդքան հեշտ չէ»,-լոնդոնյան ակումբի պաշտոնական կայքն է փոխանցում բելգիացի ֆուտբոլիստի խոսքերը:
29.03.2017

Մոուրինյո. «Մենք կորցրել ենք 5 ֆուտբոլիստի»

Անգլիայի առաջնության 30-րդ տուրի «Վեսթ Բրոմվիչի» դեմ խաղից առաջ «Մանչեսթեր Յունայթեդի» գլխավոր մարզիչ Ժոզե Մոուրինյոն խոսել է թիմի կադրային խնդիրների մասին: «Մենք կորցրել ենք 4 ֆուտբոլիստի, և Պոլ Պոգբան, ամենայն հավանականությամբ, նույնպես չի խաղա: Այսպիսով, 5 ֆուտբոլիստ չի կարողանա մասնակցել առաջիկա հանդիպմանը»: Պորտուգալացին հաստատել է, որ ազգային հավաքականի տրամադրության տակ գտնվելիս կենտրոնական պաշտպաններ Քրիս Սմոլինգը և Ֆիլ Ջոնսը վնասվածք են ստացել: Պոլ Պոգբան դեռևս չի ապաքինվել «Ռոստովի» դեմ պատասխան խաղում ստացած վնասվածքից, իսկ Զլատան Իբրահիմովիչը և Անդեր Հերերան որակազրկված են: Հիշեցնենք՝ «Մանչեսթեր Յունայթեդ»-«Վեսթ Բրոմվիչ» հանդիպումը կկայանա ապրիլի 1-ին՝ 18:00-ին:
29.03.2017

Իբրահիմովիչը մանրամասներ է հայտնել «Մանչեսթեր Յունայթեդում» իր ապագայի մասին

«Մանչեսթեր Յունայթեդի» շվեդ հարձակվող Զլատան Իբրահիմովիչը հաստատել է, որ բանակցություններ է վարում ակումբի հետ իր պայմանագիրը երկարաձգելու ուղղությամբ: «Եկեք տեսնենք, թե ինչ կստացվի: Մենք զրուցում ենք: Ես ևս մեկ տարվա հնարավորություն ունեմ: Ես ցանկանում եմ լավ խաղ ցույց տալ այնքան ժամանակ, ինչքան որ այստեղ կլինեմ: Տեսնենք, թե ինչ կստացվի, ժամանակ կա: Ես վայելում եմ նման ֆանտաստիկ ակումբում լինելը: [«Մանչեսթեր Յունայթեդն»] անկասկած՝ աշխարհի լավագույն ակումբներից մեկն է՝ լավ մարզչով: Ես նրան վաղուց գիտեմ, նա հաղթող է, նա կատարյալ մարզիչ է այս ակումբի համար»,-ասել է Իբրահիմովիչը:
29.03.2017

Ընդամենը 500 հանդիսական 35000-անոց մարզադաշտում, և պաստառ, որի վրա գրված էր «Wenger Out»

Աշխարհի առաջնության որակավորման փուլում Նոր Զելանդիան 2-0 հաշվով հաղթել է Ֆիջիին: 35000 հանդիսական տեղավորող հսկա մարզադաշտում խաղին ներկա էին ընդամենը 500 երկրպագու, բայց տրիբունաները զարդարում էր մի պաստառ, որի վրա գրված էր «Wenger Out»: Նույնիսկ օվկիանոսից այն կողմ կան «Արսենալի» երկրպագուներ, ովքեր չեն ալարում ամեն տեղ հիշեցնել ֆրանսիացի մարզչի հրաժարականի պահանջի մասին:
29.03.2017

Համացանցում հայտնվել է «Չելսիի» առաջիկա մրցաշրջանի համար նախատեսված մարզաշապիկները (ՖՈՏՈ)

Հաջորդ մրցաշրջանից սկսած «Չելսին» համագործակցելու է Nike սպորտային հագուստ և պարագաներ արտադրող ամերիկյան ընկերության հետ: Համացանցում արդեն հայտնվել է լոնդոնյան ակումբի հաջորդ մրցաշրջանի համար նախատեսված մարզաշապիկը: Այն նման է «Արիստոկրատների» 1987-88 մրցաշրջանի մարզաշապիկին:  
29.03.2017

Ժոզե Մոուրինյոն հետաքրքրված է «Արսենալի» երկու կիսապաշտպաններով

«Մանչեսթեր Յունայթեդի» գլխավոր մարզիչ Ժոզե Մոուրինյոն հետաքրքրված է «Արսենալի» երկու կիսապաշտպաններով՝ Մեսուտ Օզիլով և Ալեքս Օքսլեյդ-Չեմբեռլենով, հայտնում է Goal.com-ը: Երկու ֆուտբոլիստների պայմանագրերն էլ ավարտվում են հաջորդ ամառ, ուստի «Մանչեսթեր Յունայթեդը» ուսումնասիրում է իրավիճակը՝ հարմար տարբերակների առկայության դեպքում առաջարկներ կատարելու համար: Մոուրինյոն Օքսլեյդ-Չեմբեռլենին ցանկացել էր գնել դեռ «Չելսիում» աշխատանքի ժամանակ՝ որպես Պետր Չեխի գործարքի մի մաս, սակայն չէր ստացվել: Ինչ վերաբերում է Օզիլին, ապա պորտուգալացի մարզիչը լավ գիտի ֆուտբոլիստին «Ռեալում» համատեղ աշխատանքից: Աղբյուրը հայտնում է նաև, որ թեև Օզիլի ու «Արսենալի» միջև նոր պայմանագրի շուրջ բանակցությունները արդյունք չեն տվել, բայց գերմանացին այնքան էլ միտված չէ լքել Լոնդոնը:
28.03.2017

