Շախմատ

25.05.2017

Վարուժան Հակոբյանն ու Սամուել Սևյանն արժանացան Spring Chess Classic փառատոնի գլխավոր մրցանակներին

Ամերիկյան Սենթ Լուիս քաղաքում անցկացված շախմատի Spring Chess Classic գրոսմայստերական մրցաշարերում գերազանց հանդես եկան հայ գրոսմայստերներ Սամուել Սևյանն ու Վարուժան Հակոբյանը, որոնք իրենց մրցաշարերում նվաճեցին գլխավոր մրցանակները: Վարուժան Հակոբյանը հանդես եկավ 10 գրոսմայստերների մասնակցությամբ շրջանաձև մրցակարգով անցկացված A խմբի մրցաշարում: Մեկնարկն անհաջող էր հայ գրոսմայստերի համար, ով պարտվեց վրացի Գեորգի Կաչեյշվիլուն: Ինչպես պարզվեց հետագայում, դա Հակոբյանի միակ պարտությունն էր: Հաջորդ տուրերում Վարուժանը հաջող ելույթներ ունեցավ, որոնց շնորհիվ միանձնյա գլխավորում էր մրցաշարային աղյուսակը: Նրան հաջողվեց մինչև վերջ պահպանել առաջատարի իր դիրքը: Վարուժան Հակոբյանը 9 հնարավորից վաստակած 6 միավորով դարձավ A խմբի մրցաշարի հաղթող՝ պարգևատրվելով 6 հազար դոլարով: Նա կես միավորով գերազանցեց երկրորդ տեղը զբաղեցրած Յարոսլավ Ժերեբուխին: C խմբի մրցաշարում էլ վերելքով հանդես եկավ 16-ամյա Սամուել Սևյանը, ով 6 շախմատիստների մասնակցությամբ, երկու շրջանով անցկացված մրցաշարում 10 հնարավորից վաստակած 6,5 միավորով գրավեց առաջին տեղը: Պատանի շախմատիստը պարգևատրվեց 5 հազար դոլարով: Նա մեկ միավորով առաջ անցավ 2-րդ տեղը գրաված ուկրաինացի գրոսմայստեր Իլյա Նիժնիկից: Սևյանն էլ մրցաշարում միայն մեկ պարտություն կրեց՝  8-րդ տուրում զիջելով Անդրեյ Ստուկոպինին:
11.05.2017

Տիգրան Քոթանջյանը 3-րդն է Տաշքենդի հուշամրցաշարում

Շախմատի Հայաստանի 2014թ. չեմպիոն Տիգրան Քոթանջյանը հաջող հանդես եկավ Տաշքենդում անցկացված ուզբեկ գրոսմայստեր Գեորգի Աղզամովի հուշամրցաշարում՝ զբաղեցնելով 3-րդ տեղը: Քոթանջյանը շատ հաջող սկսեց մրցաշարը՝ մեկնարկում տոնելով 4 անընդմեջ հաղթանակ: 5-րդ տուրում հայ գրոսմայստերի հաղթարշավը կասեցրեց բելառուս շախմատիստ Կիրիլ Ստուպակը՝ առավելության հասնելով նրա նկատմամբ: Հաջորդ երեք տուրերում վաստակելով 2,5 միավոր, Քոթանջյանն ավարտական տուրից առաջ գլխավոր մրցանակի հավակնորդների թվում էր: Նա ընդամենը կես միավոր էր զիջում առաջատարին: Ցավոք, ավարտական՝ 9-րդ տուրում հայ շախմատիստը պարտվեց ուկրաինացի գրոսմայստեր Ալեքսանդր Բորտնիկին ու զրկվեց գլխավոր մրցանակը նվաճելու հնարավորությունից: 9 հնարավորից վաստակած 6,5 միավորով Տիգրան Քոթանջյանը եզրափակեց լավագույն եռյակը՝ արժանանալով 2000 դոլար պարգևավճարի: Իսկ մրցաշարի հաղթող դարձավ Ալեքսանդր Բորտնիկը, ով վաստակեց 7,5 միավոր և արժանացավ 4000 դոլար պարգևավճարի: Նա լրացուցիչ գործակիցներով գերազանցեց նույնպիսի արդյունքի հասած բելառուս Կիրիլ Ստուպակին, ով որպես պարգև ստացավ 3000 դոլար:
24.04.2017

Սերգեյ Մովսիսյանը 14 առաջատարներից մեկն է

Ռեյկյավիկում անցկացվող շախմատի մրցաշարի հերթական երկու տուրերում Սերգեյ Մովսիսյանը 1,5 միավոր վաստակեց: 5-րդ տուրում  նա ոչ-ոքի խաղաց ԱՄՆ-ի ներկայացուցիչ Ավոնդեր Լիանգի հետ, իսկ հաջորդ տուրում հաղթեց կանադացի Աման Համբլետոնին: 6 տուրից հետո Սերգեյ Մովսիսյանը 5 միավորով 13 շախմատիստների հետ գլխավորում է մրցաշարային աղյուսակը: Տաթև Աբրահամյանը 5-րդ տուրում հաղթեց նորվեգացի Քրիստիան Տունգեին, իսկ հաջորդ պարտիայում պարտվեց հնդիկ Մագեշ Պանչանաթանին: Տաթևը 4 միավորով 37-րդ տեղում է:
23.04.2017

Էլինա Դանիելյանն աշխարհի առաջնության ուղեգիր նվաճեց

Ռիգայում վերջնագիծը հատեց կանանց շախմատի Եվրոպայի անհատական առաջնությունը: Ավարտական տուրից առաջ Հայաստանի 4 ներկայացուցիչներից միայն Էլինա Դանիելյանն էր հավակնում մեդալի: Սակայն նրան չհաջողվեց մրցանակակիր դառնալ: 11-րդ տուրում Էլինան հաշտություն կնքեց վիետնամցի Թհան Չանգ Հոանգի հետ և 7,5 միավորով զբաղեցրեց 7-րդ տեղը: Դա հնարավորություն տվեց Դանիելյանին աշխարհի առաջնության ուղեգիր նվաճել: Հիշեցնենք, որ Ռիգայում խաղարկվում էր  նաև աշխարհի առաջնության 14 ուղեգիր: Հայ շախմատիստուհիներից երկրորդ արդյունքը ցույց տվեց Լիլիթ Մկրտչյանը, ով ոչ-ոքի խաղալով վրացի Մերի Արաբիձեի հետ, վաստակած 6,5 միավորով գրավեց 46-րդ տեղը: Հայաստանի չեմպիոնուհի Մարիա Գևորգյանը հաղթեց  Գերմանիայի ներկայացուցիչ Ֆիլիզ Օսմանոշային և 5,5 միավորով հանգրվանեց 75-րդ հորիզոնականում: Լիլիթ Գալոյանը մրցաշարն ավարտեց պարտությամբ՝ զիջելով էստոնացի Մայ Նարվային: Լիլիթը 5 միավորով զբաղեցրեց  97–րդ տեղը: Եվրոպայի չեմպիոնուհի հռչակվեց վրացի Նանա Ձագնիձեն, ով վաստակեց 8,5 միավոր: 8-ական միավորով արծաթե և բրոնզե մեդալակիրներ դարձան ռուսաստանցիներ Ալեքսանդրա Գորյաչկինան և Ալիսա Գալյամովան:
23.04.2017

GRENKE Chess Classic. Լևոն Արոնյանն այս տարի իր առաջին մրցանակը շահեց

Գերմանիայում ավարտվեց շախմատի GRENKE Chess Classic մրցաշարը, որում գերազանց հանդես եկավ Լևոն Արոնյանը՝ նվաճելով գլխավոր մրցանակը: Նա իր համար առաջին հորիզոնականն ապահովել էր մրցաշարի ավարտից մեկ տուր առաջ: Ավարտական տուրում Լևոնը սևերով հաշտություն կնքեց Ֆաբիանո Կարուանայի հետ և վաստակեց 5,5 միավոր: Արոնյանը մրցաշարն անցկացրեց առանց պարտության՝ տոնելով 4 հաղթանակ, 3 պարտիա ավարտելով ոչ-ոքի: Ուրախալի է, որ վերջապես Արոնյանը վերագտել է իր խաղը և այս տարի առաջին մրցաշարը շահեց:  Բացի Արոնյանից, անպարտելի մնաց միայն աշխարհի գործող չեմպիոն Մագնուս Կառլսենը: Վերջինս ոչ-ոքի խաղալով Մաքսիմ Վաշիե-Լագրավի հետ, 4 միավորով գրավեց 2-րդ տեղը: Տուրի մյուս երկու պարտիաներն էլ ոչ-ոքի ավարտ ունեցան: Միավորը կիսեցին նաև Հոու Յիֆանն ու Արկադի Նայդիչը, Գեորգ Մայերն ու Մաթիաս Բլյուեբաումը: 4 միավորով լավագույն եռյակը եզրափակեց Ֆաբիանո Կարուանան: Հաջորդ տեղերը զբաղեցրին Հոու Յիֆանը, Մաքսիմ Վաշիե-Լագրավը, Արկադի Նայդիչը՝ 3,5-ական միավոր, Գեորգ Մայերն ու Մաթիաս Բլյուեբաումը՝ 2-ական:
21.04.2017

Միակ կես միավորը Սերգեյ Մովսիսյանը կորցրեց առանց խաղի

Իսլանդիայի մայրաքաղաք Ռեյկյավիկում անցկացվող շախմատի մրցաշարում հաջող են մեկնարկել Հայաստանի միակ ներկայացուցիչ Սերգեյ Մովսիսյանը և ԱՄՆ-ը ներկայացնող Տաթև Աբրահամյանը: Սերգեյ Մովսիսյանը մրցաշարը սկսեց 2 անընդմեջ հաղթանակով՝ առավելության հասնելով ամերիկացի Ալան Սևեջի և կանադացի Մայքլ Կլեյնմանի նկատմամբ: 3-րդ տուրում վիճակահանության արդյունքում Սերգեյ Մովսիսյանը մնացել էր առանց մրցակցի: Մրցակարգի համաձայն նրա անվան դիմաց կես միավոր գրանցվեց: Այսպես հայ շախմատիստն առանց խաղի առաջին կես միավորը կորցրեց: Մինչդեռ չի բացառվում, որ Մովսիսյանը 3-րդ անընդմեջ հաղթանակը կարող էր տոնել, եթե խաղար: Սերգեյը դա ապացուցեց 4-րդ տուրում՝ պարտության մատնելով իսլանդացի Տրյոստուր Թուրհալսոնին: Մովսիսյանը 3,5 միավորով 8-րդ տեղում է: Նա կես միավոր է զիջում երեք առաջատարներին: Տաթև Աբրահամյանը մրցաշարը սկսել էր 3 անընդմեջ հաղթանակով, սակայն 4-րդ տուրում առաջին պարտությունը կրեց հնդիկ Աբհիջեթ Գուպտայի հետ մրցախաղում: Տաթևը 3 միավորով 24-րդ տեղում է: Շվեյցարական մրցակարգով կանցկացվի 10 տուր: Հաղթողը կպարգևատրվի 5000, 2-րդ մրցանակակիրը՝ 2000, 3-րդը՝ 1250 եվրոյով: Ընդհանուր առմամբ դրամական պարգևների կարժանանան մրցաշարի 10 լավագույն շախմատիստները: Նախատեսված են նաև հատուկ մրցանակներ:
21.04.2017

Եվրոպայի առաջնություն. Էլինա Դանիելյանը մեդալների հավակնորդների թվում է

Ռիգայում ավարտին է մոտենում կանանց շախմատի Եվրոպայի անհատական առաջնությունը: Նախավերջին՝  10-րդ տուրում Էլինա Դանիելյանը սևերով հաշտություն կնքեց գերմանուհի Էլիզաբեթ Պյոտչի հետ: Էլինան 7 միավորով ընթանում է 5-րդ տեղում: Նույնքան միավոր ունեն ևս 11 մասնակիցներ: Դանիելյանը մեկ միավորով է հետ մնում աղյուսակը գլխավորող Նանա Ձագնիձեից, ով հաղթեց լեհ Մոնիկա Սոցկոյին: 7,5 միավորով 2-րդ տեղում է ռուսաստանցի Ալեքսանդրա Գորյաչկինան: Ավարտական տուրում Էլինա Դանիելյանը սպիտակներով մրցելու է վիետնամցի Թհան Չանգ Հոանգի հետ: Հաղթանակի դեպքում նա կարող է մրցանակակիր դառնալ: Հայ շախմատիստուհիներից երկրորդ արդյունքն ունի Լիլիթ Մկրտչյանը, ով ոչ-ոքի խաղալով հունգարուհի  Զիդոնիա Լազարնեի հետ, վաստակեց 6 միավոր: Մեր մյուս երկու շախմատիստուհիներն անհաջողության մատնվեցին: Լիլիթ Գալոյանը պարտվեց ռուսաստանցի Եվգենիա Օվոդին, իսկ Մարիա Գևորգյանը զիջեց  վրացի Նինո Խոմերիկիին: Լիլիթն ունի 5 միավոր, Մարիան նրանից կես միավոր պակաս է վաստակել:
21.04.2017

GRENKE Chess Classic. Արոնյանը ժամկետից շուտ նվաճեց գլխավոր մրցանակը

Գերմանիայում ընթացող շախմատի GRENKE Chess Classic մրցաշարում հիանալի  հանդես եկող Լևոն Արոնյանը շարունակեց հաղթարշավը՝  6–րդ տուրում պարտության մատնելով Հոու Յիֆանին: Դա մրցաշարում Արոնյանի տոնած 4-րդ անընդմեջ հաղթանակն էր, որի շնորհիվ հայ գրոսմայստերը ժամկետից շուտ նվաճեց գլխավոր մրցանակը: Ավարտական տուրից առաջ Արոնյանն անհասանելի դարձավ մրցակիցների համար՝ վաստակելով 5 միավոր: Նա 1,5 միավորով գերազանցում է իր մոտակա հետապնդողներին՝  Մագնուս Կառլսենին և Ֆաբիանո Կարուանային: Կառլսենը հաշտություն կնքեց Արկադի Նայդիչի հետ, Կարուանան էլ միավորը կիսեց Մաթիաս Բլյուեբաումի հետ պարտիայում: Նույնպիսի արդյունք գրանցվեց նաև Մաքսիմ Վաշիե-Լագրավի և Գեորգ Մայերի մրցավեճում: Վաղը կայանալիք 7-րդ տուրում Արոնյանը սևերով կխաղա Կարուանայի հետ: Արոնյանի համար այդ հանդիպման արդյունքն արդեն էական նշանակություն չունի:
21.04.2017

Արոնյանը հաղթեց ադրբեջանցի շախմատիստին և ամրապնդեց առաջատարի դիրքը

Գերմանիայում ընթացող շախմատի GRENKE Chess Classic մրցաշարում հիանալի է հանդես գալիս հայ շախմատիստների առաջատար Լևոն Արոնյանը: 5–րդ տուրում Արոնյանը սպիտակներով 58-րդ քայլին պարտության մատնեց Ադրբեջանը ներկայացնող Արկադի Նայդիչին՝ տոնելով մրցաշարում 3-րդ անընդմեջ հաղթանակը: Այդ հաղթանակի շնորհիվ Արոնյանը մրցաշարի ավարտից երկու տուր առաջ ավելի ամրապնդեց առաջատարի իր դիրքը՝ 4 միավորով շարունակելով գլխավորել մրցաշարային աղյուսակը: Այժմ Լևոնը մեկ միավորով է առաջ անցել Հոու Յիֆանից, Ֆաբիանո Կարուանայից և Մագնուս Կառլսենից: Տուրում գրանցված երկրորդ հաղթանակը տոնեց Մագնուս Կառլսենը, ով մրցում էր Գեորգ Մայերի հետ: Հոու Յիֆան-Մաթիաս Բլյուեբաում, Ֆաբիանո Կարուանա-Մաքսիմ Վաշիե-Լագրավ պարտիաներն ավարտվեցին ոչ-ոքի: 6-րդ տուրում Լևոն Արոնյանը սպիտակներով կմրցի Հոու Յիֆանի հետ, իսկ մրցաշարը կավարտի Ֆաբիանո Կարուանայի հետ մրցավեճով:
20.04.2017

Լևոն Արոնյանը միանձնյա գլխավորեց մրցաշարային աղյուսակը

Գերմանական Կարլսրուհե քաղաքում մեկնարկած շախմատի GRENKE Chess Classic մրցաշարն անցկացված 3 տուրերից և հանգստյան մեկ օրվանից հետո շարունակվեց Բադեն-Բադենում: 4–րդ տուրը ևս հաջող էր Լևոն Արոնյանի համար, ով գերմանացի Մաթիաս Բլյուբաումի հետ մրցախաղում երկրորդ անընդմեջ հաղթանակը տոնեց: Հիշեցնենք, որ նախորդ տուրում Լևոնը հաղթել էր Մաքսիմ Վաշիե-Լագրավին: Հաղթանակի շնորհիվ Լևոն Արոնյանը 3 միավորով միանձնյա գլխավորեց մրցաշարային աղյուսակը: Նրանից կես միավոր պակաս են վաստակել Հոու Յիֆանը, Ֆաբիանո Կարուանան և Արկադի Նայդիչը: Հոու Յիֆանը մրցաշարում առաջին պարտությունը կրեց: Նա մրցում էր Մաքսիմ Վաշիե-Լագրավի հետ: Մագնուս Կառլսեն-Ֆաբիանո Կարուանա, Արկադի Նայդիչ-Գեորգ Մայեր պարտիաներն ավարտվեցին ոչ-ոքի: 5-րդ տուրում Լևոն Արոնյանը սպիտակներով կմրցի Արկադի Նայդիչի հետ:
ԹԵԺ ԵՎ ԲԱՑԱՌԻԿ

Vivaro News

Հասցե - Գ. Հովսեփյան 20 Հեռ. - 010 510051 E-mail - [email protected]

Ըստ «Հեղինակային իրավունքի եվ հարակից իրավունքների մասին» Հայաստանի Հանրապետության օրենքի 22.1 հոդվածի 2-րդ կետի՝ լրատվական կայքի նյութերից օգտվելու դեպքում սկզբնաղբյուրին հղում կատարելը և նյութի վերնագրում կայքի անունը նշելը պարտադիր է:

ՍՈՑՑԱՆՑԵՐ

% 8 #
Բոլոր իրավունքները պաշտպանված են: