Բարձրագույն խումբ. 16-րդ տուրին ընդառաջ

«ՓՅՈՒՆԻԿ» «ՇԻՐԱԿ»

Փյունիկ - Շիրակ

74 խաղ, +42=11-21, 125:78

26 նոյեմբերիժ.16:00, Երևան, Ֆուտբոլի ակադեմիայի  մարզադաշտ

Տուրի կենտրոնական խաղի մասնակիցները նախորդ տուրում թանկարժեք միավորներ կորցրին: Դա հատկապես վերաբերում է «Շիրակին», որն ընթացիկ առաջնությունում առաջին պարտությունը կրեց հյուրընկալվելիս՝ Կապանում նվազագույն հաշվով զիջելով դաշտի տերերին:

«Փյունիկն» էլ «Բանանցի» հետ մրցավեճում բավարարվեց ոչ-ոքի արդյունքով և մեկով կրճատեց միավորների տարբերությունը գյումրեցիներից, որոնց այժմ զիջում է 2 միավորով:

Այնպես որ այս հանդիպման նշանակությունը բավականին մեծ է, որի ելքը կարող է էապես ազդել առաջնության աշնանային հատվածի հաղթողի կոչման համար մղվող մրցակցության վրա:

Հաջող հանդես գալու դեպքում հանդիպումը կարող է հիշարժան դառնալ «Փյունիկի» համար: Փյունիկցիները կարող են այդ խաղում միանգամից երկու հոբելյան նշել, եթե կարողանան հաղթել ու առնվազն 2 գնդակ խփեն «Շիրակին»: Հաղթանակը «Փյունիկի» համար կլինի 400-րդը, իսկ խփած 2-րդ գնդակը՝ 1500-րդը բարձրագույն խմբի առաջնություններում: Երկու ցուցանիշներն էլ ռեկորդային կլինեն հայկական ֆուտբոլում:

Օգոստոսի 6-ին մրցակիցների միջև Գյումրիում կայացած առաջին շրջանի խաղում, որով տրվել էր ֆուտբոլի Հայաստանի բարձրագույն խմբի հոբելյանական՝  25-րդ առաջնության մեկնարկը, «Շիրակը» 3:1 հաշվով վստահ հաղթանակ տոնեց: Արդեն առաջին խաղակեսում շիրակցի Վիուլեն Այվազյանը 2 անգամ գրավեց իր նախկին թիմի դարպասը՝ փաստորեն վճռելով հանդիպման ելքը:

Ընդմիջումից հետո Դավիթ Մանոյանը 11մ հարվածով կրճատեց հաշվի տարբերությունը, բայց ավելացված ժամանակում Արամ Մուրադյանը 3-րդ գոլը խփեց: Ի դեպ, այդ խաղից հետո Դավիթ Մանոյանն էլ հեռացավ «Փյունիկից»՝ մեկնելով Կիպրոս:

Այդ հաղթանակը «Շիրակի» համար առաջինն էր փյունիկցիների հետ անցկացրած առաջնության վերջին 10 հանդիպումներում: Մինչ այդ շիրակցիները 6 պարտություն էին կրել, 3 խաղ ավարտել էին ոչ-ոքի: Վերջին հաղթանակը «Փյունիկի» նկատմամբ շիրակցիները տոնել էին 2014թ. ապրիլի 6-ին Գյումրիում և կրկին 3:1 հաշվով:

Երկրորդ շրջանի երևանյան խաղում գրանցվեց գոլազուրկ ոչ-ոքի: Իսկ ահա 3-րդ շրջանում «Փյունիկը» Գյումրիում ռևանշի հասավ Արթուր Քարտաշյանի խփած միակ գոլի շնորհիվ:

Մրցակիցների մրցավեճում բոլորից արդյունավետ է գործել նախկին փյունիկցի Գևորգ Ղազարյանը, որի օգտին 11 գոլ է գրանցված: «Փյունիկին» առավել մեծ տհաճություն է պատճառել «Շիրակի» բոլոր տարիների լավագույն ռմբարկու Արթուր Պետրոսյանը, ով խփել է 8 գնդակ:

1 2 3
ԼՐԱՀՈՍ
* ]
ԹԵԺ ԵՎ ԲԱՑԱՌԻԿ