«Չելսին» մտադիր է Ազարին փոխարինել Պրեմիեր լիգայի աստղերից մեկով

«Արսենալի» հարձակվող Ալեքսիս Սանչեսն ամռանը լինելու է լոնդոնյան ակումբներից մյուսի՝ «Չելսիի» տրանսֆերային նպատակը, եթե Էդեն Ազարն, այդուհանդերձ, լքի «ազնվականների» ճամբարը: Ինչպես հաղորդում է The Guardian-ը, «Չելսիի» գլխավոր մարզիչ Անտոնիո Կոնտեն ակումբի ղեկավարներին արդեն հայտնել է չիլիացուն իր թիմում տեսնելու ցանկության մասին: «Արսենալը» չի ցանկանում իր առաջատարին բաց թողնել գլխավոր մրցակիցներից մեկի կազմ, սակայն շատ բան կախված կլինի նրանից, թե «զինագործներն» ինչպես կավարտեն մրցաշրջանը: Եթե լոնդոնցիները ձեռք չբերեն Չեմպիոնների լիգայի գավաթի հաջորդ խաղարկության ուղեգիր, ապա «Արսենալին» դժվար կլինի Ալեքսիսին պահպանել իր կազմում: Եթե չիլիացու տրանսֆերը կայանա, ապա նա 2006 թվականից հետո կդառնա առաջին ֆուտբոլիստը, ով «Արսենալից» տեղափոխվում է «Չելսի»: Այդ տարի լոնդոնյան մեկ ակումբից մյուսին էր միացել պաշտպան Էշլի Քոուլը:
28.03.2017

Մայքլ Քերիկ. «Երբ առաջին անգամ տեսա Մխիթարյանին, հասկացա, որ կարգին ֆուտբոլիստ է»

Հենրիխ Մխիթարյանի վերաբերյալ վերլուծական հոդվածում ESPNFC-ն մեջբերել է Մայքլ Քերիկի խոսքերը Հենրիխ Մխիթարյանի մասին: «Առաջին անգամ, երբ ես տեսա Մխիթարյանին, միջմրցաշրջանային հատվածի առաջին օրն էր, հասկացա, որ կարգին ֆուտբոլիստ է: Ես անմիջապես ասեցի դա Էշլի Յանգին: Երբեմն դու դա տեսնում ես ֆուտբոլիստների մոտ, երբեմն՝ ոչ: Երբեմն դու դա տեսնում ես միշտ: Նա կարողանում է խաղալ երկու ոտքերով, շրջվել, նա արագ է: Ես կարծում եմ, որ նա ունի համապատասխան ներուժ՝ լինելու այնտեղ, որտեղ ուզում է: Նա շատ խելացի է այն դիրքերում, որտեղ խաղում է: Ես հավանում եմ նրա խաղը: Դու խաղում ես որոշ ֆուտբոլիստների դեմ, ովքեր տաղանդավոր են, բայց չեն կարողանում քեզ խանգարել: Նրանք ունեն անհրաժեշտ տաղանդը, բայց նրանք բավականաչափ ջանք չեն գործադրում քո դեմ խաղալիս, նրանք չեն փորձարկում քեզ: Իսկ Հենրիխն անում է դա, ու նրա դեմ խաղալը հեշտ չէ, որովհետև նա փորձում է սողոսկել բոլոր այն բաց տեղերը, բոլոր «գրպանները», որ հնարավոր է, ու պոկվել առաջ»,-ասել է Քարիկը:
28.03.2017

Դավիդ դե Խեան այլևս «Ռեալի» թիվ 1 նպատակը չէ

Մադրիդի «Ռեալը» շարունակում է նոր դարպասապահի փնտրտուքը: Goal.com-ի փոխանցմամբ՝ այս դիրքում մադրիդցիների թիվ 1 թիրախը Բելգիայի հավաքականի դարպասապահ Տիբո Կուրտուան է: 2015թ. օգոստոսին «Մանչեսթեր Յունայթեդի» դարպասապահ Դե Խեան «Ռեալում» չհայտնվեց միայն տեխնիկական խնդիրների պատճառով: Թվում էր, թե հետագայում տրանսֆերը կկայանա, բայց ամեն ինչ դեռ մնում է խոսակցությունների մակարդակում, իսկ իսպանացին նոր պայմանագիր կնքեց մանկունիացիների հետ: Այժմ մադրիդցիները ջանքեր են գործադրում «Չելսիի» դարպասապահ Տիբո Կուրտուային ձեռք բերելու համար: Լոնդոնյան ակումբը նույնիսկ սկսել էր հետաքրքրվել «Ատլետիկոյի» դարպասապահ Յան Օբլակին ձեռք բերելու հնարավորությամբ:
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: